ជាតិ
សង្គមជាតិ
សម្តេច ហ៊ុន សែន សម្រេចបញ្ចប់បម្រាមទប់ស្កាត់ជំងឺកូវីដ-១៩ នៅទូទាំងប្រទេស សម្ដេច ហ៊ុន សែន ប្រមុខរាជរដ្ឋាភិបាលកម្ពុជា
× ភ្នំពេញ៖ សម្តេច ហ៊ុន សែន សម្រេចបញ្ចប់យុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលជំងឺកូវីដ-១៩ ពីមេរោគបំប្លែងខ្លួនថ្មី ប្រភេទដែលតា (Delta) នៅទូទាំងប្រទេស ក្រោយអនុវត្តបាន២១ថ្ងៃ។ ប៉ុន្តែ សម្តេច អនុញ្ញាតឱ្យរដ្ឋបាលរាជធានី-ខេត្តទាំងអស់ ដាក់វិធានការរដ្ឋបាល វិធានការសុខាភិបាល និងវិធានការច្បាប់ ទៅតាមស្ថានភាពជាក់ស្តែងនៃការឆ្លងរាលជំងឺកូវីដ-១៩។
ការអនុវត្តយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ ត្រូវបានសម្រេចបិទបញ្ចប់ ចាប់ពីម៉ោងសូន្យថ្ងៃទី២០សីហានេះ តទៅ។ បើយោងតាមសេចក្តីណែនាំរបស់សម្តេច ហ៊ុន សែន ការសម្រេចបិទបញ្ចប់យុទ្ធនាការនេះ គឺដោយសាររដ្ឋាភិបាលអាចគ្រប់គ្រងនូវការឆ្លងរាលដាលជាទ្រង់ទ្រាយធំក្នុងសហគមន៍នៃមេរោគកូវីដ-១៩ប្រភេទដែលតា (Delta)បាន។
សេចក្តីណែនាំរបស់សម្តេច ហ៊ុន សែន បានបញ្ជាក់ថា រយៈពេល២១ថ្ងៃកន្លងមកនេះ ពោលពីថ្ងៃទី២៩កក្កដា ដល់ថ្ងៃទី១៩សីហា ឆ្នាំ២០២១ រដ្ឋាភិបាលបានអនុវត្តយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ បានដោយរលូន និងទទួលបានលទ្ធផលវិជ្ជមាន ដែលជួយដល់ការគ្រប់គ្រង និងការពន្យារពេលបានមួយកម្រិតនូវការឆ្លងរាលដាលទ្រង់ទ្រាយធំក្នុងសហគមន៍នៃមេរោគកូវីដ-១៩ ប្រភេទDelta។
សម្តេច បានរៀបរាប់នៅក្នុងសេចក្តីណែនាំរបស់ខ្លួនដូច្នេះ៖« ជាក់ស្តែង, ការវិវត្តសភាពការណ៍ក្នុងរយៈពេល២សប្តាហ៍ចុងក្រោយនេះ បានបង្ហាញថាអត្រាឆ្លងរាលដាលក្នុងសហគមន៍នៃមេរោគកូវីដ-១៩ និងអត្រាអ្នកជំងឺកូវីដ-១៩ កម្រិតមធ្យម ក៏ដូចជាអត្រាអ្នកស្លាប់ដោយសារជំងឺនេះ មានទិន្នាការថេរ។ ទន្ទឹមនេះ អត្រាអ្នកជាសះស្បើយក៏មានការកើនឡើង បើទោះបីជាមេរោគកូវីដ-១៩ ប្រភេទDelta បានឆ្លងរាលដាលក្នុងសហគមន៍ក្នុងចំនួនកាន់តែច្រើនឡើងៗ ហើយបច្ចុប្បន្ន បានរីករាលដាលរហូតទៅដល់ ២៣រាជធានី-ខេត្ត ក្តី»។
ប៉ុន្តែ ដោយមើលឃើញពីប្រសិទ្ធភាពនិងសារៈសំខាន់រួមទាំងមិនសូវបង្កផលប៉ះពាល់ជាដុំកំភួនដល់សកម្មភាពខាងផ្នែកសង្គម និងសេដ្ឋកិច្ច ក៏ដូចជាជីវភាពប្រចាំថ្ងៃរបស់ប្រជាជន នៃការអនុវត្តវិធានការប្រយុទ្ធ និងទប់ស្កាត់ការឆ្លង រាលដាលនៃជំងឺកូវីដ-១៩ សម្តេច ហ៊ុន សែន បានអនុញ្ញាតឱ្យរដ្ឋបាលរាជធានី-ខេត្តទាំងអស់ ដាក់វិធានការរដ្ឋបាល វិធានការសុខាភិបាល និងវិធានការច្បាប់ទៅតាមស្ថានភាពជាក់ស្តែងនៃការឆ្លងរាលជំងឺកូវីដ-១៩។
មកទល់ពេលនេះ កម្ពុជាមានអ្នកឆ្លងកូវីដ-១៩សរុប ៨៧,៧២៣នាក់ ក្នុងនោះមាន១៣,៦១៩នាក់ ជាករណីនាំចូល។ ក្នុងចំណោមអ្នកឆ្លងកូវីដ-១៩ សរុប មាន៨៣,២៩៨នាក់ បានជាសះស្បើយ និងស្លាប់១,៧៤៧នាក់៕
© រក្សាសិទ្ធិដោយ thmeythmey.com