​

រយៈពេល៣សប្តាហ៍នៃខែមិថុនា ខេត្តកែបទទួលបានទេសចរជិត ២ម៉ឺននាក់ដើរកម្សាន្ត។ ចំនួនភ្ញៀវទេសចរនេះ បានធ្វើឱ្យអាជីវករក្នុងវិស័យទេសចរណ៍ នៅខេត្តជាប់ឆ្នេរសមុទ្រមួយនេះ ទទួលបានចំណូលមកវិញ។ ប៉ុន្តែកំណើនភ្ញៀវជាហានិភ័យ នៃការចម្លងជំងឺកូវីដ-១៩។  លោក សោម ចិន្តា ប្រធានមន្ទីទេសចរណ៍ខេត្តកែប លើកឡើងថា ភ្ញៀវទេសចរ ខ្លះមិនអនុវត្តវិធានសុវត្ថិភាព ដែលធ្វើឱ្យលោក​បារម្ភពីការរាតត្បាតនៃជំងឺកូវីដ-១៩ កាន់តែខ្លាំង។
 

«ភ្ញៀវនៅតែមានច្រើន មែនទែនទៅយើងអត់ចង់បានភ្ញៀវច្រើនពេកទេ ប៉ុន្តែគាត់ចេះតែមក។ ភ្ញៀវខ្លះណែនាំហើយធ្វើតាម អ្នកខ្លះទៀតអត់ស្ដាប់ អ្នកខ្លះមិនរក្សាគម្លាត។ យើងមិនអាចទៅមើលគាត់បានគ្រប់ជ្រុងជ្រោយបានទេ អ៊ីចឹងគាត់ត្រូវចេះរក្សាសុវត្ថិភាពដោយខ្លួនឯង »។ នេះជាការបញ្ជាក់របស់លោក សោម ចិន្តា ដោយបន្តអំពាវនាវដល់ម្ចាស់ផ្ទះសំណាក់ សណ្ឋាគារ និងភោជនីយដ្ឋានឱ្យ អនុវត្តវិធានសុវត្ថិភាពឱ្យបានខ្ជាប់ខ្ជួន មិនត្រូវប្រហែសជាដាច់ខាត ។​

​