ជាតិ
ប្រាសាទ«ថ្នល់ដាច់»សង់អំពីឥដ្ឋ ជាបុរាណស្ថាននៅខេត្តសៀមរាប
×
ដោយ៖ ឡុង តូន
សៀមរាប ៖ ដ្បិតពុំសូវមានទេសចរ មកទស្សនាជាហូរហែក្ដី តែប្រាសាទថ្នល់ដាច់ នៅតែជាបុរាណស្ថានមួយដែលមានសារសំខាន់ សម្រាប់អ្នកស្រាវជ្រាវផ្នែកបុរាណវិទ្យា និងជាពិសេសផ្នែកស្ថាបត្យកម្ម។ ប្រាសាទថ្នល់ដាច់ អ្នកខ្លះហៅប្រាសាទក្រវិល។ ឯអ្នកខ្លះទៀតហៅប្រាសាទទំនប់អន្លង់ក្រវិល ជាប្រាសាទដែលសង់អំពីឥដ្ឋ លើទីទួលតូចមួយ និងមានស្នាមគូទឹកនៅព័ទ្ធជុំវិញ។
ប្រាសាទថ្នល់ដាច់ ស្ថិតនៅក្នុងបរិវេណវត្តប្រាសាទទំនប់អន្លង់ក្រវិល ហៅវត្តក្រវិល ក្នុងភូមិទទឹងថ្ងៃ ឃុំឫស្សីលក ស្រុកជីក្រែង ខេត្តសៀមរាប។ ប្រាសាទនេះ ពុំមានសិលាចារឹក ដែលអាចផ្ដល់កាលបរិច្ឆេទនៃការកសាងច្បាស់លាស់ តែយោងលើក្បាច់ចម្លាក់នៅតាមផ្ដែរ និងសសរពេជ្រ អ្នកស្រាវជ្រាវផ្នែកបុរាណវិទ្យាមួយចំនួនបានប៉ាន់ស្មានថា ប្រហែលជាសំណង់នាពាក់កណ្ដាលសតវត្សរ៍ទី១០ នៃគ.ស (រចនាបថ ប្រែរូប) ហើយក៏អាចជាប្រាសាទសម្រាប់ឧទ្ទិសដល់ព្រហ្មញ្ញសាសនា។
ប្រាសាទនេះមានប្រាង្គ៣ សង់តំរៀបគ្នាលើខឿនតែមួយ បែរទៅទិសខាងកើត។ ចំណែកអគារមួយ ដែលស្ថិតនៅជ្រុងអាគ្នេយ៍ ជាទូទៅអ្នកសិក្សាបុរាណវិទ្យាតែងហៅថា «បណ្ណាល័យ»។ លើសពីនេះ ទោះបីស៊ុមទ្វារនៃរោងទង ដែលកប់ដីស្ទើរជិតអស់ទៅហើយក្ដី តែបើធៀបរវាងជញ្ជាំងខាងក្រៅ ឃើញថារោងទងដែលសង់ព័ទ្ធជុំវិញប្រាសាទនេះ មានទទឹងប្រហែលមួយម៉ែត្រ។
ស្ថាបត្យកម្មនៃសំណង់របស់ប្រាសាទថ្នល់ដាច់ មានលក្ខណៈពិសេសជាងប្រាសាទអំពីឥដ្ឋផ្សេងៗទៀត គឺមានប្រាង្គ៣ សង់តភ្ជាប់គ្នាដោយជញ្ជាំងឥដ្ឋ ព្រមទាំងលម្អដោយបង្អួចដែលមានរន្ធខ្យល់រាងច័ក្កច័ន។ ផ្នែកខាងក្រោយ (ទិសខាងលិច) នៃប្រាង្គកណ្ដាលមានមណ្ឌបលយចេញទៅខាងក្រៅបន្តិច តែបិទភ្ជិតដោយទ្វារបញ្ឆោត។
រីឯ ជើងទៀនដែលលម្អតាមបង្អួចនៃ«បណ្ណាល័យ» និងបង្អួចបញ្ឆោតនៃរោងទង មានលក្ខណៈជ្រុងៗ និងមានក្បាច់លម្អ។ តាមការសង្កេត ទេវស្ថានមួយនេះ ក៏ទំនងជាសង់ពុំទាន់ចប់សព្វគ្រប់ ព្រោះស៊ុមទ្វារខ្លះ នៅពុំទាន់មានការសម្អាតរួចរាល់។ ចំណែកគ្រឿងបង្គំផ្សេងៗទៀត ដូចជា ផ្ដែរ សសរពេជ្រ ស៊ុមទ្វារ ក៏នៅតែប្រើប្រាស់ថ្មភក់ដូចសំណង់នៅទីដទៃ៕
Tag:
ប្រាសាទថ្នល់ដាច់
បុរាណស្ថាន
© រក្សាសិទ្ធិដោយ thmeythmey.com