បក្ស UMNO បានបើកកិច្ចប្រជុំបន្ទាន់មួយតាមប្រព័ន្ធវីដេអូក្នុងយប់ថ្ងៃទី៧ ខែកក្កដា ហើយប្រធានបក្ស លោក Ahmad Zahid បានរិះគន់យ៉ាងខ្លាំងលើការគ្រប់គ្រង និងទប់ស្កាត់កូវីដ-១៩ របស់នាយករដ្ឋមន្រ្តី មូហ៊ីឌីន យ៉ាស៊ីន ។ 

 

បើតាមការអះអាងរបស់លោក Ahmad Zahid បក្ស UMNO គាំទ្រលោក មូហ៊ីឌីន ជានាយករដ្ឋមន្រ្តីកាលពីខែមីនា ឆ្នាំ២០២០ កន្លងទៅ ដោយសារតែរឿងពីរមានដូចជា ធានាក្តីប្រាថ្នារបស់ប្រជាជន និងគ្រប់គ្រងបញ្ហាសេដ្ឋកិច្ច និងដាក់ចេញផែនការទប់ស្កាត់កូវីដ-១៩ ឱ្យបានល្អ។  

 

ថ្លែងនៅចំពោះមុខសមាជិកបក្ស លោក Ahmad Zahid បានបន្តថា យ៉ាងណាមិញ ប្រមុខរដ្ឋាភិបាលម៉ាឡេស៊ី មិនអាចដោះស្រាយបញ្ហាទាំងនោះបានឡើយ ហើយថែមទាំងបរាជ័យលើចំណុចចំនួន ៧ថែមទៀតដូចជា មិនអាចគ្រប់គ្រងជំងឺឆ្លងសកល, ប្រើប្រាស់ការដាក់ប្រទេសក្នុងស្ថានភាពអាសន្ន ដើម្បីបម្រើផលប្រយោជន៍នយោបាយ និងបរាជ័យក្នុងការការពារលទ្ធិប្រជាធិបតេយ្យបែបសភានិយម។ នេះបើតាមការចុះផ្សាយរបស់ទូរទស្សន៍ Channel News Asia។

 

«បក្ស UMNO ជំរុញឱ្យលោកមូហ៊ីឌីន ចុះចេញពីដំណែង ដើម្បីជ្រើសនាយករដ្ឋមន្រ្តីថ្មី សម្រាប់រយៈកំណត់មួយ»។ លោក Ahmad Zahid បានសង្កត់ធ្ងន់បែបនេះ ដោយបន្ថែមថា នាយករដ្ឋមន្រ្តីថ្មី ត្រូវផ្តោតលើសុខុមាលភាពប្រជាជន, ទប់ស្កាត់កូវីដ-១៩ និងធានាពីការពន្លឿនលើកម្មវិធីចាក់វ៉ាក់សាំងបង្ការជំងឺកូវីដ-១៩។ លើសពីនេះ នៅពេលភាពស៊ាំសហគមន៍កើតឡើង នាយករដ្ឋមន្រ្តីថ្មីនេះ ត្រូវផ្តល់ប្រឹក្សាទៅមហាក្សត្រ ដើម្បីរៀបចំការបោះឆ្នោតជាសកលលើកទី ១៥។ 

 

ដោយថ្លែងច្បាស់ៗ បក្សUMNO បានប្រកាសថា បក្សនឹងមិនគាំទ្រ លោក អាន់វ៉ា អ៊ីប្រាហ៊ីម មេដឹកនាំបក្សប្រឆាំងជានាយករដ្ឋមន្រ្តី និងសម្ពន្ធនយោបាយផ្សេងទៀតឡើយ។ 

 

គួររំលឹកថា ការប្រកាសរបស់បក្សអង្គការបង្រួបបង្រួមជាតិម៉ាឡេបែបនេះ ធ្វើឡើងបន្ទាប់ពី លោក មូហ៊ីឌីន បានផ្លាស់ប្តូរសមាជិករដ្ឋាភិបាល នៅថ្ងៃទី៧ ខែមិថុនា។ ក្នុងការផ្លាស់ប្តូរនោះ ប្រមុខរដ្ឋាភិបាលម៉ាឡេស៊ី បានដំឡើងលោក Ismail Sabri Yaakob ទេសរដ្ឋមន្ត្រីការពារជាតិ ទៅជាឧបនាយករដ្ឋមន្រ្តី និងលោក Hishammuddin Hussein រដ្ឋមន្រ្តីការបរទេស ទៅជាទេសរដ្ឋមន្ត្រី។ អ្នកទាំងពីរ ជាសមាជិកបក្ស UMNO តែគាំទ្រលោក យ៉ាស៊ីន រហូតមក៕