Robben សម្រេចចូលនិវត្តិន៍ពីកីឡាករបាល់ទាត់ម្តងមកហើយនៅឆ្នាំ ២០១៩ ពោលគឺបន្ទាប់ពីកិច្ចសន្យារបស់គេជាមួយ Bayern Munich ត្រូវបញ្ចប់។ ប៉ុន្តែ៣ឆ្នាំក្រោយ Robben ប្រកាសចូលនិវត្តន៍ជាថ្មីនៅវ័យ៣៧ឆ្នាំ។
 

«ខ្ញុំបានសម្រេចចិត្តបញ្ចប់អាជីពបាល់ទាត់ដ៏សកម្មរបស់ខ្ញុំ។ នេះជាជម្រើសដ៏លំបាកបំផុត។ ខ្ញុំសូមអរគុណអ្នកទាំងអស់គ្នាសម្រាប់ការគាំទ្រដ៏ស្មោះស្ម័គ្រ»។ Robben សរសេរសារបែបនេះនៅលើបណ្តាញសង្គម Twitter របស់ខ្លួន។
 

Beste voetbalvrienden,

Ik heb besloten om te stoppen met mijn actieve voetbalcarrière. Een heel moeilijke keuze. Ik wil iedereen bedanken voor alle hartverwarmende steun!

Groetjes, Arjen pic.twitter.com/aAEdxdL5tU

— Arjen Robben (@ArjenRobben) July 15, 2021

 

អតីតខ្សែប្រយុទ្ធឆ្នើម Chelsea និង Real Madrid រូបគេបានវិលត្រឡប់ពីការព្យូរស្បែកជើងរបស់ខ្លួននៅឆ្នាំ២០២០ ដោយទៅចូលរួមជាមួយ FC Groningen នៃលីគកំពូលហូឡង់រដូវកាលមុន។ យ៉ាងណាក៏ដោយ ការរងរបួស និងរោគរាតត្បាតកូវីដ-១៩ បានធ្វើឱ្យ Robben ប្រកាសបញ្ចប់អាជីពលើទីលានជាលើកទីពីរនៅថ្ងៃទី១៥ ខែកក្កដា ឆ្នាំ២០២១។
 

Robben ប្រកបអាជីពនេះរយៈពេលពីរទសវត្សរ៍ ដោយក្នុងនោះ FC Groningen ជាក្រុមដំបួងដែលគេលេងឲ្យ ហើយក៏ជាក្រុមចុងក្រោយផងដែរ។ ក្រុមបន្តបន្ទាប់រួមមាន PSV Eindhoven, Chelsea, Real Madrid និង Bayern Munich។
 

អតីតសមាជិកក្រុមជម្រើសជាតិហូឡង់រូបនេះ ធ្លាប់ឈ្នះពានរង្វាន់ Premier League ២ ដង, League Cup ២ ដងនិង FA Cup ជាមួយ Chelsea។ Robben ជួយ Bayern Munich ឈ្នះជើងឯក Bundesliga រហូតដល់ទៅ៨លើក រួមទាំង Champions League ១លើកផង និងធ្លាប់ឈ្នះ Li Liga ជាមួយ Real Madrid ម្តងដែរ។
 

សម្រាប់ជម្រើសជាតិហូឡង់ Robben បង្ហាញខ្លួនបាន៩៦លើក ដោយស៊ុតបញ្ចូលទីបាន៣៧គ្រាប់ ក្នុងនោះជួយក្រុមរហស្សនាមទឹកក្រូចទទួលបានចំណាត់ថ្នាក់ទី២នៃពានរង្វាន់ World Cup ឆ្នាំ២០១០ នៅអាហ្វ្រិកខាងត្បូងក្រោយចាញ់អេស្ប៉ាញនៅវគ្គផ្តាច់ព្រ័ត្រ៕