ជាតិ
សេដ្ឋកិច្ច
ក្រុមហ៊ុន១០ហើយ ដែលបានចុះបញ្ជីនាំចូលវ៉ាក់សាំងបង្ការកូវីដ-១៩ មកកម្ពុជា លោក លឹម ហេង អនុប្រធានសភាពាណិជ្ជកម្មកម្ពុជា។ រូបថត៖ សភាពាណិជ្ជកម្ម
× ភ្នំពេញ៖ ក្រុមហ៊ុនឯកជនប្រមាណ១០ហើយ ដែលបានចុះបញ្ជីនាំចូលវ៉ាក់សាំងបង្ការជំងឺកូវីដ-១៩ មកកម្ពុជា។ នេះជាការលើកឡើងរបស់លោក លឹម ហេង អនុប្រធានសភាពាណិជ្ជកម្មកម្ពុជា ដោយបានបញ្ជាក់ថា ក្រុមហ៊ុនទាំងនោះ នឹងនាំចូលវ៉ាក់សាំងបង្ការជំងឺកូវីដ-១៩ ជាច្រើនប្រភេទ ដែលមានការទទួលស្គាល់ពីអង្គការសុខភាពពិភពលោក(WHO) ឬទទួលបានការអនុញ្ញាតពីរាជរដ្ឋាភិបាលកម្ពុជា ក្នុងការឱ្យប្រើប្រាស់វ៉ាក់សាំងជាចាំបាច់ ឬបន្ទាន់។
បើតាមលោក លឹម ហេង ក្រុមហ៊ុនទាំងនោះ នាំចូលវ៉ាក់សាំងបង្ការជំងឺកូវីដ-១៩ សម្រាប់ចាក់លើមនុស្ស ចាប់ពីអាយុ១២ឆ្នាំឡើងទៅ។ អនុប្រធានសភាពាណិជ្ជកម្មកម្ពុជារូបនេះ បានប្រាប់សារព័ត៌មានThmeyThmey តាមទូរសព្ទ នាព្រឹកថ្ងៃទី៥សីហា ថា៖«មានក្រុមហ៊ុនមួយចំនួន ដែលបានចុះបញ្ជីរួចហើយហ្នឹង បានបង្ហើបប្រាប់យើងថា វ៉ាក់សាំងនឹងមកដល់, គ្រាន់តែយើងមិនដឹងថ្ងៃបរិច្ឆេទនៅពេលណា ប៉ុន្តែវាមិនយូរទេ!»។
ពាក់ព័ន្ធនឹងការនាំចូលវ៉ាក់សាំងបង្ការកូវីដ-១៩នេះ សភាពាណិជ្ជកម្មកម្ពុជា ក៏បានស្នើទៅក្រសួងសុខាភិបាល ឱ្យកំណត់តម្លៃជាក់លាក់ណាមួយ ក្នុងការចរាចរវ៉ាក់សាំងបង្ការជំងឺកូវីដ-១៩ នៅលើទីផ្សារកម្ពុជា ដើម្បីបញ្ចៀសនូវការដំឡើងថ្លៃហួសហេតុ ជូនដល់ប្រជាពលរដ្ឋ។
លោក លឹម ហេង បានបញ្ជាក់ដូច្នេះ៖ «ក្នុងនាមសភាពាណិជ្ជកម្មកម្ពុជា យើងស្នើសុំឱ្យមានកំណត់តម្លៃពីរដ្ឋ។ ពិតថាយើងស្ថិតនៅក្នុងវិស័យឯកជនមែន ប៉ុន្តែយើងបារម្ភពីប្រជាពលរដ្ឋ ឬអាជីវករដែលកំពុងជួបការខ្វះខាត ក្នុងបរិបទនៃវិបត្តិកូវីដ-១៩នេះ បែរទៅជួបពេទ្យដើម្បីធ្វើតេស្តរកកូវីដ-១៩ ឬចាក់វ៉ាក់សាំងនោះ[...] ពេទ្យក្នុងវិស័យឯកជនហ្នឹង ទាញប្រាក់ពីពលរដ្ឋថ្លៃ ឬច្រើនលើសលុបទៅវិញ»។
កាលពីថ្ងៃទី២៧កក្កដា ឆ្នាំ២០២១ ក្រសួងសុខាភិបាលបានអនុញ្ញាតឱ្យគ្រឹះស្ថានអាហរ័ណ នីហរ័ណឱសថ ដែលទទួលបានការអនុញ្ញាតពីក្រសួងសុខាភិបាល អាចស្នើសុំនាំចូលវ៉ាក់សាំងបង្ការកូវីដ-១៩ ដែលបានការទទួលស្គាល់ដោយអង្គការសុខភាពពិភពលោក។ ការអនុញ្ញាតឱ្យវិស័យឯកជននាំចូល វ៉ាក់សាំងកូវីដ-១៩នេះ គឺដើម្បីចែកចាយចាក់តាមទីកន្លែងផ្តល់សេវាសុខាភិបាលឯកជនស្របច្បាប់ ក្នុងក្របខណ្ឌទូទាំងប្រទេស ដោយមានលក្ខខណ្ឌប្រតិបត្តិឱ្យបានត្រឹមត្រូវ តាមស្តង់ដារបច្ចេកទេសក្នុងការដឹកជញ្ជូន ការថែរក្សា និងការស្តុកវ៉ាក់សាំងកូវីដ-១៩ នៅក្នុងឃ្លាំង ដើម្បីធានាឲ្យបាននូវសុវត្ថិភាព និងប្រសិទ្ធភាពខ្ពស់។
បច្ចុប្បន្ន វ៉ាក់សាំងបង្ការជំងឺកូវីដ-១៩ ដែលមានការទទួលស្គាល់ពីអង្គការសុខភាពពិភពលោកនោះ មាន វ៉ាក់សាំងរបស់ក្រុមហ៊ុន AstraZeneca, វ៉ាក់សាំងSinopharm, វ៉ាក់សាំងSinovac, វ៉ាក់សាំង Pfizer-BioNTech, វ៉ាក់សាំង Johnson & Johnson និងវ៉ាក់សាំង Moderna ជាដើម៕
Tag:
សុខភាព
COVID-19
វ៉ាក់សាំង
© រក្សាសិទ្ធិដោយ thmeythmey.com