COVID-19
ជាតិ
សង្គមជាតិ
រដ្ឋមន្ត្រីសុខាភិបាល ក្រើនរំលឹកឧស្សហកម្មចំណីអាហារឲ្យពង្រឹងអនាម័យ និងសុវត្ថិភាព
×
ភ្នំពេញ៖ ក្រសួងសុខាភិបាល បានក្រើនរំលឹកដល់ឧស្សាហកម្ម និងអាជីវកម្មផ្គត់ផ្គង់ចំណីអាហារផ្សេងៗ ត្រូវយកចិត្តទុកដាក់ខ្ពស់លើការពង្រឹងអនាម័យ និងសុវត្ថិភាពចំពោះប្រភេទអាហារកក ឬអាហារវេចខ្ចប់។ ការក្រើនរំលឹកបែបនេះ គឺដើម្បីបញ្ចៀសការឆ្លងជំងឺកូវីដ-១៩ ដែលមាននៅលើចំណីអាហារទៅមនុស្ស។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានពន្យល់ដោយយោងតាមការសិក្សា និងការស្រាវជ្រាវថ្មីរបស់អ្នកជំនាញផ្នែកសុខភាពថា វីរុសកូវីដ-១៩ អាចរស់រាន និងទំនៅលើវត្ថុ ឬផ្ទៃផ្សេងៗ រហូតដល់៧២ម៉ោង ក្នុងនោះប៉ាស្ទិក និងដែកអ៊ីណុកស្ពាន់ គឺវីរុសអាចទុំបាន៤ម៉ោង និងលើក្រដាសកាតុងធ្វើកេស ២៤ម៉ោង។
លោករដ្ឋមន្ត្រីក្រសួងសុខាភិបាលបានលើកឡើងថា តំណក់ទឹកតូចៗដែលចេញពីការក្អក និងកណ្តាស់របស់អ្នកជំងឺកូវីដ-១៩ ដែលមិនមានអនាម័យត្រឹមត្រូវ វានឹងធ្លាក់ទៅលើវត្ថុ និងផ្ទៃដែលប្រលាក់ផ្សេងៗ ហើយនៅពេលមនុស្សទៅប៉ះវត្ថុនោះ ដោយយកដៃទៅប៉ះច្រមុះ មាត់ ឬភ្នែកនោះ វីរុសនឹងចម្លងទៅមនុស្សភ្លាម។
ដោយមើលឃើញ និងបារម្ភពីបញ្ហានេះ លោក ម៉ម ប៊ុនហេង បានណែនាំដល់ម្ចាស់ទីតាំងផលិតផ្គត់ផ្គង់ និងលក់បន្លែ ផ្លែឈើ ចំណីអាហារកក និងម្ហូបអាហារជាដើម គឺត្រូវតែរក្សាអនាម័យ និងធានាសុវត្ថិភាពលើការវេចខ្ចប់ និងការដឹកជញ្ជូនចំណីអាហារផ្សេងៗ។
«ឧស្សាហកម្មចំណីអាហារត្រូវមានលក្ខខណ្ឌមូលដ្ឋាន និងសកម្មភាពចំបាច់ ដើម្បីរក្សាអនាម័យបរិស្ថានកែច្នៃអាហារ ដោយធានាបាននូវការអនុវត្តអនាម័យល្អ ការសម្អាត ការដាក់តំបន់កែច្នៃ ការត្រួតពិនិត្យអ្នកផ្គត់ផ្គង់ ការស្តុកទុក ការចែកចាយ និងការដឹកជញ្ជូនប្រកបដោយអនាម័យត្រឹមត្រូវ ព្រមទាំងអនាម័យបុគ្គលិក និងកាយសម្បទា ដើម្បីធ្វើការងារប្រកបដោយសុវត្ថិភាព»។ នេះជាការរៀបរាប់របស់លោករដ្ឋមន្ត្រីក្រសួងសុខាភិបាល។
ជាមួយគ្នានេះ លោក ម៉ម ប៊ុនហេង បានណែនាំដល់ពលរដ្ឋនៅពេលទៅទិញចំណីអាហារ និងអាហារកកផ្សេងៗទៅតាមទីផ្សារ គឺត្រូវតែបាញ់ថ្នាំសម្លាប់មេរោគលើវត្ថុ និងសម្អាតដៃឲ្យបានត្រឹមត្រូវ ដើម្បីចៀសពីការឆ្លងជំងឺកូវីដ-១៩។ លើសពីនេះរដ្ឋមន្ត្រីក្រសួងសុខាភិបាល បានណែនាំឲ្យពលរដ្ឋទុកដាក់ចំណីអាហារឆៅ និងឆ្អិនឲ្យនៅដាច់ដោយឡែកពីគ្នា និងកុំរក្សាទុកចំណីអាហារច្រើនថ្ងៃពេក៕
Tag:
ចំណីអាហារ
ជំងឺកូវីដ-១៩
© រក្សាសិទ្ធិដោយ thmeythmey.com