ថៃ ជាមជ្ឈមណ្ឌលផលិតវ៉ាក់សាំងបង្ការជំងឺកូវីដ-១៩ របស់ក្រុមហ៊ុន AstraZeneca សម្រាប់តំបន់អាស៊ីអាគ្នេយ៍ ប៉ុន្តែប្រទេសនេះបែរជាជួបបញ្ហាយឺតយ៉ាវក្នុងការទទួលបានវ៉ាក់សាំងគ្រប់គ្រាន់សម្រាប់ប្រជាជនរបស់ខ្លួនទៅវិញ។ ប្រហែល៩ភាគរយនៃប្រជាជន៦៦លាននាក់របស់ថៃ បានចាក់វ៉ាក់សាំងពេញលេញ។

 

កាលពីខែមុន ក្រុមហ៊ុន AstraZeneca ក៏បានស្នើសុំពន្យាពេលដឹកជញ្ជូការបញ្ជាទិញចំនួន៦១លានដូសដល់ខែឧសភា ឆ្នាំ២០២២ ។ ប៉ុន្តែបន្ទាប់ពីកិច្ចប្រជុំរវាងនាយករដ្ឋមន្រ្តី ប្រាយុទ្ធ ចន្ទអូចា និងនាយកប្រតិបត្តិក្រុមហ៊ុន AstraZeneca ការបញ្ជាទិញរបស់ថៃ នឹងមកដល់ឆាប់ជាងការរំពឹងទុក។​

នេះបើតាមអ្នកនាំពាក្យរដ្ឋាភិបាលលោក Anucha Burapachaisri ។

 

លោក Anucha បានលើកទ្បើងនៅក្នុងសេចក្តីថ្លែងការណ៍មួយថា នេះជាដំណឹងល្អក្នុងការជួយបង្កើតប្រព័ន្ធសុំាសម្រាប់មនុស្សទាំងអស់គ្នាបានលឿន​។ លើសពីនោះ វានឹងដកសម្ពាធពីប្រព័ន្ធសុខាភិបាល ជួយឱ្យប្រជាជនឆាប់បានវិលត្រឡប់ទៅរកជីវិតធម្មតា និងពន្លឿនការស្តារសេដ្ឋកិច្ចឡើងវិញទៀតផង។

 

បូកបញ្ចូលទាំងវ៉ាក់សាំងរបស់ AstraZeneca ផង ការផ្គត់ផ្គង់វ៉ាក់សាំងសរុបរបស់ថៃសម្រាប់ឆ្នាំ ២០២១ មានដល់ជាង១២១លានដូសដែលក្នុងនោះ ៦០លានដូសទៀតជាវ៉ាក់សាំងរបស់ក្រុមហ៊ុន​ Sinovac របស់ចិនចំនួន៣០លានដូសនិង៣០លានដូសពី Pfizer-BioNTech ។

 

លោក Anucha អះអាងថា ថៃនឹងទិញវ៉ាក់សាំង AstraZeneca ចំនួន៦០លានដូសបន្ថែមនៅឆ្នាំក្រោយ​។ បើយោងតាមក្រសួងសុខាភិបាល ថៃក៏មានគម្រោងទិញវ៉ាក់សាំង Pfizer-BioNTech ចំនួន៥០លានដូសនៅឆ្នាំ២០២២ ដែរ៕

 

មកទល់ពេលនេះថៃបានរាយការណ៍ថាមានអ្នកឆ្លងវីរុសកូរ៉ូណាចំនួន ១.០៦៦.៧៨៦ នាក់និងស្លាប់ចំនួន ៩.៥៦២ នាក់ចាប់តាំងពីការរាតត្បាតបានចាប់ផ្តើម។ ជាង ៩៧ ភាគរយនៃករណីនិងការស្លាប់ទាំងនោះត្រូវបានរកឃើញចាប់តាំងពីខែមេសាឆ្នាំនេះ។