ដោយ៖ ឈួ ស៊ាវយីងជាវ 

 

 

ថ្ងៃទី២៤ ខែមិថុនា ឆ្នាំ២០២១ ជាខួបលើកទី៨៩ នៃបដិវត្តន៍ថ្ងៃទី២៤ ខែមិថុនា ឆ្នាំ១៩៣២ ដែលបានផ្លាស់ប្តូរថៃពីរាជានិយមផ្តាច់ការទៅជារាជាធិបតេយ្យអាស្រ័យរដ្ឋធម្មនុញ្ញ។ បើតាមស្នងការរងរបស់ការិយាល័យប៉ូលិសក្រុងបាងកក លោក Piya Tawichai  ក្រុមគាំទ្រប្រជាធិបតេយ្យចំនួន៤ ត្រូវបានរំពឹងនឹងរៀបចំធ្វើបាតុកម្មនៅថ្ងៃនោះ។

 

បាតុករ គ្រោងជួបជុំនៅកន្លែងសំខាន់ៗដូចជាខាងមុខអាគាររដ្ឋាភិបាល និងវិមានប្រជាធិបតេយ្យ។ ក្រុមបាតុករ ក៏មិនភ្លេចទាមទារឱ្យលោក ប្រាយុទ្ធ ចន្ទអូចា ចុះចេញពីតំណែងនាយករដ្ឋមន្រ្តីផងដែរ។ នេះបើតាមការផ្សាយរបស់កាសែតបាងកកប៉ុស្តិ៍។ 

 

ក្រោយពីការប្រកាសគម្រោងបាតុកម្ម លោក Piya បញ្ជាក់ថា ក្រុមប៉ូលិសបានរៀបចំសម្រាប់ទប់ទល់នឹងការប្រមូលផ្តុំរួចរាល់ហើយ។ លោកក៏បានព្រមានដល់ប្រជាជនក្រុងបាងកកពីការចូលរួមការជួបជុំ ព្រោះរាជធានីស្ថិតក្រោមវិធានការទប់ស្កាត់ជំងឺកូវីដ-១៩ ដែលហាមឃាត់ការប្រមូលផ្តុំ និងការជួបជុំនានា។ មន្រ្តីប៉ូលិសក្រុងបាងកក បញ្ជាក់ថា ប្រសិនបើច្បាប់នេះត្រូវបានបំពាន អ្នករៀបចំបាតុកម្មនឹងចាត់ការតាមផ្លូវច្បាប់។

 

ចាប់តាំងពីខែកក្កដា ឆ្នាំ២០២០ មនុស្សសរុបចំនួន១៥០នាក់ត្រូវចាប់ខ្លួន ដោយរួមមាន ពីបទជាប់ទាក់ទាងនឹងការប្រមូលផ្តុំនយោបាយ និងការញុះញុង់ឱ្យមានការប្រមូលផ្តុំតាមប្រព័ន្ធសង្គម៕