ហុងគ្រីគឺជាក្រុមដែរមិនទាន់មានពិន្ទុរាប់​នៅ​ក្នុងពូល F ដោយជំនួបដំបូងពួក​គេបានចាញ់ព័រទុយហ្កាល់ ៣-០។ ការប្រកួតនាត្រីនេះ ហុងគ្រីកាន់តែជួបការលំបាកដោយត្រូវតទល់ជាមួយក្រុមខ្លាំងបារាំង។ 

 

ពីឆ្នាំ​១៩៧៨ ដល់ឆ្នាំ២០០៥ ហុងគ្រីមិនដែលយកឈ្នះបារាំងនោះឡើយ ដោយចាញទាំង៥ប្រកួត ចំណែកក្រុមជម្រើសជាតិបារាំងក៏ត្រូវការពិន្ទុបន្ថែមដើម្បីរក្សាកៅអីទៅកាន់វគ្គបន្តត្បិត​ក្នុងពូល F គឺប្រមូលផ្តុំទៅដោយក្រុមជម្រើសជាតិខ្លាំងៗ។

 

ព័រទុយហ្កាល់កំពុងឈរ​លើកំពូលតារាងក្នុងពូល ហើយជ័យជម្នះនារាត្រីនេះនឹងឲ្យពួក​គេបានកៅអីដោយ ស្វ័យប្រវត្តិទៅកាន់វគ្គ១៦ក្រុម​ចុងក្រោយ។ ប៉ុន្តែទោះបីជាយ៉ាងណាក៏ដោយ ការប្រកួតនឹងមានការតឹងតែងខ្លាំងដោយសារអាល្លឺម៉ង់ស្រេកឃ្លានជ័យជម្នះ ក្រោយចាញ់បារាំង ១-០។

 

៩ប្រកួតចុងក្រោយបើគិតពីឆ្នាំ១៩៩០ មក ព័រទុយហ្កាល់ឈ្នះអាល្លឺម៉ង់តែម្តង​ប៉ុណ្ណោះ ក្រៅពីនេះស្មើ៣ នឹងចាញ់៥។

 

សម្រាប់ជំនួបផ្សេងទៀត ក្រុមជម្រើសជាតិអេស្ប៉ាញទទួលស្វាគមន៍ប៉ូឡួញ នាកីឡដ្ឋាន Estadio de La Cartuja ម៉ោង២អាធ្រាត្រ នាការប្រកួតសប្តាហ៍ទី២ពូល E៕