ជាតិ
សុខភាព
WHO៖ ការចាក់វ៉ាក់សាំងបង្ការកូវីដ-១៩ ជាយុទ្ធសាស្ត្រដ៏ខ្លាំង តែមិនជាដំណោះស្រាយបញ្ចប់ជំងឺនេះឡើយ លោកស្រី Li Ailan តំណាងអង្គការសុខភាពពិភពលោកប្រចាំកម្ពុជា។ រូបថត៖ AKP
× ភ្នំពេញ៖ ការចាក់វ៉ាក់សាំងបង្ការជំងឺកូវីដ-១៩ គឺជាយុទ្ធសាស្ត្រដ៏ខ្លាំងមួយ ក៏ប៉ុន្តែវាមិនមែនជាដំណោះស្រាយវេទមន្ត ដើម្បីបញ្ចប់ការរាតត្បាតដោយជំងឺនេះឡើយ។ នេះជាការបញ្ជាក់សារជាថ្មីរបស់អង្គការសុខភាពពិភពលោក(WHO) នាយប់ថ្ងៃទី១២សីហា។
«សុទិដ្ឋិនិយមចំពោះវ៉ាក់សាំង» អាចបង្កគ្រោះថ្នាក់។ ក្នុងន័យនេះ អង្គការសុខភាពពិភពលោកបានព្រមាន ថា កាលដែលមនុស្សបានចាក់វ៉ាក់សាំងបង្ការជំងឺកូវីដ-១៩ហើយ មិនមែនន័យថាអ្នកគួរឈប់អនុវត្តវិធានបង្ការផ្សេងៗទៀតឡើយ។ ដូចជា៖ ការពាក់ម៉ាស់នៅទីសាធារណៈ ការរក្សាតម្លាតសុវត្ថិភាព និងចៀសវាងការជួបជុំ ឬប្រមូលផ្តុំមនុស្ស ជាដើម។ នាយប់ថ្ងៃទី១២សីហា ឆ្នាំ២០២១ អង្គការសុខភាពពិភពលោក បានអះអាងសារជាថ្មីថា ការចាក់វ៉ាក់សាំងបង្ការជំងឺកូវីដ-១៩ គឺគ្រាន់ជួយកាត់បន្ថយមិនឱ្យមនុស្សឈឺធ្ងន់ធ្ងរ កាត់បន្ថយការចូលសម្រាកនៅមន្ទីរពេទ្យ និងកាត់បន្ថយការស្លាប់ដោយសារជំងឺនេះ ព្រោះវ៉ាក់សាំងគ្រាន់តែជាឧបករណ៍មួយក្នុងចំណោមឧបករណ៍ដ៏សំខាន់ជាច្រើន ដើម្បីប្រយុទ្ធប្រឆាំងជំងឺកូវីដ-១៩ ប៉ុណ្ណោះ។
សេចក្តីប្រកាសព័ត៌មានរបស់អង្គការសុខភាពពិភពលោក បាននិយាយដូច្នេះ៖ «យើងអាចទប់ស្កាត់ការចម្លងជំងឺកូវីដ-១៩ បាន លុះត្រាតែយើងបន្តអនុវត្តអន្តរាគមន៍សុខភាពសាធារណៈ មិនមែនឱសថចំគោលដៅបានយ៉ាងតឺងរឹង និងប្រកបដោយប្រសិទ្ធភាព គឺគួបផ្សំនឹងការចាក់វ៉ាក់សាំងបង្ការជំងឺកូវីដ-១៩ ផងដែរ»។ អង្គការសុខភាពពិភពលោក បានបន្តថា៖ « រឿងសំខាន់នោះ គឺការអនុវត្តនូវវិធានការទាំងនេះ នឹងអនុញ្ញាតឱ្យបណ្តាអាជីវកម្ម និងវិស័យផ្សេងៗទៀត អាចបើកដំណើរឡើងវិញ ហើយប្រជាពលរដ្ឋអាចប្រកបមុខរបរចិញ្ចឹមជីវិតរបស់ពួកគេឡើងវិញប្រកបដោយសុវត្ថិភាព»។
កិច្ចខិតខំប្រឹងប្រែងរបស់រដ្ឋាភិបាលកម្ពុជា រួមទាំងក្រសួងសុខាភិបាលកន្លងមក ធានានូវការមកដល់នៃការចាក់វ៉ាក់សាំងបង្ការជំងឺកូវីដ-១៩ កាន់តែច្រើន ដើម្បីធានាថា ពលរដ្ឋបានចាក់វ៉ាក់សាំង និងធានាឱ្យមានការគ្របដណ្តប់នៃការចាក់វាក់សាំងគ្រប់គ្រាន់នៅទូទាំងប្រទេស។ ជាពិសេស ក្នុងចំណោមពលរដ្ឋងាយរងគ្រោះ មនុស្សដែលមានហានិភ័យខ្ពស់ និងអ្នកដែលរស់នៅតំបន់ដាច់ស្រយាល។ អង្គការសុខភាពពិភពលោក បានគត់សម្គាល់ឃើញថា បុគ្គលិកសុខាភិបាលរបស់កម្ពុជាប្រមាណ៩៧ភាគរយ បានចាក់វ៉ាក់សាំងបង្ការជំងឺកូវីដ-១៩រួច ហើយមានប្រជាជនវ័យចំណាស់ជាច្រើនទៀត រួមទាំងអ្នកដែលរស់នៅក្នុងភូមិដាច់ស្រយាល ក៏បានទទួលចាក់វ៉ាក់សាំងបង្ការជំងឺនេះ។ ជាមួយនឹងគ្នាកម្ពុជា រដ្ឋាភិបាលក៏ចាប់ផ្តើមយុទ្ធនាការចាក់វ៉ាក់សាំងដល់កុមារ ដែលមានអាយុពី១២ដល់១៧ឆ្នាំ ផងដែរ។
កម្មវិធីផ្តល់វ៉ាក់សាំងបង្ការជំងឺកូវីដ-១៩ សម្រាប់មនុស្សពេញវ័យ និងក្រុមមនុស្សងាយរងគ្រោះដែលមានទ្រង់ទ្រាយធំបែបនេះ គឺទាមទារឱ្យមានការប្រឹងប្រែងរួមយ៉ាងខ្លាំង ជាពិសេសពីប្រមុខរដ្ឋាភិបាលដ៏រឹងមាំ ការចូលរួមយ៉ាងសកម្មភាពពីពលរដ្ឋ និងភាពជាដៃគូដ៏ល្អ។ អង្គការសុខភាពពិភពលោក នៅតែបន្តគាំទ្រផ្នែកយុទ្ធសាស្រ្ត និងបច្ចេកទេសដល់យុទ្ធនាការចាក់វ៉ាក់សាំងរបស់កម្ពុជា តាមរយៈការវិភាគស្ថានភាព ការផ្តល់យោបល់គោលនយោបាយអំពីការផ្តល់អាទិភាព ការធ្វើផែនការ ការអនុវត្ត និងការតាមដានការចាក់វ៉ាក់សាំងជាដើម...។
សេចក្តីប្រកាសព័ត៌មានរបស់អង្គការសុខភាពពិភពលោក បានរៀបរាប់ដូច្នេះ៖« ដោយសារយើងរួមគ្នា យើងបានមកដល់ឆ្ងាយហើយ យើងត្រូវតែបន្តរួបរួមគ្នាទៀត បើមិនដូច្នោះទេ សមិទ្ធិផលដែលយើងទទួលបានយ៉ាងលំបាក នឹងត្រូវបាត់បង់»។ ដើម្បីចៀសវាងនូវការបរាជ័យរបស់រដ្ឋាភិបាលក្នុងការផ្តល់វ៉ាក់សាំងបង្ការជំងឺកូវីដ-១៩ ដល់ប្រជាពលរដ្ឋដែលសម្រេចបានជាង៨០ភាគរយនៃផែនការ អង្គការសុខពិភពលោក បានលើកទឹកចិត្តដល់ពលរដ្ឋគ្រប់រូប ឱ្យបន្តអនុវត្តវិធានការ «៣ការពារ ៣កុំ» ឱ្យបានត្រឹមត្រូវ និងស្មារតីទទួលខុសត្រូវ។
លោកស្រី Li Ailan តំណាងអង្គការសុខភាពពិភពលោកប្រចាំកម្ពុជា មានប្រសាសន៍ដូច្នេះ៖«ភាពក្លាហាន ការយល់ចិត្ត និងសេចក្តីស្រលាញ់របស់រដ្ឋាភិបាល និងប្រជាជនកម្ពុជា មានចំពោះប្រទេសជាតិ និងមនុស្សជាទីស្រលាញ់របស់ខ្លួន តែងតែជំរុញចិត្តខ្ញុំ។ ជាមួយសកម្មភាពបុគ្គល និងសមូលហភាព យើងនឹងឈ្នះក្នុងការប្រយុទ្ធប្រឆាំងជំងឺកូវីដ-១៩បាន»។
ជំងឺរាតត្បាតកូវីដ-១៩ នៅឆ្ងាយពីទីបញ្ចប់។ ខណៈមានសញ្ញាថយចុះនៃការចម្លងនិងស្លាប់នៅតាមខេត្តខ្លះ ហានិភ័យនៃការកើនឡើងនូវករណីកូវីដ-១៩ ដោយសារវីរុសកូវីដ-១៩បំប្លែងថ្មីប្រភេទដែលតា គឺខ្ពស់ណាស់។ លោកស្រី Li Ailan បានសង្កត់ធ្ងន់ថា៖«យើងនៅបន្តប្រណាំងប្រជែងជាមួយនឹងវីរុសកូវីដ-១៩បំប្លែងថ្មី ជាពិសេសវីរុសបំប្លែងថ្មីប្រភេទដែលតានេះ»។
វីរុសកូវីដ-១៩បំប្លែងថ្មីនេះ ដែលពិភពលោកស្គាល់ថា វាងាយឆ្លងបំផុតនាពេលបច្ចុប្បន្ន ដែលមិនមានការអនុវត្តវិធានការតែមួយណា អាចទប់ស្កាត់ការចម្លងវីរុសនេះបានទេ ក្រៅពីទាមទារឱ្យមានការរួមបញ្ជូលគ្នាប្រកបដោយប្រសិទ្ធភាពនៃវិធានការសុខភាពសាធារណៈ និងសង្គមដែលផ្អែកលើហានិភ័យ ព្រមទាំងពន្លឿនកម្មវិធីចាក់វ៉ាក់សាំង។
គិតត្រឹមថ្ងៃទី១១សីហា ឆ្នាំ២០២១ កម្ពុជាចាក់វ៉ាក់សាំងបង្ការជំងឺកូវីដ-១៩ ដល់ពលរដ្ឋបានជាង៨,១លាននាក់ ដែលស្មើនឹងជាង៨១ ភាគរយនៃចំនួនប្រជាជនគោលដៅ១០លាននាក់។ ដោយឡែក កម្ពុជាក៏មានកុមារ-យុវវ័យអាយុពី ១២ដល់១៧ឆ្នាំ ជាង៤០ម៉ឺននាក់ទៀត បានចាក់វ៉ាក់សាំង ផងដែរ៕
© រក្សាសិទ្ធិដោយ thmeythmey.com