លោក សូត វ៉ាន់ឌឿនជាអ្នកសម្រប់សម្រួល និងស្រាវជ្រាវសត្វព្រៃ នៃអង្គការ WCS បានបញ្ជាក់ប្រាប់សារព័ត៌មានថ្មីៗ២៥ថា ក្រុមការងាររបស់លោក បានប្រទះឃើញសម្បុកសត្វត្រយងយក្សថ្មីមួយសម្បុកដោយចៃដន្យ នៅភូមិស្រែអណ្ដោល ឃុំស្រែឈូក ស្រុកកែវសីមា ខេត្តមណ្ឌលគិរីខណៈក្រុមការងារ កំពុងធ្វើដំណើរក្នុងព្រៃយកម៉ាស៊ីនថតសត្វស្វ័យប្រវត្តិ ទៅដំឡើងក្នុងតំបន់ខាងលើ។

«សត្វនេះមានមិនច្រើនទេក្នុងមួយឆ្នាំៗ ក្រុមការងារអាចរកឃើញសម្បុកពងកូនរបស់វាចន្លោះពី១ ទៅ៣សម្បុកប៉ុណ្ណោះ។
 

មួយសម្បុក មានកូនតែពីរ។ ជាក់ស្ដែង ចាប់ពីឆ្នាំ២០១៧ដល់២០២០យើងប្រទះឃើញមានសម្បុកថ្មីចំនួន៧សម្បុក ក្នុងនោះញាស់ជោគជ័យបានត្រឹមតែ ៤សម្បុក។ រីឯបីសម្បុកត្រូវបរាជ័យ ដោយមានអ្វីរំខានវា នៅពេលកំពុងក្រាបពង ហើយក៏ផ្អើលហើរចោលសម្បុក»។ នេះជាការពន្យល់របស់លោក វ៉ាន់ឌឿន។

 

លោក វ៉ាន់ឌឿន បន្តថា កាប្រទះឃើញសម្បុកថ្មីរបស់សត្វត្រយងយក្សនេះ គឺជាដំណឹងរីករាយប៉ុន្ដែក៏ក្លាយជាក្តីព្រួយបារម្ភ សម្រាប់ក្រុមអ្នកស្រាវជ្រាវដោយកន្លងមកក្រុមការងារធ្លាប់បរាជ័យ ក្នុងការងារអភិរក្ស។  សត្វប្រភេទនេះមានលក្ខណៈពិសេស គឺភាពប្រុងប្រយ័ត្នខ្ពស់ ខុសពីសត្វដទៃ។ដូច្នេះ វាងាយផ្អើលហើរចោលសម្បុក ក្នុងពេលពងកូន។


សម្បុកថ្មី២០២១ រូបភាពដោយ WCS
 

តំបន់ខាងលើនៅមានបទល្មើសព្រៃឈើខុសច្បាប់។ នេះក៏ជាបញ្ហា ដែលអ្នកអភិរក្សកំពុងព្រួយបារម្ភ។អ្នកស្រាវជ្រាវរូបនេះ បញ្ជាក់ដូច្នេះ៖ «ខ្ញុំឃើញវា នៅចម្ងាយប្រហែលជាង១០០ម៉ែត្រ។ ខ្ញុំត្រូវលូនប្រយ័ត្នបំផុត ដើម្បីអាចអង្កេត និងថតរូប។ ចុះទម្រាំមានវត្តមាន អ្នកចូលព្រៃដើរទៅមករំខានវាទៀត? នេះហើយជាក្តីព្រួយបារម្ភរបស់យើង»។
 

សត្វត្រយងយក្ស រស់នៅតែក្នុងតំបន់​ព្រៃរបោះតែប៉ុណ្ណោះព្រោះនៅតំបន់នេះ មានទាំងវាលស្មៅ វាលស្រែ និងប្រភពទឹក។ នៅរយៈពេលជាង៥ឆ្នាំមកនេះ សត្វស្លាបកម្រប្រភេទនេះមានមិនដល់១០ក្បាលទេ នៅក្នុងដែនអភិរក្សខាងលើ។
 

«ខ្ញុំសុំឱ្យពលរដ្ឋចូលរួមឱ្យតម្លៃសត្វព្រៃ តាមរយៈការដែលមិនបរិភោគ មិនសម្លាប់ មិនកាប់បំផ្លាញព្រៃ ជាជម្រករបស់វាក្នុងន័យដើម្បីសង្គ្រោះជីវិតសត្វព្រៃទាំងនោះ។ នៅពេលវាបាត់បង់ហើយពិតជាមិនកើតឡើងវិញទេ»។នេះជាសំណូមពររបស់អ្នកស្រាវជាវសត្វព្រៃរូបនេះ។
 

ត្រយងយក្ស ជាភាសាបច្ចេកទេស Giant Ibis ​គឺជាប្រភេទសត្វកម្រជិតផុតពូជលើពិភពលោក ហើយវាត្រូវបានដាក់ជានិមិត្តរូបសត្វបក្សីជាតិរបស់កម្ពុជា។ រដូវពងកូនសត្វត្រយងយក្ស ចាប់ផ្ដើមពីខែមិថុនា រហូតដល់ខែតុលា ជារៀងរាល់ឆ្នាំ៕