នាពេលថ្មីៗនេះ ក្រសួងការបរទេសចិន បានប្រកាសពីការត្រលប់មកវិញរបស់ជនជាតិចិន រួមទាំងអ្នកជំងឺកូវីដ-១៩ ផង ពីអាហ្វហ្កានីស្ថាន មកចិនវិញ។ ប៉ុន្តែការត្រលប់មកមាតុប្រទេសវិញនេះ មិនត្រូវបានក្រសួងការបរទេសចិន បញ្ជាក់ពីមូលហេតុឡើយ។ 

ជនជាតិចិន ដែលត្រូវបានជម្លៀសជាចេញពីអាហ្វហ្កានីស្ថានមានចំនួន ២១០នាក់ ដោយមនុស្ស ២២នាក់ ក្រោយមក ត្រូវបានប្រកាសថាឆ្លងជំងឺកូវីដ-១៩។ 
 

នៅថ្ងៃទី៧ ខែកក្កដា នាយកដ្ឋានកិច្ចការកុងស៊ុលចិន បានជូនដំណឹងនៅក្នុងបណ្តាញសង្គមថា ដើម្បីធានាសុវត្ថិភាពជនជាតិចិន រដ្ឋាភិបាលអំពាវនាវឱ្យជនជាតិចិនចាកចេញពីអាហ្វហ្កានីស្ថានឱ្យបានឆាប់ និងផ្តល់ជំនួយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 
 

ការជម្លៀសប្រជាជនចិនចេញពីអាហ្វហ្កានីស្ថាន ធ្វើឡើងស្របពេលប្រធានាធិបតីអាមេរិក បានប្រកាសដកទ័ពឱ្យអស់ត្រឹមខែសីហា ពោលគឺប្រមាណ ១១ថ្ងៃ មុនខួបក្រុមអាល់កៃដា វាយប្រហារមជ្ឈមណ្ឌលពាណិជ្ជកម្មពិភពលោក (WTC) និងមន្ទីរបញ្ចកោណអាមេរិក។ 
 

គួររំលឹកថា ជិតរយៈពេល ២០ឆ្នាំហើយ ដែលអាមេរិក បានបញ្ជូនទ័ពទៅអាហ្វហ្កានីស្ថាន បន្ទាប់ពីព្រឹត្តិការណ៍ថ្ងៃទី១១ ខែកញ្ញា ដើម្បីវាយប្រហារលើក្រុមភេរវករ៕