ព្រឹត្តិការណ៍កីឡារដូវក្តៅ ដែលពន្យារមួយឆ្នាំដោយសារជំងឺកូវីដ-១៩ បានបញ្ចប់ដោយជោគជ័យកាលពីថ្ងៃទី៨ ខែសីហា បន្ទាប់ប្រកួតគ្នាអស់រយៈពេល១៨ថ្ងៃ។ ការរាប់មេដាយរបស់គណៈកម្មាធិការអូឡាំពិកអន្តរជាតិ (IOC) ផ្លូវការ បង្ហាញថាសហរដ្ឋអាមេរិកស្ថិតក្នុងចំណាត់ថ្នាក់លេខ១ និងចិនទទួលបានចំណាត់ថ្នាក់លេខ២ ហើយលេខ៣បានទៅម្ចាស់ផ្ទះជប៉ុន។

អាមេរិកឈ្នះមេដាយច្រើនជាងគេទាំង៣កម្រិតសរុបចំនួន១១៣ ក្នុងនោះមេដាយមាស៣៩ ប្រាក់៤១ និងសំរិទ្ធ៣៣។ ឯចិនវិញទទួលបានមេដាយមាស៣៨ ប្រាក់៣២ និងមេដាយសំរឹទ្ធិ ១៨ សរុប៨៨មេដាយ។

 

តាមគោលការណ៍ប្រទេសមួយ​ ប្រព័ន្ធពីរ (One Country, Two Systems) ហុងកុង ម៉ាកាវ និងតៃវ៉ាន់ មាន​ក្រុម​កីឡាតំណាងផ្សេងពីចិន។ សម្រាប់តៃវ៉ាន់ គណៈកម្មការអូឡាំពិកអន្តរជាតិ ហៅឈ្មោះ ជាផ្លូវការថា «ឆាយនីស តៃប៉ិ»។

 

ប៉ុន្តែយ៉ាងណាក៏ដោយ ក្រោយបញ្ចប់ព្រឹត្តិការណ៍អូឡាំពិករយៈពេលជាងមួយសប្តាហ៍ គេឃើញមានការបង្ហោះនៅលើ Weibo ដែលជាបណ្តាញសង្គមដ៏ល្បី បង្ហាញពីការរាប់មេដាយដែលបានផ្លាស់ប្តូរ ដោយចិនបញ្ចូលទាំងមេដាយរបស់ហុងកុង និងតៃវ៉ាន់។ នេះបើតាមការផ្សាយរបស់កាសែតតៃវ៉ានើ Taiwan News។

 

ហុងកុងឈ្នះមេដាយសរុប៦ ក្នុងនោះមាស១ ប្រាក់២ និងសំរឹទ្ធិ៣ ខណៈតៃវ៉ាន់ដែលប្រើឈ្មោះនៅអូឡាំពិកថាឆាយនីសតៃប៉ិ ឈ្នះមេដាយមាស២ ប្រាក់៤ និងសំរឹទ្ធិ៦ សរុប១២។

ការរាប់បន្ថែមដោយខ្លួនឯងនេះ មានន័យថាចិនកើនចំនួនមេដាយសរុបដល់១០៦មេដាយ ដោយក្នុងនោះមាស៤១ ប្រាក់៣៧ និងសំរឹទ្ធិ២៧ និងធ្វើឱ្យពួកគេនាំមុខគូប្រជែងអាមេរិកវិញ ដោយលើសចំនួនមេដាយមាស២។
 

ការរាប់មេដាយបន្ថែមរបស់ហុងកុង និងតៃវ៉ាន់ ត្រូវបានគេមើលឃើញថាចិន ពិតជាចង់ឈ្នះអាមេរិកដើម្បីក្លាយជាជ័យលាភីអូឡាំពិកក្រុងតូក្យូឆ្នាំ២០២០។

ទាំងហុងកុង និងតៃវ៉ាន់ សុទ្ធតែមានបញ្ហា​ជាមួយចិនដូចគ្នា។ យ៉ាងណា បើតាមការប្រកាសរបស់ IOC ហុងកុង និងតៃវ៉ាន់ នឹងអាចបញ្ជូនអត្តពលិកទៅក្រុងប៉េកាំង ដើម្បីចូលរួមការប្រកួតកីឡាអូឡាំពិករដូវរងាឆ្នាំ ២០២២ និងព្រឹត្តិការណ៍កីឡាផ្សេងទៀតបាន បើទោះមានភាពតានតឹងផ្នែកនយោបាយជាមួយចិនក៏ដោយ។ ហុងកុង និងតៃវ៉ាន់ បានចូលរួមប្រកួតប្រជែងមេដាយនៅព្រឹត្តិការណ៍អូឡាំពិករដូវក្តៅក្រុងប៉េកាំងឆ្នាំ ២០០៨ រួចមកហើយ៕