COVID-19
ជាតិ
កម្ពុជាមានវ៉ាក់សាំងប្រមាណ២០លានដូសហើយ ក្នុងនោះមាន Johnson & Johnson ជាង១លានដូស វ៉ាក់សាំងបង្ការជំងឺកូវីដ-១៩ Johnson & Johnson ចំនួនជិត៦១ម៉ឺនដូសទៀត ដែលជាជំនួយជំហានទីពីររបស់អាមេរិក បានមកដល់កម្ពុជា នាយប់ថ្ងៃទី២សីហា ឆ្នាំ២០២១។
× ភ្នំពេញ៖ វ៉ាក់សាំងបង្ការជំងឺកូវីដ-១៩ Johnson & Johnson ចំនួនជាង១លានដូស ដែលរដ្ឋាភិបាលអាមេរិកសន្យាផ្តល់ឱ្យកម្ពុជានោះ គឺបានមកដល់កម្ពុជាអស់ហើយ ដោយគិតត្រឹមថ្ងៃទី២សីហានេះ។
វ៉ាក់សាំងបង្ការជំងឺកូវីដ-១៩ Johnson & Johnson ចំនួន៦០៩,៦០០ដូសទៀត ត្រូវបានដឹកមកដល់កម្ពុជា នាយប់ថ្ងៃទី២សីហា។ ចំនួនវ៉ាក់សាំងនេះ គឺជាជំហានទី២នៃជំនួយរបស់រដ្ឋាភិបាលអាមេរិក សរុប១,០៦០,១០០ដូស ដែលផ្តល់ឱ្យកម្ពុជា។ នេះបើយោងតាមការចុះផ្សាយរបស់សម្តេច ហ៊ុន សែន នៅលើទំព័រហ្វេសប៊ុក ដោយបានបញ្ជាក់ថា៖ « អំណោយនេះ គឺជាផ្នែកមួយនៃការគាំទ្រជាបន្តបន្ទាប់របស់សហរដ្ឋអាមេរិក ចំពោះប្រជាពលរដ្ឋកម្ពុជា និងនៅក្នុងតំបន់ ក្នុងពេលកំពុងតែប្រឹងងើបចេញពីជំងឺរាតត្បាតយ៉ាងធ្ងន់ធ្ងរនេះ»។
សូមរម្លឹកថា វ៉ាក់សាំងបង្ការជំងឺកូវីដ-១៩ Johnson & Johnson ជំហានទី១ចំនួនជិត៥០ម៉ឺនដូសនោះ កម្ពុជាទទួលបានពីអាមេរិក កាលពីថ្ងៃទី៣០កក្កដា ឆ្នាំ២០២១។ វ៉ាក់សាំងកូវីដ-១៩ ដែលជាជំនួយរបស់អាមេរិកនេះ គឺបានផ្តល់ឱ្យកម្ពុជា តាមរយៈមជ្ឈមណ្ឌលCOVAX។
សម្តេចនាយករដ្ឋមន្ត្រី ហ៊ុន សែន បានបញ្ជាក់ថា វ៉ាក់សាំង Jonhson & Jonhson នឹងត្រូវផ្តល់អាទិភាពចាក់ជូនពលរដ្ឋជនជាតិដើមភាគតិចនៅខេត្តមណ្ឌលគិរី រតនគិរី ព្រះវិហារ និងខេត្តមួយចំនួនទៀតដែលមានជនជាតិដើមភាគតិចរស់នៅ រួមទាំង ពលករខ្មែរ ដែលកំពុងជាប់គាំងនៅប្រទេសថៃ ប្រសិនបើមិនទាន់ហួសសុពលភាព។
បច្ចុបន្ន កម្ពុជាមានវ៉ាក់សាំងបង្ការជំងឺកូវីដ-១៩ ដែលជាជំនួយ និងការបញ្ជាទិញ មានប្រមាណ២០លានដូស។ ក្នុងនោះមាន Johnson & Johnson ជាង១លានដូស, CoviShield មាន៣២៤,០០០ដូស, AstraZeneca មាន៣៣២,០០០ដូស, Sinovac មាន១២,៥លានដូស និងវ៉ាក់សាំងរបស់Sinopharm មាន៦,២លានដូស៕
Tag:
Covid-19
Johnson & Johnson
© រក្សាសិទ្ធិដោយ thmeythmey.com