COVID-19
អន្តរជាតិ
តើអ្នកជំងឺកូវីដ-១៩ អាចទទួលការវះកាត់ដោយសុវត្ថិភាពឬទេ?
× ប្រសិនបើអ្នកមានជំងឺដែលត្រូវការការវះកាត់ ប៉ុន្តែក៏បានឆ្លងជំងឺកូវីដ-១៩ នោះអ្នកគួរតែពន្យារពេលវះកាត់ទៅ ៧សប្តាហ៍ក្រោយ គិតចាប់ពីថ្ងៃដែលអ្នកបានឆ្លងជំងឺកូវីដ-១៩ ដើម្បីសុវត្ថិភាព។ នេះបើតាមការសិក្សាដែលចេញផ្សាយលើទំព័រសុខភាព Yale Medicine នៅថ្ងៃទី៩ ខែមិថុនា។
ជំងឹកូវីដ-១៩ បានបង្កផលប៉ះពាល់យ៉ាងខ្លាំងដល់សុខភាពមនុស្សក្នុងរយៈពេលវែង ហើយវាក៏អាចបង្កហានិភ័យដល់អាយុជីវិត ប្រសិនបើអ្នកជំងឺទទួលការវះកាត់ ក្នុងពេលមិនត្រឹមត្រូវ។ ការសិក្សាជាច្រើន បានបង្ហាញថា អ្នកជំងឺកូវីដ-១៩ មានហានិភ័យខ្ពស់ក្នុងការបាត់បង់ជីវិតក្រោយការវះកាត់ ដែលធ្វើក្នុងអំឡុងពេល៦សប្តាហ៍បន្ទាប់ពីឆ្លងជំងឺ។
ការសិក្សាមួយ បានលើកឡើងថា ក្រុមអ្នកស្រាវជ្រាវមួយចំនួន បានសង្កេតលើអ្នកជំងឺកូវីដ-១៩ចំនួន ៥៤៧០នាក់ និងអ្នកអវិជ្ជមានជំងឺកូវីដ-១៩ ចំនួន៥៤៧០នាក់ ដោយអ្នកទាំងនោះ ត្រូវទទួលការវះកាត់ដូចគ្នា។ ជាលទ្ធផល វាបង្ហាញថាចំនួនអ្នកជំងឺកូវីដ-១៩ ដែលទទួលការវះកាត់ក្នុងអំឡុងពេល៦សប្តាហ៍ បានបាត់បង់ជីវិតច្រើនជាងទ្វេដង បើធៀបនឹងអ្នកគ្មានផ្ទុកជំងឺកូវីដ-១៩ ដែលទទួលការវះកាត់ដែរនោះ។
អាស្រ័យហេតុនេះ មន្ទីរពេទ្យ Yale New Heaven ក៏បានអនុវត្តគោលការណ៍ថ្មី ដោយស្នើឱ្យអ្នកជំងឺកូវីដ-១៩ ដែលត្រូវវះកាត់ ពន្យារពេលយ៉ាងហោចណាស់៧សប្តាហ៍រាប់ចាប់ពីដឹងថាខ្លួនឆ្លងជំងឺនេះ។ លើសពីនេះទៀត បើការវះកាត់មិនមានតម្រូវការបន្ទាន់ទេនោះ អ្នកជំងឺគួរតែត្រូវពន្យារពេលវះកាត់ពី៨ទៅ១០សប្តាហ៍ បន្ទាប់ពីដឹងថាឆ្លងជំងឹកូវីដ-១៩ ដើម្បីកាត់បន្ថយហានិភ័យនៃការស្លាប់។ ជាការល្អបំផុតនោះ អ្នកជំងឺគួរតែចាំរហូតដល់ជាសះស្បើយពីជំងឺកូវីដ-១៩ មុននឹងវះកាត់បើសិនជាអាចធ្វើបាន។
ជាការពិត គ្មានការវះកាត់ណាដែលគ្មានហានិភ័យនោះទេ ប៉ុន្តែវាចាំបាច់ត្រូវថ្លឹងថ្លែងរវាងហានិភ័យធៀបនឹងអត្ថប្រយោជន៍នៃការវះកាត់។ ជាក់ស្តែងដូចជាទំនាក់ទំនងរវាងជំងឺកូវីដ-១៩ ជាមួយនឹងការវះកាត់នេះដែរ។ បើសិនជាជំងឺមិនត្រូវការការវះកាត់បន្ទាន់ទេនោះ គ្រូពេទ្យត្រូវតែពន្យារពេលដើម្បីសុវត្ថិភាពអ្នកជំងឺ។
ការពន្យារពេលនេះក៏អាស្រ័យទៅលើស្ថានភាពជំងឹដែរ ថាតើអ្នកជំងឺមានសភាពធ្ងន់ធ្ងរកម្រិតណា តើវាចាំបាច់វះកាត់បន្ទាន់ឬទេ ហើយការវះកាត់បន្ទាន់នឹងអាចជួយអ្នកជំងឺឱ្យបានលទ្ធផលល្អជាងការពន្យារពេលដែរឬយ៉ាងណា។ ដូចនេះ អ្នកចាំបាច់ត្រូវទៅពិគ្រោះជាមួយគ្រូពេទ្យជំនាញ ប្រសិនបើអ្នកជួបបញ្ហាដូចដែលបានរៀបរាប់ខាងលើ៕
© រក្សាសិទ្ធិដោយ thmeythmey.com