វប្បធម៌នៃការអប់រំណែនាំកូនពីការងារផ្សេងៗ និងការបង្រៀនកូនឱ្យចេះជួយការងារផ្ទះ មិនប្រកាន់មុខនាទី សម្រាប់ម្ដាយឪពុកនៅជនបទ ធ្វើឡើងក្រោមទ្រឹស្ដីថា «បង្រៀនវាឱ្យចេះទៅ បើថ្ងៃណាមួយអត់ពីយើង វានឹងអាចទីពឹងខ្លួនឯងបាន» «ពត់ឈើទាន់នៅតូច» «សាលាថាស្រួលនិយាយ ប៉ុន្តែសាលាធ្វើពិបាក»។ ដូច្នោះហើយ ការងារសព្វសារពើ ទាំងការងារធ្ងន់ ការងារស្រាយ ការងារប្រើកម្លាំង និងការងារប្រើបញ្ញា ក្មេងនៅជនបទសុទ្ធតែបានឆ្លងកាត់។
 

ក្មេងនៅជនបទ ត្រូវបានទម្លាប់ឱ្យចេះធ្វើការងារ តាំងតែពីពួកគេចេះដើរម្ល៉េះ គឺធ្វើការងារណាដែលពួកគេអាចធ្វើបាន។ អាណាព្យាបាលនៅជនបទភាគច្រើន មិនទម្លាប់ឱ្យក្មេងត្អូញត្អែរ ឬរអ៊ូរទាំពេលធ្វើការងារ មិនបណ្ដោយឱ្យពួកគេ ក្លាយជាក្មេងរឹងត្អឹង និងទម្រើសឡើយ។ ចាស់ទុំតែងប្រាប់ក្មេងៗថា ចុះបើអត់ពីម៉ែពីពុកទៅ តើកូនរស់ដោយរបៀបណា? ក្មេងនៅជនបទភាគច្រើន ត្រូវបានអប់រំឱ្យចេះគោរពចាស់ទុំ ឱនលំទោនចំពោះអ្នកមានអាយុច្រើនជាង និងចេះគួរសមទៅមនុស្សគ្រប់គ្នាជានិច្ច៕