របាយការណ៍នាំចេញកសិផលរបស់ក្រសួងកសិកម្ម រុក្ខាប្រមាញ់និងនេសាទ ឆមាសទី១ ឆ្នាំ២០២១ បានបង្ហាញថា កម្ពុជា បាននាំចេញកសិផលសរុបជាង ៤លានតោន ទៅកាន់ទៅកាន់ទីផ្សារអន្តរជាតិ ដែលកើនឡើងជាង ៨៤ភាគរយ ប្រៀបនឹងរយៈពេលដូចគ្នា ឆ្នាំ២០២០។

 

របាយការណ៍ដដែល បង្ហាញពីតួលេខនៃនាំចេញកសិផលសំខាន់ៗ ទាំងនោះសុទ្ធតែកើនឡើង ប្រៀបនឹងរយៈពេលដូចគ្នាទៅនឹងឆ្នាំមុន។ ក្នុងនោះ កម្ពុជា បាននាំចេញចំណិតដំឡូងមីក្រៀម ១លានតោន,គ្រាប់ស្វាយចន្ទី ជាង៨៤ម៉ឺនតោន,ផ្លែចេកស្រស់ ជាង២៣ម៉ឺនតោន,ផ្លែស្វាយស្រស់ ជិត១៦ម៉ឺនតោន,គ្រាប់ពោត ១៤ម៉ឺនតោន និងម្រេច ប្រមាណ១,៤ម៉ឺនតោន។

 

ការនាំចេញកសិផលកើនឡើង ជាសញ្ញាវិជ្ជមានមួយសម្រាប់កសិករខ្មែរ អំឡុងវិបត្តិកូវីដ-១៩។ អ្នកជំនាញក្នុងវិស័យកសិកម្ម យល់ថា ទីផ្សារពិភពលោក មានតម្រូវការខ្ពស់។ លោក ស្រី វុទ្ធី អ្នកនាំពាក្យក្រសួងកសិកម្ម រុក្ខាប្រមាញ់ បានបញ្ជាប់យ៉ាងខ្លីដូច្នេះ៖«ការនាំចេញកសិផលកើន ព្រោះតម្រូវការកើនឡើង»។

 

ជាមួយគ្នានេះ លោក គង់ ភាជ ប្រធាននាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់និងនេសាទ បង្ហាញការសាទរ ចំពោះកម្ពុជា ដែលអាចនាំចេញកសិផលជាច្រើនមុខ ទៅកាន់ទីផ្សារអន្តរជាតិ ទោះស្ថិតក្នុងស្ថានភាពលំបាក នៃការរាលដាលនៃជំងឺកូវីដ-១៩។

លោក គង់ ភាជ បានលើកឡើងបែបនេះ៖«យើងទទួលស្គាល់ថា វិបត្តិកូវីដ-១៩ ធ្វើឱ្យផលិតកម្មកសិកម្ម មួយចំនួនពិបាកក្នុងការរកទីផ្សារ។ តែសម្រាប់ដំណាំសក្កដានុពលមួយចំមួយ ដូចជា ដំឡូងមី ស្វាយ ម្រេច នៅតែអាចនាំចេញ»។ 

 

អ្នកជំនាញក្នុងវិស័យកសិកម្ម សុទ្ធតែយល់ថា អំឡុងវិបត្តិកូវីដ-១៩ ធ្វើឱ្យទីផ្សារពិភពលោកមានតម្រូវខ្ពស់ ទើបកម្ពុជា មានឱកាសនាំចេញកសិផលកើនឡើង ក្នុងបរិបទនេះ។ លោក ងួន ឡាយ ប្រធានសមាគមម្រេចកំពត យល់ថា ទីផ្សារកសិកម្មឆ្នាំនេះ ហាក់មានភាពប្រសើរជាងរាល់ឆ្នាំ បើទោះស្ថិត ក្នុងបរិបទកូវីដ-១៩។ លោក ងួន ឡាយ បានប្រាប់សារព័ត៌មានថ្មីៗ២៥ថា សន្ទុះនៃការនាំចេញកើនឡើង ព្រោះទីផ្សារពិភពលោកឆ្នាំនេះ ល្អប្រសើរ។

 

លោកបានរៀបរាប់បែបនេះ៖«វាមិនមែនមកពីការកើនឡើងផ្ទៃដីដាំដុះ ឬការប្រែប្រួលផលិតភាពដាំដុះនោះទេ។ វាអាស្រ័យលើស្ថានភាពពិភពលោកជាក់ស្ដែង។ សូម្បីម្រេចកំពត ឆ្នាំនេះក៏មានទីផ្សារប្រសើរជាងរាល់ឆ្នាំដែរ»។

 

ដោយឡែក ការប្រមូលផលម្រេចកំពត ឆ្នាំនេះ មិនទាន់បញ្ចប់ទាំងស្រុងនោះទេ។ ប្រធានសមាគ មិនកំណត់បានទេថា ក្នុងឆមាសទី១ ឆ្នាំ២០២១នេះ ម្រេចកំពតមានបរិមាណប៉ុន្មាន ដែលបាននាំចេញ។ ជាមធ្យម ម្រេចកំពត អាចប្រមូលផលបាន ក្នុងរង្វង់៩០តោនក្នុង១ឆ្នាំ ហើយការនាំចេញអាចបាន៧០តោន ក្នុងមួយឆ្នាំ។ ដោយឡែក ម្រេចស មានតម្លៃ ចន្លោះ ២៦-២៨ដុល្លារ ក្នុងមួយគីឡូក្រាម។ កម្រេចក្រហម មានតម្លៃ ចាប់ពី ២៥-២៦ដុល្លារ ក្នុងមួយគីឡូក្រាម។ រីឯ ម្រេចខ្មៅវិញ មានតម្លៃ ពី១៥-១៦ដុល្លារ ក្នុងមួយគីឡូក្រាម។

 

ថ្វីបើការប្រមូលផលម្រេចមិនទាន់ចប់ តែប្រធានសមាគមម្រេចកំពត អះអាងថា ទីផ្សារម្រេចកំពតឆ្នាំនេះ មានសន្ទុះប្រសើរជាងឆ្នាំមុនៗ។ លោកបានអះអាងដូច្នេះ៖«ឆ្នាំនេះការប្រមូលផលយឺតជាងឆ្នាំមុនមែន តែសន្ទុះនៃទីផ្សារម្រេចឆ្នាំនេះ ល្អជាងរាល់ឆ្នាំ។ ព្រោះយើងមានកុងត្រាជាមួយក្រុមហ៊ុនច្រើន»។

 

បើតាមរបាយការណ៍នាំចេញកសិផល របស់ក្រសួងកសិកម្ម រុក្ខាប្រមាញ់ និងនេសាទ ឆមាសទី១ ឆ្នាំ២០២១ កម្ពុជា បាននាំចេញកសិផលសរុប ប្រមាណ ៤លានតោន គិតជាទឹកប្រាក់ ជាង ២ពាន់លានដុល្លារ៕