COVID-19
ជាតិ
សេដ្ឋកិច្ច
រដ្ឋ ទម្លាក់កម្ចី១០០លានដុល្លារទៀត ដល់SME ដើម្បីទ្រទ្រង់អាជីវកម្មពីវិបត្តិកូវីដ-១៩ រូបតំណាង៖ ផលិតកម្មនៃ ឧស្សាហកមផលិតចំណីអាហាររបស់ក្រុមហ៊ុនលីលី។ រូបថត៖ Lyly food Industry
× ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ សម្រេចទម្លាក់កម្ចីក្នុងទំហំថវិកា១០០លានដុល្លារ ដល់សហគ្រាសធុនតូច និងមធ្យម(SMEs) ដើម្បីជួយទ្រទ្រង់អាជីវកម្ម និងចូលរួមស្តារសេដ្ឋកិច្ច ពីវិបត្តិកូវីដ-១៩។ បើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច ទឹកប្រាក់ចំនួន១០០លានដុល្លារនេះ គឺជាគម្រោងសហហិរញ្ញប្បទានទ្រទ្រង់ដល់ SMEs ក្នុងជំហានទី២ បន្ទាប់ពីការអនុវត្តគម្រោងសហហិរញ្ញប្បទានទី១ ទទួលបានជោគជ័យ។
កាលពីថ្ងៃទី១៦សីហា ក្រសួងសេដ្ឋកិច្ច និងហិរញ្ញវត្ថុ បានសម្រេចដាក់ឱ្យដំណើរការគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម (SMEs) ជាជំហានទី២ ក្នុងទំហំទឹកប្រាក់ ១០០លានដុល្លារដដែល។ សេចក្តីប្រកាសព័ត៌មានរបស់ក្រសួងសេដ្ឋកិច្ច បានបញ្ជាក់ថា គម្រោងសហហិរញ្ញប្បនទាន ទ្រទ្រង់សហគ្រាសធុនតូច និងមធ្យម ជំហានទី២ បង្កើតឡើងក្នុងបំណង ផ្ដល់ឥណទានការប្រាក់ទាប ដើម្បីជំរុញការអភិវឌ្ឍរបស់ SMEs នៅក្នុងវិស័យអាទិភាពមួយចំនួន។ វិស័យទាំងនោះមានដូចជា វិស័យឧស្សាហកម្ម សេវាកម្ម និងពាណិជ្ជកម្ម សម្រាប់ជំនួសឱ្យការនាំចូល និងបម្រើសេចក្ដីត្រូវការក្នុងស្រុក ឬជាធាតុចូល នៅក្នុងការផលិតរបស់ក្រុមហ៊ុនធំៗជាដើម។
បើតាមក្រសួងសេដ្ឋកិច្ច អត្រាការប្រាក់នៃឥណទានផ្តល់ឱ្យ SMEs ដែលស្ថិតនៅក្រោមគម្រោងសហហិរញ្ញប្បទាននេះ ត្រូវបានកំណត់ត្រឹមអតិបរមា ៦,៥ភាគរយ ក្នុងមួយឆ្នាំ សម្រាប់វិស័យអាទិភាព ដែលមានចុះបញ្ជី និង៧,៥ភាគរយក្នុងមួយឆ្នាំ សម្រាប់វិស័យវិស័យមិនមែនអាទិភាព ឬមិនបានចុះបញ្ជី។
កម្ចីក្រោមគម្រោងសហហិរញ្ញវត្ថុរបស់ក្រសួងសេដ្ឋកិច្ចនេះ SMEs ទាំងអស់ ដែលមានលក្ខណៈគ្រប់គ្រាន់ និងស្របតាមលក្ខខណ្ឌ អាចដាក់ពាក្យស្នើសុំឥណទាននេះ ពីគ្រឹះស្ថានហិរញ្ញវត្ថុនានា ដៃគូសហការជាមួយជាក្រសួងសេដ្ឋកិច្ច។ គ្រឹះស្ថានហិរញ្ញវត្ថុ ដែលចូលរួមនៃគម្រោងសហហិរញ្ញប្បទាននេះ មានចំនួណ២៦ស្ថាប័ន ដោយក្នុងនោះ មានធនាគារពាណិជ្ជចំនួន២១, ធនាគារឯកទេស១, គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ចំនួន៣, និងគ្រឹះស្ថានមីក្រូហិរញ្ញវត្ថុ១។ សូមជម្រាបថា គម្រោងសហហិរញ្ញប្បទានលើកទី១ ត្រូវបានក្រសួងសេដ្ឋកិច្ច ដាក់ឱ្យដំណើរការ កាលពីថ្ងៃទី៣មេសា ឆ្នាំ២០២០ មានទំហំទឹកប្រាក់ ១០០លានដុល្លារ៕
© រក្សាសិទ្ធិដោយ thmeythmey.com