សម្ដេច ហ៊ុន សែន បានលើកឡើងថា នៅក្នុងវិបត្តិកូវីដ-១៩នេះ ស្រ្តី និងក្មេង ជាក្រុមដែលងាយរងគ្រោះ ហើយកំពុងមានហានិភ័យខ្ពស់ក្នុងជីវភាពរស់នៅប្រចាំថ្ងៃ ដែលងាយធ្លាក់ចូលក្នុងភាពក្រីក្រ។ ជាមួយគ្នានេះ រដ្ឋាភិបាលនៅតែបន្តឧបត្ថម្ភ មូលធនថវិកា «សាច់ប្រាក់ពលកម្ម»ចំពោះកម្មការិនីមានផ្ទៃពោះ និងគ្រួសារដែលមានជីវភាពក្រីក្រ ដើម្បីជួយដល់កម្មករនិយោជិតដែលព្យួរការងារអំឡុងពេលរោងចក្រ បានផ្អាកដំណើរការ។
 

លើសពីនេះ រដ្ឋាភិបាលក៏បានបង្កើតកម្មវិធីជំនួយសង្គមមួយទៀត គឺកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលកូវីដ-១៩ ដែលដំណើរការកាលពីថ្ងៃទី១២ មិថុនា។ 
 

«រដ្ឋាភិបាល និងពិនិត្យលទ្ធភាពគ្របដណ្ដប់១០០ភាគរយ ចំពោះអ្នកមានប័ណ្ណក្រីក្រ តាមរយៈមូលនិធិសមធម៌សុខភាព និងគ្របដណ្ដប់លើកម្មករផ្នែកសេដ្ឋកិច្ចក្នុងប្រព័ន្ធ តាមគម្រោងរ៉ាប់រងធានាសុខភាពមន្រ្តីរាជការស៊ីវិលនៃ ប.ស.ស»។ នេះជាការបញ្ជាក់របស់សម្ដេច ហ៊ុន សែន។ 

គួរជម្រាបថា កន្លងមក រដ្ឋាភិបាល បានចំណាយថវិកា៣៥០ លានដុល្លារហើយ សម្រាប់ឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ អំឡុងវិបត្តិកូវីដ-១៩៕