អុជធូបបួងសួងលួងលោមអស់ព្រះ សូមឲ្យបានឈ្នះអស់មារទាំងឡាយ

ស្រាកស្រាន្តស្រណុកចាកស្មុគចិត្តកាយ         ចរចេញជិតឆ្ងាយបានសុខសួស្តី។

 

ត្រឹមតែបន់ព្រះមិនឈ្នះទុក្ខអី         ចាស់ចែងឲ្យខ្មីខំដោយខ្លួនឯង

សុខចេញពីចិត្តជាក់យូរអង្វែង                 ស្មេរខ្ញុំតាក់តែងតាមចាស់ចែងជាក់។

 

សុខ១ ចាស់ថាផ្តើមពីម្នាក់ៗ         ពេញចិត្តជឿជាក់នូវអ្វីដែលមាន

សុខ២កើតស្តែងព្រោះបែងធនធាន         ធ្វើបុណ្យចែកទានដល់ជនខ្សោយខ្សត់។

 

សុខ៣ កើតបានព្រោះចិត្តអំណត់         ចេះឱនចេះអត់មិនកត់កំហុស

គំហកកំហែងស្តីស្តែងបន្តុះ                 បំពានអ្នកខុសបន្ទោសបន្ទាប។

 

សុខ៤កើតឡើងតាមចាស់រាប់រៀប         ឃើញគេជួបលាភគ្មានចិត្តនិន្ទា

ច្រណែនឈ្នានិសនាំឲ្យឈ្លោះគ្នា                 សុខ៥រស់ជាអ្នកមានចិត្តល្មម៕