ជាតិ
WHO ផ្តល់សម្ភារបង្ការនិងទប់ស្កាត់កូវីដ-១៩ តម្លៃជាង៣២,៨ម៉ឺនដុល្លារដល់កម្ពុជា រូបថត៖ ហ្វេសប៊ុកក្រសួងសុខាភិបាល
× អង្គការសុខភាពពិភពលោកប្រចាំកម្ពុជា បានផ្តល់ជំនួយជាសម្ភារបរិក្ខារវេជ្ជសាស្ត្រ ដែលមានតម្លៃជាង៣២,៨ដុល្លារដល់កម្ពុជា ដើម្បីប្រើប្រាស់ក្នុងការការពារ ទប់ស្កាត់ និងឆ្លើយតបការរាតត្បាតជំងឺកូវីដ-១៩។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជា។
បើតាមក្រសួងសុខាភិបាល ជំនួយជាឧបករណ៍សម្ភារបរិក្ខាវេជ្ជសាស្ត្រ ទាំងនោះមានរថយន្តបំពាក់ប្រព័ន្ធត្រជាក់ធុនធ្ងន់ សម្រាប់ដឹកវ៉ាក់សាំងចំនួន៣គ្រឿង និងបរិក្ខារវជ្ជសាស្ត្រ ដែលមានម៉ាស់ចំនួន ១៦ម៉ឺនម៉ាស, ស្រោមដៃចំនួន ១៦ម៉ឺន និងជេលលាងដៃចំនួន ៨,៧៥០ដប និងសម្ភារអប់រំសុខភាពចំនួន៣០ម៉ឺន។
ពិធីប្រគល់ និងទទួលជំនួយនេះ បានព្រត្តឹត្តទៅនៅព្រឹកថ្ងៃទី២៤ សីហានេះ នៅឃ្លាំងឱសថកណ្តាលនៃក្រសួងសុខាភិបាល ក្រោមវត្តមានលោក ម៉ម ប៊ុនហេង រដ្ឋមន្ត្រីក្រសួងសុខាភិបាល រួមជាមួយលោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោកប្រចាំកម្ពុជា។
រថយន្តបំពាក់ប្រព័ន្ធត្រជាក់ធុនធ្ងន់សម្រាប់ដឹកវ៉ាក់សាំង ដែលជាជំនួយរបស់WHO ដល់កម្ពុជា។ រូបថត៖ ក្រសួងសុខាភិបាលកម្ពុជា
នាឱកាសនោះ លោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោកប្រចាំកម្ពុជា បានកោតសរសើរចំពោះរាជរដ្ឋាភិបាលកម្ពុជា និងក្រសួងសុខាភិបាល ស្ថាប័នពាក់ព័ន្ធ អាជ្ញាធរមូលដ្ឋានគ្រប់លំដាប់ថ្នាក់ និងប្រជាជនកម្ពុជាទាំងអស់ ដែលបានចូលរួមការពារទប់ស្កាត់ការរីករាលដាលនៃជំងឺកូវីដ-១៩។ បើតាមលោកស្រី Li Ailan មកដល់ពេលនេះ កម្ពុជាអាចគ្រប់គ្រងស្ថានភាពនៃការរីករាលដាលកូវីដ-១៩បាន។ តំណាងអង្គការសុខភាពពិភពលោកប្រចាំកម្ពុជា បានគូសបញ្ជាក់ដែរថា អង្គការសុខភាពពិភពលោក នឹងនៅតែបន្តកិច្ចសហការនិងគាំទ្រវិស័យសុខាភិបាលកម្ពុជា។
លោកម៉ម ប៊ុនហេង ក៏បានអរគុណចំពោះអង្គការសុខភាពពិភពលោក ដែលតែងតែគាំទ្រទាំងថវិកា បច្ចេកទេស ដល់វិស័យសុខាភិបាលកម្ពុជា។ សម្រាប់លោករដ្ឋមន្ត្រី ការគាំទ្រទាំងនេះ បញ្ជាក់ពីការយកចិត្តទុកដាក់របស់អង្គការសុខភាពពិភពលោក ចំពោះរាជរដ្ឋាភិបាល និងប្រជាជនកម្ពុជា ជាពិសេសក្នុងកាលៈទេសៈនៃការរាតត្បាតនៃកូវីដ-១៩នេះ។
សូមជម្រាបថា មកទល់នឹងបច្ចុប្បន្ន កម្ពុជាមានអ្នកអ្នកឆ្លងជំងឺកូវីដ-១៩ សរុប៩០,១០៧នាក់ ក្នុងនោះករណីនាំចូល១៤,៣៩៥នាក់។ ចំណែកអ្នកជាសះស្បើយ ៨៦,១៣០នាក់ និងអ្នកស្លាប់ ១,៨២១នាក់៕
© រក្សាសិទ្ធិដោយ thmeythmey.com