កីឡាអន្តរជាតិ
អន្តរជាតិ
Euro 2020៖ ពូល D មិនទាន់កាត់សេចក្តីដោយសារអង់គ្លេសស្មើ ០-០ ជាមួយស្កុតឡែន ក្រោយក្រូអាស៊ីតាមស្មើឆែក ១-១ ប្រធានក្រុមស្កុតឡែន Andrew Robertson ទាញអាវខ្សែបម្រើអង់គ្លេស Phil Foden។ រូបថត Getty Image
× ពូល D នៃព្រឹត្តិការណ៍ Euro 2020 មិនទាន់រកឃើញក្រុមដែលត្រូវឡើងទៅកាន់វគ្គ១៦ក្រុមចុងក្រោយឡើយ បន្ទាប់ពីលទ្ធផលស្មើទាំង២ប្រកួតនៃជំនួបសប្តាហ៍ទី២។
នៅកីឡដ្ឋាន Wembley ការប្រកួតរវាងម្ចាស់ផ្ទះអង់គ្លេស និងស្កុតឡែន បានបញ្ចប់ដោយមិនមានគ្រាប់បាល់បញ្ចូលទី។ លទ្ធផលនេះ នាំឲ្យក្រុមលោក Gareth Southgate មាន៤ពិន្ទុ រីឯស្កុតឡែនដែលដឹកនាំដោយ លោក Steve Clarke មាន១ពិន្ទុជាលើកដំបូង។ ខ្សែបម្រើស្កុតឡែន Billy Gilmour ដែលលេងបានយ៉ាងល្អនៅតំបន់កណ្តាល បានក្លាយជាកីឡាករឆ្នើមប្រចាំការប្រកួត Star of the Match។
ចំណែកឯការប្រកួតរវាងសាធារណរដ្ឋឆែក និងក្រូអាស៊ី បានបញ្ចប់ក្នុងលទ្ធផលស្មើ ១-១។ ឆែកបាននាំមុខមុននៅនាទី៣៧ ដែលជាការស៊ុតប៉េណាល់ទីរបស់ខ្សែប្រយុទ្ធ Patrik Schick ហើយក៏ជាគ្រាប់ទី៣របស់គេក្នុងព្រឹត្តិការណ៍។ នាទី៤៧ ខ្សែបម្រើក្រូអាស៊ី Ivan Perisic តាមស្មើវិញ ដើម្បីចែករំលែកម្នាក់១ពិន្ទុ។ ខ្សែបម្រើជើងចាស់ Luka Modric ជាកីឡាករឆ្នើមប្រចាំការប្រកួត។
បច្ចុប្បន្នសាធារណរដ្ឋឆែក និងអង់គ្លេសមាន៤ពិន្ទុរៀងៗខ្លួន ដោយពួកគេត្រូវប៉ះគ្នាក្នុងសប្តាហ៍ទី៣។ បើការប្រកួតបញ្ចប់ក្នុងលទ្ធផលស្មើគ្នា ក្រុមទាំងពីរនឹងបានកៅអីវគ្គ១៦ក្រុមចុងក្រោយ។ សម្រាប់ជំនួបចុងក្រោយរវាងក្រូអាស៊ី និងស្កុតឡែន ពួកគេចាំបាច់ត្រូវការជ័យជម្នះ ដោយយ៉ាងណាស់សង្ឃឹមថា ស្ថិតក្នុងចំណោមក្រុមលេខ៣ឆ្នើមផងដែរ៕
© រក្សាសិទ្ធិដោយ thmeythmey.com