ជាតិ
វេទិកាទេសចរណ៍អាស៊ានឆ្នាំ២០២២ នឹងធ្វើឡើងនៅខេត្តព្រះសីហនុ លោក ថោង ខុន រដ្ឋមន្ត្រីក្រសួងទេសចរណ៍។ រូបភាពពី ទំព័រហ្វេសប៊ុក ក្រសួងទេសចរណ៍។
×
ដោយ៖ ស៊ុល រ៉វី
ភ្នំពេញ៖ លោក ថោង ខុន រដ្ឋមន្ត្រីក្រសួងទេសចរណ៍ សម្រេចយកទីក្រុងព្រះសីហនុ ខេត្តព្រះសីហនុ ធ្វើជាទីតាំងរៀបចំវេទិកាទេសចរណ៍អាស៊ានលើកទី៤០ នៅឆ្នាំ២០២២ (ASEAN Tourism Frorum 2022) ក្រោយអាកខាននៅឆ្នាំ២០២១នេះ ដោយសារវិបត្តិកូវីដ-១៩។ នេះបើតាមការចេញផ្សាយរបស់ក្រសួងទេសចរណ៍។
លោក ថោង ខុន បានបញ្ជាក់ថា បានជាក្រសួងទេសចរណ៍ សម្រេចយកក្រុងព្រះសីហនុ ធ្វើជាកន្លែងប្រារព្ធវេទិកាASEAN Tourism Forum 2022 នាពេលមុខនេះ គឺដោយសារខេត្តព្រះសីហនុ មានការអភិវឌ្ឍហេដ្ឋារចនាសម្ព័ន្ធនិងសម្បទាទេសចរណ៍ល្អ ដែលសម្រួលការដល់ធ្វើដំណើររបស់គណៈប្រតិភូ និងភ្ញៀវទេសចរនានា។ សម្រាប់វេទិកានេះ គឺមានការចូលរួមកិច្ចប្រជុំថ្នាក់មន្ត្រីជាន់ខ្ពស់(NTOs) ថ្នាក់រដ្ឋមន្ត្រីកិច្ចប្រជុំអាស៊ានបូក(បូកបី ឥណ្ឌា រុស្ស៊ី) ជាមួយដៃគូអាស៊ានដទៃទៀត។ បើតាមប្រសាសន៍របស់លោក ថោង ខុន។
ជុំវិញការរៀបចំព្រឹត្តិការណ៍ខាងលើនេះ លោក គួច ចំរើន អភិបាលខេត្តព្រះសីហនុ ក៏បានបង្ហាញពីសេក្ដីរីករាយ និងការគាំទ្រផដែរ។ ក្រសួងទេសចរណ៍បានស្រង់សម្តីរបស់លោក គួច ចំរើន យកមកចុះផ្សាយ កាលពីថ្ងៃទី១៧កក្កដា ឆ្នាំ២០២១ ដូច្នេះ៖ «រដ្ឋបាលខេត្តរីករាយក្នុងការគាំទ្រយ៉ាងពេញទំហឹង និងសហការរៀបចំព្រឹត្តិការណ៍ជាតិដ៏សំខាន់នេះ ដោយធានាថា គ្មានការនាំជំងឺកូវីដ-១៩ចូល ហើយគ្មានការឆ្លងពីអ្នកក្នុងស្រុកដល់គណៈប្រតិភូ»។
ដើម្បីធានាមិនឱ្យមានការចម្លងជំងឺកូវីដ-១៩នៅក្នុងវេទិកា ASEAN Tourism Forum 2022 លោក ថោង ខុន នឹងបង្កើតគណៈកម្មាការរៀបចំស្តង់ដាប្រតិបត្តិសម្រាប់វេទិកានេះ នាពេលឆាប់ៗ ខណៈក្រុមការងារអន្តរស្ថាប័ន កំពុងសិក្សាវាយតម្លៃរៀបចំវេទិកានេះ ដើម្បីផ្ដល់បដិសណ្ឋារកិច្ចដល់ភ្ញៀវ។ ជាពិសេសគឺដើម្បី គ្រប់គ្រងហានិភ័យនៃការឆ្លងកូវីដ-១៩, គ្រប់គ្រងព័ត៌មានពីការធ្វើដំណើរ និងការស្នាក់នៅរបស់ប្រតិភូ, ការត្រៀមរៀបចំបុគ្គលិកបម្រើការ និងមន្ត្រី ក្នុងការធានាបានថាមានសុវត្ថិភាព គុណភាព អនាម័យ និងការទុកចិត្តពីគណៈប្រតិភូ ពីបុគ្គលិកបម្រើការងារ រួមទាំងពលរដ្ឋ។
តាមរយៈរៀបចំវេទិកាទេសចរណ៍អាស៊ាននេះ លោក ថោង ខុន រំពឹងថា នឹងទាក់ទាញទេសចរបរទេសមកកាន់ខេត្តព្រះសីហនុ ក្រោយជំងឺកូវីដ-១៩ធូរស្រាល ខណៈមានក្រុមហ៊ុនទេសចរណ៍ក្នុងស្រុក កំពុង ពង្រីកដៃគូធុរកិច្ចរបស់ខ្លួន។ លោករដ្ឋមន្ត្រីក្រសួងទេសចរណ៍រូបនេះ បានបញ្ជាក់ថាព្រឹត្តិការណ៍វេទិកាទេសចរណ៍អាស៊ាន ឆ្នា២០២២ គឺត្រូវបានរាជរដ្ឋាភិបាលសម្រេចរៀបចំចាប់ពីថ្ងៃទី១៦ ដល់ថ្ងៃទី២២ ខែមករា ឆ្នាំ២០២២ ក្នុងក្រុងព្រះសីហនុ៕
Tag:
ThmeyThmey25
ASEAN Tourism Frorum 2022
ព្រះសីហនុ
© រក្សាសិទ្ធិដោយ thmeythmey.com