នៅប្រទេសចិន បានក្លាយជារឿងធម្មតាទៅហើយដែលជនជាតិចិនមួយចំនួនពាក់ស្លាកសញ្ញាដែលមានរូបអ្នកនយោបាយដើម្បីបង្ហាញពីការគោរពស្រឡាញ់។ ប៉ុន្តែទង្វើនេះជាការរំលោភបំពានលើមាត្រា ៥០ នៃធម្មនុញ្ញអូឡាំពិក។ 
 

ជាការបំពានច្បាប់អូឡាំពិក​ ព្រោះអត្តពលិកស្រ្តីចិន Shanju និងដៃគូ Tianshi ពាក់ស្លាកនយោបាយលើសម្លៀកបំពាក់អំឡុងពេលទទួលមេដាយមាសអូឡាំពិករដូវក្តៅឆ្នាំ២០២០ ដែលពួកគេបានឈ្នះពីកីឡាប្រណាំងកង់ក្នុងសាលវិញ្ញាសាគូ។
 

គណៈកម្មាធិការអូឡាំពិកអន្តរជាតិ (IOC) កាលពីខែមុនបានបន្ធូរបន្ថយមាត្រា ៥០ នេះមួយចំនួនដើម្បីអនុញ្ញាតឱ្យមានកាយវិការដូចជាការលុតជង្គង់នៅលើទីលានដែលផ្តល់ឱ្យអត្តពលិកធ្វើដូច្នេះដោយគ្មានការរំខាននិងដោយការគោរពចំពោះដៃគូប្រកួតប្រជែង។
 

ទោះយ៉ាងណា ការបង្ហាញសារ ឬឧបករណ៍ពាក់ព័ន្ធនយោបាយនៅលើវេទិកាកីឡានៅតែត្រូវបានហាមឃាត់។ ជុំវិញករណីរបស់កីឡាការិនីចិន Shanju និង Tianshi ដែលពាក់ស្លាករូបប្រធានម៉ៅនៅលើអាវ ត្រូវបាន IOC ទាក់ទងជាមួយក្រុមការងារកីឡាចិនដើម្បីសុំការពន្យល់បន្ថែម។ នេះបើតាមការផ្សាយរបស់ទីភ្នាក់ងារព័ត៌មាន Reuters។
 

ស្របពេល IOC នៅថ្ងៃទី២ ខែសីហា បានបើកការស៊ើបអង្កេតលើឥរិយាបថរបស់កីឡាការិនីចិនទាំងពីរជុំវិញការបង្ហាញកាយវិការនយោបាននៅក្នុងកីឡា ស្ថានប័នគ្រប់គ្រងអូឡាំពិកពិភពលោកមួយនេះ ក៏កំពុងស៊ើបអង្កេតលើអត្តពលិកអាមេរិក Raven Saunders បន្ទាប់ពីនាងធ្វើដៃជាអក្ស X នៅពេលទទួលមេដាយប្រាក់កីឡាចោលដុំដែកដែរ។

លើកដៃជាអក្សរ X នៅពីលើក្បាលនេះ ត្រូវបាន Saunders បញ្ជាក់ថាជាការបង្ហាញការគាំទ្រដល់អ្នកដែលត្រូវបានគេជិះជាន់។
 

គណៈកម្មាធិការអូឡាំពិកអាមេរិក (USOPC) ក៏អះអាងថាកាយវិការរបស់ Saunders មិនរំលោភលើច្បាប់របស់ខ្លួនឡើយព្រោះនេះ ជាការបញ្ចេញមតិដោយសន្តិវិធីជុំវិញការគាំទ្រយុត្តិធម៌ជាតិសាសន៍ និងសង្គម ខណៈនាងនៅតែគោរពគូប្រជែងរបស់នាង៕