តួរលេខនៃអ្នកឆ្លងកូវីដ-១៩ នៅខេត្តកំពង់ចាមនៅតែកើន។ សម្រាប់ថ្ងៃទី១៩មិថុនា រដ្ឋបាលខេត្តកំពង់ចាមប្រកាសរកឃើញមនុស្ស៤៥នាក់ទៀត ឆ្លងកូវីដ-១៩ ដោយក្នុងនោះនៅស្រុកជើងព្រៃមាន២១នាក់។ ស្រុកព្រៃឈរ មាន៨នាក់, ស្រុកកោះសូទិនមាន៦នាក់, ស្រុកស្រីសន្ធរមាន៣នាក់ និងស្រុកកងមាស មាន២នាក់។ សម្រាប់ក្រុងកំពង់ចាម ស្រុកស្ទឹងត្រង់ ស្រុកបាធាយ គ្រូពេទ្យជំនាញរបស់ក្រសួងសុខាភិបាល បានរកឃើញវិជ្ជមានកូវីដ-១៩ មួយករណី នៅក្នុងស្រុកនីមួយៗ។ ដោយឡែកអ្នកជំងឺកូវីដ-១៩ ចំនួន២នាក់ទៀត ជាអ្នកដំណើរមកពីខេត្តត្បូងឃ្មុំ។ 

 

ក្នុងថ្ងៃជាមួយគ្នានេះ រដ្ឋបាលខេត្តកំពង់ចាម ក៏បានប្រកាសថា មានអ្នកជំងឺ៨៧នាក់ បានជាសះស្បើយពីជំងឺនេះផងដែរ។ ចំនួននេះ បានធ្វើឱ្យខេត្តកំពង់ចាម កើននូវអ្នកជាសះស្បើយពីកូវីដ-១៩ សរុប ១,០៦៤នាក់។

 

ក្នុងចំណោមមនុស្ស១៣នាក់ទៀត ដែលរដ្ឋបាលខេត្តសៀមរាបរកឃើញវិជ្ជមានកូវីដ-១៩នោះ គឺមានអាយុចាប់ពី២ដល់៨០ឆ្នាំ។ ចំពោះអ្នកជំងឺកូវីដ-១៩ទាំងនេះ មាន៣នាក់មានអាសយដ្ឋាននៅស្រុកបាគង, ៣នាក់នៅស្រុកក្រឡាញ់, ស្រុកសូទ្រនិគម២នាក់ និងនៅស្រុកជីក្រែង២នាក់។ ដោយឡែក នៅក្រុងសៀមរាប ស្រុកពួក ស្រុកអង្គរជុំ  ក៏ត្រូវបានរដ្ឋបាលខេត្តសៀមរាប រកឃើញវិជ្ជមានកូវីដ-១៩ មួយករណីក្នុងមូលដ្ឋាននីមួយៗ។ 

 

ក្រៅពីរកឃើញអ្នកឆ្លងកូវីដ-១៩នោះ រដ្ឋបាលខេត្តសៀមរាប ក៏បានប្រកាសនូវដំណឹងល្អចំពោះអ្នកជំងឺ២០នាក់ទៀត បានជាសះស្បើយពីកូវីដ-១៩ផងដែរ។ មកទល់ពេលនេះ ខេត្តសៀមរាប មានអ្នកវិជ្ជមានកូវីដ-១៩ចំនួន៥៧៦នាក់ ដោយក្នុងមាន១៦៦បានជាសះស្បើយ,ស្លាប់៥នាក់ និង៤០៥នាក់ទៀត កំពុងសម្រាកព្យាបាលជំងឺ។

 

 

អ្នកជំងឺកូវីដ-១៩ម្នាក់វ័យ២៤ឆ្នាំ បានជាសះស្បើយពីកូវីដ-១៩។ បើតាមសេចក្តីប្រកាសព័ត៌មានរបស់លោក វ៉ា ថន រដ្ឋភិបាលខេត្តក្រចេះ ស្ត្រីដែលសះស្បើយពីកូវីដឈ្មោះ ឡុង ឈាវហ៊ួ មានអាសយដ្ឋានភូមិជើងពាធ ឃុំកោះខ្ញែ ស្រុកសំបូរ។ បើតាមលោក  វ៉ា ថន សម្រាប់ថ្ងៃទី១៩មិថុនា ឆ្នាំ២០២១ ខេត្តក្រចេះ មិនមានករណីវិជ្ជមាននៃកូវីដ-១៩ឡើយ។ 

 

លោក  វ៉ា ថន បានបញ្ជាក់ថា គិតត្រឹមថ្ងៃទី១៩មិថុនា ខេត្តក្រចេះ មានអ្នកវិជ្ជមានកូវីដ១៩ សរុប២១នាក់ ដោយនៅក្នុងនោះ មាន១៣នាក់បានសះស្បើយ, ស្លាប់ម្នាក់ និង៧នាក់ទៀតកំពុងព្យាបាលនៅឡើយ។

 

តួលេខសរុប គិតមកដល់ថ្ងៃទី២០ ខែមិថុនា ឆ្នាំ២០២១នេះ គឺ អ្នកឆ្លង មាន៤២៧១១នាក់ អ្នកជាសះស្បើយ មាន៣៧៤៨៩នាក់ និង អ្នកស្លាប់ មាន៤៣១នាក់៕