ក្នុងការប្រកួតនៅមជ្ឈមណ្ឌល Tokyo Aquatics Centre កីឡាករជម្រើសជាតិអាមេរិករូបនេះ ត្រូវប្រកួតប្រជែងជាមួយកីឡាករ២៨រូបផ្សេងទៀត ដែលក្នុងនោះមាន Loschiavo Brandon ដែលជាមិត្តរួមក្រុមអាមេរិករបស់ខ្លួនផងដែរ។ អ្នកដែលមានពិន្ទុខ្ពស់ជាងគេ១៨នាក់ ត្រូវបន្តឡើងទៅវគ្គពាក់កណ្តាលផ្តាច់ព្រ័ត្រ ដោយត្រូវចម្រាញ់យកតែ១២នាក់ដើម្បីឈានទៅកាន់ការប្រជែងយកមេដាយ។
Jordan Windle៖ ខ្ញុំមិនមែនតំណាងតែឲ្យអាមេរិកឡើយ ប៉ុន្តែក៏ជាតំណាងសម្រាប់កម្ពុជាផងដែរ
កើតនៅឆ្នាំ១៩៩៨ ក្នុងខេត្តព្រះសីហនុ Jordan បានក្លាយជាក្មេងកំព្រាដែលឪពុកម្តាយបានស្លាប់ចោលតាំងពីអាយុ១ខួប ហើយក្រោយមកត្រូវបានយកទៅដាក់ក្នុងមណ្ឌលកំព្រាមួយក្នុងរាជធានីភ្នំពេញ។ លោក Jerry Windle បានយកកុមាររូបនេះ ទៅចិញ្ចឹមតាំងពីអាយុ១៨ខែមក។
Jordan រស់នៅក្រុង Fort Lauderdale រដ្ឋ Florida ដោយមានលោក Jerry និងលោក Andres Rodriguez ដែលជាដៃគូស្រឡាញ់ភេទដូចគ្នាចិញ្ចឹមបីបាច់ថែរក្សា។ គេចាប់ផ្តើមហាត់កីឡាជ្រមុជទឹក (Diving) តាំងពីអាយុ៧ឆ្នាំ ហើយក៏បានចំណាត់ថ្នាក់ល្អប្រសើរក្នុងការប្រកួតប្រជែងថ្នាក់វិទ្យាល័យ និងថ្នាក់ជាតិនៅសហរដ្ឋអាមេរិកជាច្រើនលើកផងដែរ។
កាលពីឆ្នាំ២០១១ Jordan រួមទាំងលោក Jerry ដែលជាឪពុកចិញ្ចឹម បានចេញផ្សាយសៀវភៅដែលមានចំណងជើងថា «An Orphan No More: The True Story of a Boy»។ សៀវភៅនេះ បានបង្ហាញពីដំណើរជីវិតរបស់ Jordan ផ្ទាល់។
នៅពីឆ្នាំ២០១៦ Jordan បានមកលេងប្រទេសកម្ពុជាជាលើកដំបូង។ តាមសម្តីដែលដកស្រង់ដោយ Olympics.nbcsports.com កីឡាករ Jordan បានអះអាងថា៖ «ខ្ញុំប្រឡូកក្នុងកីឡាជ្រមុជទឹកមិនមែនសម្រាប់តែសហរដ្ឋអាមេរិកនោះឡើយ ប៉ុន្តែក៏សម្រាប់ពលរដ្ឋកម្ពុជា ពោលគឺប្រទេសកំណើតរបស់ខ្ញុំផងដែរ។ ប្រសិនបើខ្ញុំអាចផ្តល់ភាពជាគំរូសម្រាប់កុមារតែម្នាក់នៅកម្ពុជា វាក៏ជាចំណែកមួយនៃការធ្វើឲ្យមានភាពខុសប្លែកផងដែរ»។
ក្នុងបទសម្ភាសជាមួយ VOA កាលពីឆ្នាំ២០១៦ លោក Jerry Windle ដែលជាឪពុកចិញ្ចឹម បានអះអាងថា ជោគជ័យរបស់ Jordan គឺកើតចេញពីទេពកោសល្យពីកំណើតរបស់គេ ដែលផ្សារភ្ជាប់យ៉ាងជិតស្និទ្ធនឹងប្រទេសកំណើត ដោយគេតែងតែព្យាយាមស្វែងយល់ពីវប្បធម៌ និងប្រវត្តិសាស្ត្រកម្ពុជា តាមរយៈការអានសៀវភៅរឿង និងការធ្វើសេចក្តីអត្ថាធិប្បាយក្នុងថ្នាក់រៀន។
Jordan ជាមួយឪពុកចិញ្ចឹមទាំងពីររបស់ខ្លួន គឺលោក Jerry Windle (ស្តាំ) និងលោក Andres Rodriguez។ រូបថត Susanne Brady
Jordan មានគ្រូបង្វឹក និងអ្នកជំនាញជាច្រើនជួយតម្រង់ផ្លូវក្នុងអាជីពកីឡាជ្រមុជទឹក ដែលក្នុងនោះមានដូចជាលោក Tim O’Brien, លោក Evan Linette, លោក Sean McCarthy ជាពិសេសម្ចាស់មេដាយមាសអូឡាំពិកចំនួន៤ លោក Greg Louganis។ គេក៏មានរហស្សនាមថា Little Louganis ផងដែរ៕