COVID-19
ជាតិ
បិទខ្ទប់ខេត្តកោះកុង ពោធិ៍សាត់ បាត់ដំបង ប៉ៃលិន សៀមរាប បន្ទាយមានជ័យ ឧត្តរមានជ័យ និងព្រះវិហារ
× ភ្នំពេញ៖ រដ្ឋាភិបាលសម្រេចបិទខ្ទប់ខេត្តចំនួន៨ រយៈពេល១៤ថ្ងៃ ចាប់ពីម៉ោង១១ និង៥៩នាទីយប់ ថ្ងៃទី២៩ កក្កដា ដល់ថ្ងៃទី១២ សីហា ដើម្បីទប់ស្កាត់ការឆ្លងរាលដាលក្នុងសហគមន៍ នៃមេរោគកូវីដ-១៩ ប្រភេទដែលតា (Delta)។ ខេត្តទាំង៨នោះ រួមមានខេត្តកោះកុង ពោធិ៍សាត់ បាត់ដំបង ប៉ៃលិន សៀមរាប បន្ទាយមានជ័យ ឧត្តរមានជ័យ និងព្រះវិហារ។ នេះបើតាមសេចក្តីសម្រេចរបស់សម្ដេចនាយករដ្ឋមន្រ្តី ហ៊ុន សែន នៅយប់ថ្ងៃទី២៨ កក្កដានេះ។
សម្ដេច ហ៊ុន សែន បានបញ្ជាក់ក្នុងសេចក្តីសម្រចថា ភូមិសាស្ត្រដែលត្រូវបានបិទខ្ទប់ទាំងនេះ អាចត្រូវបានបែងចែកជា«តំបន់ក្រហម» និង/ឬ«តំបន់លឿងទុំ» និង/ឬ«តំបន់លឿង» អាស្រ័យតាមកម្រិតនៃការឆ្លងរាលដាលជំងឺកូវីដ-១៩ នៅក្នុងភូមិសាស្ត្របិទខ្ទប់នីមួយៗ។
«ការកំណត់ភូមិសាស្ត្រណាមួយក្នុងតំបន់បិទខ្ទប់ជាតំបន់ក្រហម» និង/ឬ«តំបន់លឿងទុំ» និង/ឬ«តំបន់លឿង» ត្រូវធ្វើឡើងដោយសេចក្តីសម្រេចរបស់អភិបាលនៃគណៈអភិបាលខេត្ត នៃខេត្តដែលត្រូវបានបិទខ្ទប់»។ នេះបើតាមសេចក្តីសម្រេចរបស់ប្រមុខរដ្ឋាភិបាល។
តំបន់ក្រហម សំដៅលើភូមិសាស្ត្រដែលមានការឆ្លងរាលដាលធ្ងន់ធ្ងរនៃជំងឺកូវីដ-១៩ ក្នុងសហគមន៍។ ចំណែកតំបន់លឿងទុំ សំដៅលើភូមិសាស្ត្រដែលមានការឆ្លងរាលដាលកម្រិតមធ្យមនៃជំងឺកូវីដ-១៩ ក្នុងសហគមន៍។ រីឯតំបន់លឿង សំដៅលើភូមិសាស្ត្រដែលមានការឆ្លងរាលដាលកម្រិតស្រាលនៃជំងឺកូវីដ-១៩ ក្នុងសហគមន៍។
ចំពោះខេត្តដែលត្រូវបិទខ្ទប់នេះ គឺអាចដាក់ចេញវិធានការហាមឃាត់ ឬរឹតត្បិតជាអាទិ៍ ទាក់ទងនឹងការធ្វើដំណើរក្នុងភូមិសាស្ត្របិទខ្ទប់ ឬការចេញ-ចូលឆ្លងកាត់ព្រំប្រទល់ភូមិសាស្ត្រខេត្តបិទខ្ទប់។ មិនតែប៉ុណ្ណោះអភិបាលខេត្ត ក៏អាចហាមឃាត់ការជួបជុំ ឬការប្រមូលផ្ដុំមនុស្ស សកម្មភាពការងារ មុខរបរ ឬអាជីវកម្ម និងចេញបម្រាមគោចរ ស្របតាមអនុក្រឹត្យស្តីពីវិធានការរដ្ឋបាលដើម្បីទប់ស្កាត់ការឆ្លងរាលដាលជំងឺកូវីដ-១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេង ចុះថ្ងៃទី៣១ មីនា ២០២១ រួមទាំងសេចក្តីណែនាំស្តីពីការពង្រឹងការអនុវត្តវិធានការចាំបាច់ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ចុះថ្ងៃទី៤ ឧសភា ២០២១។ នេះបើតាមសម្ដេច ហ៊ុន សែន។
បន្ថែមពីនេះសម្ដេច ហ៊ុន សែន ក៏ប្រាប់ឱ្យអភិបាលខេត្តទាំង៧ ដែលត្រូវបិទនេះ អាចប្រើប្រាស់នូវវិធានការលម្អិត ដែលធ្លាប់ត្រូវបានប្រើប្រាស់ក្នុងសេចក្តីសម្រេចរបស់រដ្ឋាភិបាល ស្តីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅខេត្តកណ្ដាល ចុះថ្ងៃទី២៦ មេសាកន្លងមកដែរ។
«សកម្មភាពផ្នែកប្រតិបត្តិការពាក់ព័ន្ធនឹងវិស័យអាកាសចរណ៍ស៊ីវិល នៅក្នុងតំបន់បិទខ្ទប់ ត្រូវបានអនុញ្ញាតឱ្យដំណើរការជាធម្មតា ដោយរួមទាំងការធ្វើដំណើរពាក់ព័ន្ធនឹងវិស័យនេះ»។ នេះជាការបញ្ជាក់របសា់លោកនាយករដ្ឋមន្ត្រី ដែលបានប្រាប់ឱ្យអភិបាលខេត្តបិទខ្ទប់ សហការជាមួយអភិបាលខេត្តជាប់ព្រំប្រទល់គ្នា ដើម្បីគ្រប់គ្រងការចេញ-ចូលទៅវិញទៅមក និងទប់ស្កាត់ការឆ្លងជំងឺកូវីដ-១៩។
ជាមួយគ្នានេះសម្ដេច ហ៊ុន សែន ក៏បញ្ជាឱ្យក្រសួងកាបរទេស ទាក់ទងទៅអាជ្ញាធរថៃ ដើម្បីបិទព្រំដែនជាបណ្ឌោះអាសន្ន សម្រាប់អ្នកធ្វើដំណើរចេញ-ចូល លើកលែងតែករណីដឹកជញ្ជូនទំនិញ និងករណីពិសេសដែលមានការអនុញ្ញាតដោយអាជ្ញាធរមានសមត្ថកិច្ចជាអាទិ៍ ករណីសង្គ្រោះបន្ទាន់ជាដើម។
លើសពីនេះទៀត ក្រសួងការបរទេស និងក្រសួងការងារកម្ពុជា ត្រូវសហការគ្នាផ្សព្វផ្សាយពីវិធានការបិទខ្ទប់ សម្រាប់បណ្ដាខេត្តជាប់ព្រំដែនប្រទេសថៃ ព្រមទាំងសម្រសម្រួលជាមួយអាជ្ញាធរថៃ ដើម្បីឱ្យគេជួយគាំពារពលករខ្មែរនៅថៃ និងសម្រួលឱ្យពួកគេត្រឡប់មកមាតុភូមិវិញ ឬពន្យាពេលនៃការវិលត្រឡប់មកវិញ រហូតដល់ការបិទខ្ទប់ត្រូវបានបញ្ចប់។ នេះជាការបន្ថែមប្រមុខរដ្ឋាភិបាល៕
© រក្សាសិទ្ធិដោយ thmeythmey.com