នាយកដ្ឋានគ្រប់គ្រងជំងឺឆ្លងថៃ (CDC) បានប្រកាសថា ក្រុមគ្រូពេទ្យជួរមុខ ដែលត្រូវប្រយុទ្ធជាមួយជំងឺកូវីដ-១៩ នឹងត្រូវទទួលវ៉ាក់សាំងបង្ការជំងឺកូវីដ-១៩ ដូសទី៣ ដើម្បីទប់ស្កាត់ហានិភ័យនៃការស្លាប់ដោយសារជំងឺកូវីដ-១៩ និងជំងឺឆ្លង។

 

យោធាចិន បានបណ្តេញនាវាអាមេរិកចេញពីដែនទឹករបស់ខ្លួននៅក្នុងសមុទ្រចិនខាងត្បូង។ ការបណ្តេណនាវាអាមេរិកនេះ ធ្វើឡើងចំពេលខួប ៥ឆ្នាំ នៃសាលក្រមរបស់តុលាការមជ្ឈត្តការអចិន្ត្រៃយ៍ក្រុងឡាអេ។

 

 

ជប៉ុន នឹងបរិច្ចាគវ៉ាក់សាំងបង្ការជំងឺ-១៩ ចំនួន ១លានដូសបន្ថែមដល់តៃវ៉ាន់ ដើម្បីជួយទប់ស្កាត់ការរីកសាយជំងឺឆ្លង។ ស្របគ្នានេះ ជប៉ុនក៏បានបរិច្ឆាគវ៉ាក់សាំងចំនួន ១១លានដូស ទៅបណ្តាប្រទេសផ្សេងនៅក្នុងតំបន់អាស៊ីផងដែរ។

 

អង្គការសុខភាពពិភពលោក (WHO) បានបញ្ជាក់ថា កូរ៉េខាងជើង បានធ្វើតេស្តរកជំងឺកូវីដ-១៩ លើមនុស្សប្រមាណ ៣៥០០០នាក់ ប៉ុន្តែមិនបានរកឃើញករណីឆ្លងឡើយ។

 

 

ប្រមុខការទូតអាមេរិក លោក អាន់តូនី ប្ល៊ីងខិន បង្ហាញការព្រួយបារម្ភយ៉ាងខ្លាំងពីវិបត្តិនយោបាយនៅមីយ៉ាន់ម៉ា និងទទូចឱ្យអាស៊ាន  ចាត់វិធានការជាបន្ទាន់ ដើម្បីបញ្ចប់អំពើហិង្សា និងស្ដារលទ្ធិប្រជាធិបតេយ្យនៅមីយ៉ាន់ម៉ាឡើងវិញ។

 

អតីតអនុប្រធានាធិបតីអាមេរិក លោក មៃ ផេន បានព្រមានថា ចិនកំពុងអភិវឌ្ឍខ្លួនទៅជា «អាណាចក្របិសាច» និងបង្កការគំរាមខ្លាំងដល់អាមេរិក ជាសហភាពសូវៀតនៅក្នុងសម័យសង្រ្គាមត្រជាក់ថែមទៀត។ 

 

 

ថៃ សម្រេចបើកកោះទេសចរណ៍ចំនួនបីទៀតដើម្បីទទួលភ្ញៀវចាក់វ៉ាក់សាំងបង្ការជំងឺកូវីដ-១៩ រួចរាល់នៅថ្ងៃទី១៥ ខែកក្កដា បើទោះជាករណីឆ្លងក្នុងប្រទេសនៅតែធ្ងន់ធ្ងរក្ដី។ ការបើកតំបន់ទេសចរណ៍ស្វាគមន៍អ្នកដំណើរឡើងវិញ ជាការស្ដារឡើងវិញវិស័យទេសចរណ៍ដែលជាប្រភពចំណូលដ៏សំខាន់របស់រដ្ឋអាស៊ីអាគ្នេយន៍នេះ។

 

បណ្តាប្រទេសក្រក្រីដែលងាយរងគ្រោះបំផុតពីផលប៉ះពាល់នៃការឡើងកម្តៅផែនដី បានអំពាវនាវឱ្យប្រទេសអ្នកមានគោរពតាមការសន្យាក្នុងការប្រយុទ្ធប្រឆាំងបម្រែបម្រួលអាកាសធាតុ និងផ្តល់លុយឱ្យពួកគេដើម្បីដោះស្រាយវិបត្តិសាកលមួយនេះ។

 

 

ហ្វីលីពីន បានរកឃើញករណីឆ្លងវីរុសបង្កជាជំងឺកូវីដ-១៩ ទម្រង់ «ដែលតា» លើកដំបូងនៅក្នុងស្រុកលើកដំបូង។ 

 

ចិន ដែលប្រទេសបញ្ចេញឧស្ម័នកាបូនទៅក្នុងបរិយាកាសធំបំផុតលើពិភពលោក បានប្រកាសប្រើប្រាស់ប្រព័ន្ធជួញដូរកាបូននៅថ្ងៃទី១៦ ខែកក្កដា។ ប្រព័ន្ធជួញដូរកាបូននេះ នឹងក្លាយជាឧបករណ៍សំខាន់មួយក្នុងយុទ្ធសាស្ដ្ររបស់ចិនលើការកាត់បន្ថយការបំភាយឧស្ម័នកាបូន និងការសម្រេចផែនការអព្យាក្រឹត្យកាបូននៅឆ្នាំ២០៦០។

 

 

រដ្ឋាភិបាលវៀតណាម បានសម្រេចចេញវិធានការរឹតត្បិតការធ្វើដំណើរក្នុងខេត្តចំនួន១៦នៅភាគខាងត្បូងប្រទេសដើម្បីទប់ស្កាត់ជំងឺកូវីដ-១៩ ដែលកំពុងរាលដាលខ្លាំង។ ក្រុងហូជីមិញ ក្លាយជាចំណុចកណ្ដាលនៃរលកវាយប្រហារវាយដ៏អាក្រក់របស់ជំងឺផ្លូវដង្ហើមមួយនេះ បន្ទាប់វៀតណាមអាចគ្រប់ស្ថានការណ៍បានមួយរយៈមក៕