គម្រោងប្រមូលកាក់សំណង់ថ្មពិល ត្រូវបានអនុវត្តដោយក្រសួងបរិស្ថាន ក្នុងទិសដៅផ្សព្វផ្សាយពីផលប៉ះពាល់ដល់សុខភាព និងចូលរួមជួយដល់បរិស្ថាន។ លោក នេត្រ ភក្ដ្រា អ្នកនាំពាក្យក្រសួងបរិស្ថាន បានប្រាប់ Thmey Thmey25 ថា ការរៀបចំដាក់ធុងប្រមូលកាក់សំណល់ថ្មពិល  គឺដើម្បីគ្រប់គ្រងសំណល់ដែលសម្បូរដោយសារធាតុគិមី និងកាត់បន្ថយការបោះចាលដោយពាសវាលពាសកាល ឬការចោលដោយលាយលំជាមួយសំណល់ផ្ទះ ដែលបង្កគ្រោះថ្នាក់ដល់សុខភាព និងបរិស្ថានធ្ងន់ធ្ងរ។


 រូបភាពដោយ ក្រសួងបរិស្ថាន 

អ្នកនាំពាក្យរូបនេះ លើកឡើងបែបនេះ៖ «ការមូលនូវសំណល់ថ្មពិលទាំងនោះ ក្រុមអ្នកជំនាញនៃក្រសួងបរិស្ថាន នឹងយកទៅរក្សាទុកនៅទីចាក់សំរាមតាមតំបន់ដែលបានរៀបចំ ដើម្បីសិក្សាពីបច្ចេកទេសក្នុងការគ្រប់គ្រងដោយសុវត្តិភាព និងទាញយកផលប្រយោជន៍ពីសំណល់ទាំងនោះមកប្រើវិញ»។
 

នាពេលថ្មីៗនេះ ក្រសួងបរិស្ថាន បានដាក់ធុងសំណល់ថ្មពិលចំនួន១២ នៅតាមនៅតាមទីតាំងបុរី ផ្សារទំនើប ស្ថានីយប្រេងឥន្ធនៈ រួមមាន ជីបម៉ុង នរោម៉ល, មណ្ឌល ជីប ម៉ុងបាក់ទូក, បុរីប៉េង ហួត បឹងស្នោរ និងស្ថានីយប្រេងឥន្ធនៈភីធីធីវត្តនាគវ័ន, បូកគោ, ផ្សារតូច, និងបឹងស្នោរ។ ជាមួយគ្នានេះ ក្រសួង នឹងបន្តដាក់បន្ថែមចំនួន១០ធុងទៀតនៅតាមផ្សារ និងទីសាធារណៈនៅក្នុងរាជធានីភ្នំពេញ។
 

ទីក្រុងភ្នំពេញ គឺជាចំណុចផ្ដើមនៃការផ្សព្វផ្សាយ និងគ្រប់គ្រងសំណល់ថ្មពិលដំបូងរបស់ក្រសួងបរិស្ថាន ។ «បន្ទាប់ពីអនុវត្តក្នុងរាជធានីភ្នំពេញ ក្រសួងពង្រីកទៅតាមខេត្តបីទៀត រួមមានសៀមរាប បាត់ដំបង  និងក្រុងព្រះសីហនុ»។ នេះជាការបញ្ជាក់របស់លោក នេត្រ ភក្ដ្រា។
 

បើតាមក្រសួងបរិស្ថាន ការទុកដាក់ ឬបោះចោលសំណល់ថ្មពិល មិនបានត្រឹមត្រូវនឹងបង្កឱ្យមានការសាយភាយសារគ្រោះថ្នាក់ចូលទៅក្នុងបរិស្ថាន និងបង្កផលប៉ះពាល់ធ្ងន់ធ្ងរដល់សុខភាពមនុស្ស។ លើសពីនេះ បង្កឱ្យខូចតម្រងនោម, ធ្វើឱ្យថយចុះសារធាតុចិញ្ចឹមក្នុងឆ្អឹង, បង្កឱ្យខូចប្រព័ន្ធប្រសាទ ខូចចលនាសាច់ដុំ បាត់បង់ការចងចាំ, បង្កឱ្យកើតជំងឺមហារីក ខូចប្រព័ន្ធភាពស៊ាំ បំផ្លាញកោសិកា, បង្កការរលូតគភ៌ ធ្វើឱ្យទារកកើតមិនមានភាពប្រក្រតី,បង្កវិរូបកាយទារកដែលទើបកកើតក្នុងផ្ទៃ ឬទារកក្នុងផ្ទៃជាដើម។
 

ក្រសួងសួង អំពាវនាវឱ្យពលរដ្ឋគ្រប់ជួយចូលរួមគ្រប់គ្រងសំណល់ថ្មពិល ដែលបានប្រើប្រាស់ទុកតាមទីតាំងក្រសួងបានរៀបចំ ដើម្បីជួយកាត់បន្ថយគ្រោះថ្នាក់ដល់សុខភាព និងផលប៉ះពាល់ដល់បរិស្ថាននៅកម្ពុជា៕