ដោយ៖ ប៉ូ សុភា ​
 

 

កូនផ្សោតទី៥ ក្នុងតំបន់អន្លង់សត្វផ្សោតកាំពីខេត្តក្រចេះ ត្រូវបានអ្នកជំនាញ និងកត់ត្រាចូលបញ្ជីកំណត់ត្រាកំណើតថ្មី នៅថ្ងៃទី២៨ ខែមិថុនា។ កាលពីឆ្នាំ២០២០ សត្វផ្សោតថ្មីសរុបចំនួន៩ក្បាល ត្រូវបានចូលបញ្ជី ខណៈសត្វផ្សោតថ្មីសរុបចំនួន១៣ក្បាលត្រូវបានគេកត់ត្រាក្នុងឆ្នាំ២០១៩។ បើតាមអង្គការ WWFប្រចាំនៅកម្ពុជា កាលពីថ្ងៃទី១ ខែកក្កដា។
 

ទន្ទឹមនឹងការកើតថ្មីជាបន្តបន្ទាប់របស់សត្វប្រភេទនេះ  កត្តាគំរាមកំហែងដូចជាបទល្មើស និងការនេសាទខុសច្បាប់ ដែលប៉ះពាល់ដល់ការរស់នៅ និងអាយុជីវិតរបស់ពួកវានៅតែមាន។ «ស្ថានភាពបែបនេះ ចាំបាច់ទាមទារនូវវិធានការរួមគ្នា និងខ្លាំងក្លាជាងមុនបន្ថែមទៀតដើម្បីការពារប្រភេទសត្វផ្សោតទឹកសាបដែលមានសារៈសំខាន់ជាសកល ឲ្យជៀសផុតពីការឈានទៅផុតពូជ»។ នេះជាការបញ្ជាក់របស់អង្គការ WWF។​
 

សត្វផ្សោតទន្លេមេគង្គ ត្រូវបានចាត់ថ្នាក់ក្នុងបញ្ជីក្រហមរបស់អង្គការ IUCN ជាប្រភេទសត្វរងគ្រោះថ្នាក់ ជិតផុតពូជបំផុត។ លទ្ធផលនៃជំរឿនសត្វផ្សោតទន្លេមេគង្គក្នុងឆ្នាំ២០២០ ដោយរដ្ឋបាលជលផល និង អង្គការ WWF បានបង្ហាញថា មានសត្វផ្សោតចំនួនត្រឹមតែ៨៩ក្បាលប៉ុណ្ណោះ ដែលកំពុងរស់នៅក្នុង ទន្លេមេគង្គកម្ពុជា៕