ការវាយប្រហារតាមផ្លូវអាកាសពីសំណាក់អ៊ីស្រាអែល លើក្រុមហាម៉ាស់ បានកើតឡើងសារជាថ្មី នៅយប់ចូលថ្ងៃទី១៦ ខែមិថុនា។ ការវាយប្រហារលើក្រុមហាម៉ាស់ យុទ្ធជនប្រយុទ្ធប៉ាឡេស្ទីននេះ ធ្វើឡើងបន្ទាប់ពីបាឡុងផ្ទុកសារធាតុឆេះ បានហោះមកក្នុងតំបន់ភាគខាងត្បូងរបស់អ៊ីស្រាអែល។ បើតាមអ្នកពន្លត់អគ្គិភ័យក្នុងស្រុកអ៊ីស្រាអែល បាឡុងផ្ទុកសារធាតុឆេះនោះ បានបង្កជាអគ្គិភ័យចំនួន ២០កន្លែង។ 
 

ក្នុងការប្រហារនោះ ទ័ពអាកាសអ៊ីស្រាអែល បានវាយប្រហារលើទីតាំងភាគខាងកើតនៃទីក្រុង Khan Younes នៅក្នុងតំបន់កាហ្សា ដែលត្រូវបានអ៊ីស្រាអែលចាត់ទុកថា ជាការវាយប្រហារលើក្រុមហាម៉ាស។ យ៉ាងណាមិញ ការវាយប្រហារតាមផ្លូវអាកាសខាងលើ មិនត្រូវបានអាជ្ញាធរប៉ាឡេស្ទីន រាយការណ៍ពីករណីស្លាប់ឡើយ។ 
 

ការប៉ះទង្គិចរវាងក្រុមហាម៉ាស់ និងអ៊ីស្រាអែលជាថ្មីនេះ ធ្វើឡើងស្របពេល ប្រជាជនអ៊ីស្រាអែលជាច្រើនរយនាក់ បានចូលរួមក្នុងព្រឹត្តិការណ៍ « March of the Flags» ដើម្បីអបអរខួបបង្រួបបង្រួមទីក្រុងហ៊្សេរុយសាឡិម ដែលអ៊ីស្រាអែលបានគ្រប់គ្រង បន្ទាប់ឈ្នះសង្រ្គាម ៦ថ្ងៃ នៅក្នុងឆ្នាំ១៩៦៧។ 
 

មិនតែប៉ុណ្ណោះ ការវាយប្រហារផ្លូវអាកាស ជាលើកដំបូង បន្ទាប់ពីអ៊ីស្រាអែល និងក្រុមហាម៉ាស់ មានបទឈប់បាញ់ជាមួយគ្នានាពេលថ្មីៗនេះ និងបន្ទាប់ពីរដ្ឋាភិបាលចម្រុះអ៊ីស្រាអែលថ្មីចូលកាន់តំណែង។ 
 

គួររំលឹកថា នៅក្នុងការវាយប្រហារទៅវិញទៅមកក្នុងខែឧសភាកន្លងទៅ ប្រជាជនប៉ាឡេស្ទីនយ៉ាងហោចណាស់ ២៦០នាក់ និងប្រជាជនអ៊ីស្រាអែលមានចំនួន ១៣នាក់ បានបាត់បង់ជីវិត។ ចំណែកអ្នករងរបួសមានជាច្រើនពាន់នាក់៕