ជាតិ
សង្គមជាតិ
សេដ្ឋកិច្ច
រដ្ឋ បានចំណាយថវិកា៣៥០លានដុល្លារ សម្រាប់ជួយគ្រួសារក្រីក្រ ក្នុងវិបត្តិកូវីដ-១៩ ក្រុមមន្រី្តក្រសួងសង្គមកិច្ចចុះពិនិត្យគ្រួសារក្រីក្រនៅខេត្តមណ្ឌលគិរី (រូបពីក្រសួងសង្គមកិច្ច)
×
ភ្នំពេញ៖ រដ្ឋាភិបាល បានចំណាយថវិកា៣៥០ ដុល្លារហើយ សម្រាប់ឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ អំឡុងវិបត្តិកូវីដ-១៩។ នេះបើតាមលោក វង្សី វិស្សុត រដ្ឋមន្ដ្រីប្រតិភូអមនាយករដ្ឋមន្ដ្រី និងជារដ្ឋលេខាធិការក្រសួងសេដ្ឋកិច្ច និងហរិញ្ញវត្ថុ។
លោក វង្ស៊ី វិស្សុត បានបញ្ជាក់ថា ពលរដ្ឋក្រីក្រ និងងាយរងគ្រោះ ៦០ម៉ឺនគ្រួសារ បានទទួលប្រាក់ឧបត្ថម្ភពីរដ្ឋ ក្នុងអំឡុងពេលកូវីដ-១៩នេះ។ បើតាមលោក វង្សី វិស្សុត កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ នៅជុំទី៨នេះ ត្រូវបញ្ចប់នៅក្នុងខែមិថុនា។
ថ្លែងប្រាប់អ្នកសារព័តមាន នៅក្នុងពិធីទទួលវ៉ាក់សាំង១លានដូសពីចិន នៅព្រលានយន្តហោះអន្តរជាតិភ្នំពេញ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុរូបនេះ បានបញ្ជាក់ដូច្នេះថា «មកដល់ថ្ងៃនេះ ចំណាយខ្ទង់៣៥០លានដុល្លារហើយ ទៅលើគ្រួសារប្រហែលជា៦០ម៉ឺនគ្រួសារ។ឥឡូវនេះយើងកំពុងពិនិត្យពិភាក្សា ដើម្បីរៀបចំដាក់ចេញវិធានការជុំទី៩ ក្នុងការជួយទៅដល់អ្នកក្រ អ្នករកស៉ី ធុរកិច្ចដែលពិបាក ហើយខ្ញុំរំពឹងថាជំនួយសង្គមនឹងបន្ដទៀត»។
រដ្ឋាភិបាលកម្ពុជា បានប្រកាសឲ្យអនុវត្តកម្មវិធីសាច់ប្រាក់ជូនពលរដ្ឋក្រីក្រនិងជនងាយរងគ្រោះ ដោយសារជំងឺកូវីដ-១៩ កាលពីថ្ងៃទី២៤ មិថុនា ឆ្នាំ២០២០ ដើម្បីជួយដោះស្រាយជីវភាពួកគេ។ ចំពោះការផ្ដល់ប្រាក់ឧបត្ថម្ភនេះ រដ្ឋាភិបាល ក៏បានបែងចែកអ្នកក្រីក្រ និងជនងាយរងគ្រោះ ជា២កម្រិតដែរ គឺ អ្នកក្រីក្រកម្រិត១ សំដៅលើអ្នកក្រីក្រខ្លាំង និង អ្នកក្រីក្រកម្រិត២ សំដៅលើអ្នកក្រីក្រល្មម។
លើសពីនេះ គ្រួសារក្រីក្រ និងជនងាយរងគ្រោះ ក៏មានការបែងចែកជា៣តំបន់ទៀត គឺ នៅរាជធានីភ្នំពេញ នៅទីប្រជុំជនក្រៅពីរាជធានីភ្នំពេញ និង នៅជនបទ។ ពួកគេត្រូវទទួលបានប្រាក់ឧបត្ថម្ភ ជាលក្ខណៈគ្រួសារទាំងមូល និងជាលក្ខណៈបុគ្គល ពីរដ្ឋាភិបាល។
ក្នុងនោះអ្នកក្រីក្រនិងជនងាយរងគ្រោះ នៅរាជធានីភ្នំពេញ ទទួលបានប្រាក់ឧបត្ថម្ភ១២ម៉ឺនរៀលដូចគ្នា ក្នុង១គ្រួសារ ទាំងកម្រិត១ និងកម្រិត២។ ប៉ុន្តែលក្ខណៈបុគ្គលនៃសមាជិកគ្រួសារ នៅកម្រិត១ អាចទទួលបានប្រាក់ពី៤០,០០០រៀល ដល់៥២,០០០រៀលក្នុងម្នាក់ ខណៈកម្រិត២ ទទួលបានពី២៨,០០០រៀល ដល់៣៦,០០០រៀលក្នុងម្នាក់។
នៅទីប្រជុំជន ក្រៅពីរាជធានីភ្នំពេញ អ្នកក្រីក្រ និងជនងាយរងគ្រោះ ទទួលបានប្រាក់ឧបត្ថម្ភ១២ម៉ឺនរៀល ក្នុងគ្រួសារនីមួយៗ ដោយមិនបែងចែកកម្រិត១ ឬកម្រិត២ឡើយ។ ឯសមាជិក ក្នុងគ្រួសារក្រីក្រកម្រិត១ ទទួលបាន៤ម៉ឺនរៀលក្នុងម្នាក់ៗ ហើយសមាជិក ក្នុងគ្រួសារក្រីក្រកម្រិត២ ទទួលបាន២ម៉ឺន៨ពាន់រៀល ក្នុងម្នាក់ៗ។
អ្នកក្រីក្រនិងជនងាយរងគ្រោះ ដែលស្ថិតក្នុងកម្រិត១និងកម្រិត២ ទទួលបានប្រាក់ឧបត្ថម្ភ៨ម៉ឺនរៀលដូចគ្នា ក្នុង១គ្រួសារ។ ចំពោះសមាជិក ក្នុងគ្រួសារក្រីក្រកម្រិត១ ទទួលបាន២ម៉ឺន៤ពាន់រៀលក្នុងម្នាក់ៗ ហើយសមាជិកក្នុងគ្រួសារក្រីក្រកម្រិត២ ទទួលបាន១ម៉ឺន៦ពាន់រៀលក្នុងម្នាក់ៗ៕
© រក្សាសិទ្ធិដោយ thmeythmey.com