បើតាម អ្នកស្រី យក់ សម្បត្តិ កម្ពុជាបានបញ្ជាទិញវ៉ាក់សាំងប្រភេទ Sinovac ចំនួន៥លានដូស សម្រាប់ចាក់ដល់កុមារកម្ពុជា ដោយវ៉ាក់សាំងចំនួន៣លានដូស នឹងដឹកមកកម្ពុជានៅក្នុងខែសីហា និង២លានទៀត នឹងមកដល់នាខែកញ្ញា។ ដោយឡែក វ៉ាក់សាំង Johnson & Johnson ចំនួន១លានដូស កម្ពុជា ទទួលបាតាមរយៈយន្តការ Covax ។ អ្នកស្រី យក់ សម្បត្តិ រៀបរាប់ដូច្នេះ ៖«ខែ៨ (សីហា) នេះ មានវ៉ាក់សាំង Sinovac ៣លាន ខែ៩ (កញ្ញា) មាន២លានទៀត។ ដូច្នេះ យើងត្រៀមវ៉ាក់សាង៥លានពីក្រុមហ៊ុនស៊ីណូវ៉ាក់ ដើម្បីចាក់ជូនក្មេងៗ ហើយយើងនឹងមាន Johnson & Johnson ទៀត ដែលនឹងមកប្រហែលជា១លានដូសដែរ»។

 

យ៉ាងណាក៏ដោយ រដ្ឋលេខាធិការក្រសួងសុខាភិបាល មិនទាន់ដឹងច្បាស់ថា វ៉ាក់សាំង Johnson & Johnson នឹងត្រូវដឹកមកដល់កម្ពុជានៅពេលណានៅឡើយ។ 

 

សូមរំឭកថា ប្រមុខរដ្ឋាភិបាលកម្ពុជា បានប្រកាសពីផែនការចាក់វ៉ាក់សាំងបង្ការជំងឺកូវីដ-១៩ ដល់កុមារ និងយុវជនកម្ពុជាជាង១លាន៩សែននាក់។ ទាក់ទងនឹងការចាប់ផ្តើមយុទ្ធនាការចាក់វ៉ាក់សាំងដល់កុមារ រដ្ឋលេខាធិការក្រសួងសុខាភិបាល អះអាងថា គណៈកម្មការចំពោះកិច្ចទទួលបន្ទុកចាក់វ៉ាក់សាំងកូវីដ-១៩ កំពុងរៀបចំផែនការនេះ។

 

 

 

បច្ចុប្បន្ន កម្ពុជាមានវ៉ាក់សាំងបង្ការកូវីដ-៩ សរុប ១៧,០២៤,០០០ដូស សម្រាប់ចាក់ជូនប្រជាពលរដ្ឋ ក្នុងនោះវ៉ាក់សាំង Sinopharm មាន៦,២លានដូស, វ៉ាក់សាំងរបស់ក្រុមហ៊ុន ស៊ីណូវ៉ាក់មាន ១០,៥លានដូស និងវ៉ាក់សាំង CoviShield របស់ក្រុមហ៊ុន AstraZeneca មានចំនួន ៣២៤,០០០ដូស។  

 

គិតត្រឹមថ្ងៃទី២១កក្កដា កម្ពុជាបានចាក់វ៉ាក់សាំងបង្ការជំងឺកូវីដ-១៩ ដល់ប្រជាពលរដ្ឋដែលមានដែលអាយុចាប់ពី១៨ឆ្នាំឡើង ចំនួន៦,៣៣៤,៣៧៨លាននាក់ហើយ ដែលស្មើនឹង អត្រា៦៣,៣៤ភាគរយ នៃផែនការសរុប១០លាននាក់៕