យោងតាមរបាយការណ៍ពីក្រសួងសុខាភិបាល ប្រជាពលចំនួន ១,៥៣០,៥០១នាក់ ចាក់វ៉ាក់សាំង ស៊ីណូហ្វាម។ រីឯប្រជាពលរដ្ឋចំនួន ១៦៥,៦០៨ នាក់ចាក់វ៉ាក់សាំងរបស់ក្រុមហ៊ុន Covishield របស់ក្រុមហ៊ុន Astra Zineca។ ជាមួយគ្នានេះដែរ មានប្រជាពលរដ្ឋចំនួន ២,៧៧៣,៥៥២ នាក់ចាក់វ៉ាក់សាំង របស់ក្រុមហ៊ុនស៊ីណូវ៉ាក់។ 
 

យុទ្ធនាការចាក់វ៉ាក់សាំងបង្ការជំងឺកូវីដ-១៩ នៅកម្ពុជា បានចាប់ផ្ដើមពីថ្ងៃទី១០ ខែកុម្ភៈ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។ បច្ចុប្បន្ន យុទ្ធនាការនេះ កំពុងអនុវត្តក្នុងរាជ-ធានីខេត្ត ដូចជា រាជធានីភ្នំពេញ, ខេត្តកណ្តាល, ព្រះសីហនុ , កោះកុង, តាកែវ, កំពង់ស្ពឺ, ស្វាយរៀង, កំពង់ចាម, ត្បូងឃ្មុំ, កំពង់ឆ្នាំង, ពោធិ៍សាត់ និងខេត្តបន្ទាយមានជ័យ។

 

បើតាមការប្រកាសរបស់ សម្តេច នាយករដ្ឋមន្ត្រីហ៊ុន សែន នៅថ្ងៃទី១ កក្កដា បានឱ្យដឹងថា នៅសប្តាហ៍ក្រោយនេះ កម្ពុជានឹងទទួលបានវ៉ាក់សាំងបង្ការជំងឺកូវិដ-១៩ ចំនួន ៥លានដូសបន្ថែមទៀត។ តាមនាយករដ្ឋមន្ត្រី វ៉ាក់សាំងបង្ការជំងឺកូវីដ-១៩ ចំនួន១លានដុល្លារ របស់ក្រុមហ៊ុនស៊ីណូហ្វាម នឹងមកដល់នៅថ្ងៃទី៦កក្កដា ខណៈវ៉ាក់សាំង៤លានដូសទៀត នឹងមកដល់នៅថ្ងៃទី១០កក្កដា ក្នុងនោះមាន៣លានដូស ជាវ៉ាក់សាំងរបស់ក្រុមហ៊ុនស៊ីណូវ៉ាក់ និង១លានដូស ជាវ៉ាក់សាំងរបស់ក្រុមហ៊ុន ស៊ីណូហ្វាម។

 

បច្ចុប្បន្នកម្ពុជា មានវ៉ាក់សាំងបង្ការជំងឺកូវីដ-១៩ សម្រាប់ចាក់ជូនពលរដ្ឋ ចំនួន ១១,០២៤,០០០ដូស ក្នុងនោះវ៉ាក់សាំងកូវីដ-១៩របស់ស៊ីណូវ៉ាក់ ៧,៥លានដូស, ស៊ីណូហ្វាម៣,២លានដូស និងវ៉ាក់សាំងកូវីដ-១៩ ប្រភេទ Covishield របស់ក្រុមហ៊ុន Astra Zineca ចំនួន៣២៤,០០០ដូស៕