-មារខាងក្រៅ ដៅកំចាត់ កាត់កំចាយ

មារជាប់កាយ ស្តាយខ្លះភ្លេច គេចបំប្លែង

ប្រឹងបំភ្លៃ លៃបំផ្លើស ល្មើសខ្លួនឯង

កាយតាក់តែង ស្តែងស្តុកស្តម ខំខាត់ខៃ។

 

-សត្រូវជាក់ លាក់ក្នុងខ្លួន ពួនផ្តុំគ្នា

អវិជ្ជា ជាមារខ្លាំង តាំងឫទ្ធិក្រៃ

កាន់ជាប់កាយ ឆ្ងាយពន្លឺ ឈឺរាល់ថ្ងៃ 

ជនថ្លាថ្លៃ ច្នៃជីវិត ពិតកំចាត់។

 

-មារមួយទៀត ឆ្លៀតវាយលុក ទុក្ខអង្វែង

លោភលន់ស្តែង តែងរំខាន ប្រាណបង់បាត់

ចិត្តកង្វល់ សល់ក្តីក្តៅ ហៅក្តួលក្តាត់

ឆ្លាតកំចាត់ កាត់កំចាយ កាយចិត្តសុខ។

 

-យកឈ្នះមារ គ្រានេះម្តង ល្បងសិក្សា

ប្រើប្រាជ្ញា ស្តារគំនិត ពិតចាកស្មុគ

លោភលន់លះ ជះកម្លៅ ដៅដានសុខ

ក្សាន្តគ្រប់ស្រុក សុខគ្រប់គ្នា ជាអង្វែង៕