កាតា ជាប្រទេសតំបន់អារ៉ាប់ដំបូងគេក្នុងប្រវត្តិសាស្ត្រ ដែលទទួលរ៉ាប់រងធ្វើម្ចាស់ផ្ទះ World Cup។ ពួកគេ ត្រូវរៀបចំការប្រកួតរយៈពេលមួយខែ ចាប់ពីថ្ងៃទី២១ ខែវិច្ឆិកា ដល់ថ្ងៃទី១៨ ខែធ្នូ ឆ្នាំ ២០២២។ លោក Gianni Infantino ប្រធានសហព័ន្ធកីឡាបាល់ទាត់អន្តរជាតិ (FIFA) បញ្ជាក់ថា ការប្រកួតនឹងត្រូវធ្វើឡើងដោយមានអ្នកគាំទ្រពេញកីឡដ្ឋានតែម្តងទោះនៅមានកូវីដ-១៩ក្តី។
 

បើតាមការចុះផ្សាយរបស់ទីភ្នាក់ងារព័ត៌មាន Reuters នាយករដ្ឋមន្រ្តីកាតាលោក Sheikh Khalid bin Khalifa bin Abdulaziz Al Thani កំណត់ឱ្យតែអ្នកគាំទ្រដែលបានចាក់វ៉ាក់សាំងកូវីដ-១៩ ពេញលេញ ទើបឱ្យចូលក្នុងកីឡដ្ឋានប្រកួតបាន។ ការធ្វើបែបនេះព្រោះលោក Al Thani ចង់ធានាដំណើរការព្រឹត្តិការណ៍លំដាប់ពិលោកជាប្រវត្តិសាស្ត្ររបស់ខ្លួនឱ្យបានជោគជ័យគ្រប់ជ្រុងជ្រោយ។
 

មិនតែប៉ុណ្ណោះ នាយករដ្ឋមន្ត្រីកាតារូបនេះ កំពុងចរចាជាមួយក្រុមហ៊ុនផលិតវ៉ាក់សាំងកូវីដ-១៩ ដើម្បីទិញវ៉ាក់សាំងចំនួន១លានដូសទុកចាក់ជូនអ្នកគាំទ្រដែលធ្វើដំណើរទៅប្រទេសកាតាក្នុងគោលបំណងទស្សនា World Cup ផងដែរ។
 

កាតា ដែលនឹងត្រូវរៀបចំពានរង្វាន់កីឡាបាល់ទាត់តំបន់អារ៉ាប់ Arab Cup ឆ្នាំ ២០២១ ក្នុងក្រុងដូហា នាខែធ្នូខាងមុខ នឹងយកព្រឹត្តិការណ៍នេះដើម្បីឆ្លុះបញ្ចាំងពីការត្រៀមខ្លួនរបស់ខ្លួនដើម្បីរៀបចំការប្រកួតធំៗជាបន្តបន្ទាប់៕