ជាតិ
សង្គមជាតិ
ក្រុមអ្នកជំនាញសិទ្ធិមនុស្ស UN រិះគន់តុលាការកម្ពុជាជុំវិញការផ្តន្ទាទោសលោក រ៉ុង ឈុន និងសកម្មជនពីររូបទៀត
× ពីទីក្រុងហ្សឺណែវ ក្រុមអ្នកជំនាញសិទ្ធិមនុស្សអង្គការសហប្រជាជាតិ បានចេញសេចក្តីថ្លែងការរិះគន់តុលាការកម្ពុជាជុំវិញការផ្តន្ទាទោសសកម្មជនសិទ្ធិមនុស្ស លោក រ៉ុង ឈុន និងបុគ្គល២រូបទៀតចំពោះការអត្ថាធិប្បាយដែលគាត់បានធ្វើនៅលើហ្វេសប៊ុក ដែលអះអាងអំពីការបាត់បង់ដីសហគមន៍ និងការបណ្តេញចេញដោយបង្ខំនៅតាមបន្ទាត់ព្រំដែនកម្ពុជាវៀតណាម។
លោក រ៉ុង ឈុន មេដឹកនាំសហជីពកម្មករត្រូវបានសាលាដំបូងរាជធានីភ្នំពេញកាត់ទោសឲ្យជាប់ពន្ធនាគាររយៈពេល២ឆ្នាំ រីឯសកម្មជនពីររូបទៀត គឺកញ្ញា ស កន្និកា និង លោក តុន និមល ត្រូវបានផ្តន្ទាទោសឲ្យជាប់ពន្ធនាគាររយៈពេល ២០ ខែ ពីបទចូលរួមក្នុងការធ្វើបាតុកម្មមួយកាលពីមួយឆ្នាំមុន។
លោក វិទិត ម៉ុនតារបន (Mr. Vitit Muntarbhorn) អ្នករាយការណ៍ពិសេស អ.ស.ប ទទួលបន្ទុកសិទ្ធិមនុស្សនៅកម្ពុជា បានវាយតម្លៃថា ការដាក់ពន្ធនាគារ និងការពិន័យយ៉ាងធ្ងន់ធ្ងរដល់សកម្មជនទាំងបីរូបនេះ មានលក្ខណៈមិនសមហេតុផល និងមិនសមាមាត្រឡើយ។ សម្រាប់អ្នកស្រី ម៉ារី ឡល័រ (Mary Lawlor) អ្នករាយការណ៍ពិសេស អ.ស.ប ស្តីពីស្ថានភាពអ្នកការពារសិទ្ធិមនុស្ស អ្នកការពារសិទ្ធិមនុស្សមិនគួរត្រូវបានចាប់ខ្លួន ឃុំខ្លួន ឬផ្តន្ទាទោសចំពោះកិច្ចខិតខំប្រឹងប្រែងរបស់ខ្លួន ដើម្បីការពារសិទ្ធិមនុស្សអ្នកដទៃឡើយ។
ក្រុមអ្នកជំនាញសិទ្ធិមនុស្សអង្គការសហប្រជាជាតិបានគូសបញ្ជាក់ថា៖ «យើងមានកង្វល់ជាខ្លាំងដែលរដ្ឋាភិបាលកម្ពុជា ប្រើប្រាស់មាត្រា ៤៩៤ និង ៤៩៥ នៃក្រមព្រហ្មទណ្ឌ បទញុះញង់ឱ្យប្រព្រឹត្តបទឧក្រិដ្ឋ ដែលប្រើពាក្យពេចន៍ស្រពេចស្រពិល ដើម្បីបង្ក្រាបមតិជំទាស់ និងបំបិទមាត់ការបញ្ចេញមតិដោយសេរី»។
ក្នុងសំណុំរឿងរបស់តុលាការកាលពីសប្តាហ៍មុន លោក ឈុន និងអ្នកគាំទ្រគាត់ ត្រូវបានតុលាការបង្គាប់ឱ្យបង់ប្រាក់ពិន័យចំនួន ៥០០ ដុល្លារអាមេរិកក្នុងម្នាក់ៗ និងពិន័យជាប្រាក់មួយចំនួនផ្សេងទៀត ដែលស្មើនឹងប្រមាណជា ១០ ម៉ឺនដុល្លារអាមេរិក ទៅឱ្យគណៈកម្មាធិការកិច្ចការព្រំដែនកម្ពុជា ដោយអះអាងថា បានធ្វើឱ្យខូចកេរ្តិ៍ឈ្មោះរបស់គណៈកម្មាធិការនេះ។
ទាក់ទងនឹងសំណុំរឿងលោក រ៉ុង ឈុន លោក ផៃ ស៊ីផាន អ្នកនាំពាក្យរដ្ឋាភិបាល បានបញ្ចេញប្រតិកម្មតាមរយៈហ្វេសប៊ុករបស់ខ្លួន កាលពីថ្ងៃទី២១ ខែសីហា ថា ការវិនិច្ឆ័យក្តីរបស់តុលាការកម្ពុជា ផ្អែកលើមូលដ្ឋានអង្គហេតុ និងអង្គច្បាប់ដែលបុគ្គលរូបនោះ បានប្រព្រឹត្តអំពើផ្ទុយពីច្បាប់កម្ពុជា ដែលបានហាមប្រាម និងបញ្ញត្តិជាធរមាន។ កង្វល់អាទិភាពបំផុត របស់រាជរដ្ឋាភិបាលកម្ពុជា គឺថែរក្សាសន្តិភាព និងសន្តិសុខជាតិ។
«ខ្ញុំសូមអំពាវនាវដល់បណ្ដាមិត្តបរទេសទាំងអស់ ដែលរស់នៅក្នុងព្រះរាជាណាចក្រកម្ពុជាក្តី ឬនៅឯនាយសមុទ្រក្តី សូមមេត្តាចូលរួមសហការជាមួយប្រជាពលរដ្ឋកម្ពុជា ការវិនិច្ឆ័យក្តីនេះ ស្ថិតនៅក្នុងនាម និងផលប្រយោជន៍របស់ប្រជាពលរដ្ឋខ្មែរ ក្នុងកិច្ចប្រឹងប្រែងថែរក្សាសន្តិភាព ស្ថិរភាព និងសន្តិសុខជាតិ ដែលជាសេចក្តីប៉ងប្រាថ្នា និងតម្រូវការចាំបាច់របស់យើងទាំងអស់គ្នា»។ នេះជាសំណូមពររបស់អ្នកនាំពាក្យរដ្ឋាភិបាល៕
© រក្សាសិទ្ធិដោយ thmeythmey.com