ជាតិ
ទឹកភ្លៀងជន់លិចផ្លូវ ក្នុងក្រុងព្រះសីហនុ ក្រោយភ្លៀងធ្លាក់ខ្លាំង ចាប់តាំងពីម៉ោង៤រសៀល ថ្ងៃទី២៤ ខែសីហា ។ រូបថត៖ ហ្វេសប៊ុករដ្ឋបាលខេ្តតព្រះសីហនុ
×![]()
ដោយ: សារព័ត៌មានថ្មីៗ
ភ្លៀងធ្លាក់ខ្លាំងតាំងពីម៉ោងប្រមាណ៤រសៀលមក បានបង្កឱ្យមានការជន់លិចតំបន់ជាច្រើន នៅក្នុងក្រុងព្រះសីហនុ ជាពិសេសតំបន់ទំនាប។ លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បញ្ជាក់ប្រាប់សារព័ត៌មានថ្មីតាមទូរសព្ទដូច្នេះថា៖«តំបន់មួយចំនួន បានជន់លិចដោយទឹកភ្លៀង ជាពិសេសតំបន់ទំនាប នៅក្នុងក្រុងព្រះសីហនុ។ ប៉ុន្តែបណ្តាស្រុក មួយចំនួនទៀត មិនមានភ្លៀងធ្លាក់ខ្លាំងទេ»។ អ្នកនាំពាក្យរដ្ឋបាលខេត្តព្រះសីហនុរូបនេះ បន្តទៀតថា រហូតមកម៉ោងជាង៨យប់នេះ ភ្លៀងក៏នៅតែបន្តធ្លាក់មិនទាន់ថមថយនៅឡើយ។
បើតាមលោក ឃាង ភារម្យ កម្រិតទឹកភ្លៀងនៅខេត្តព្រះសីហនុបានហក់ឡើងពីកម្ពស់១២០មីលីម៉ែត្រ នៅម៉ោង៦ល្ងាចនេះ ដល់កម្រិតដ៏ខ្ពស់គឺកម្ពស់១៨៨ មីលីម៉ែត្រ គិតត្រឹម៧យប់។ អ្នកនាំពាក្យរដ្ឋបាលខេត្តព្រះសីហនុអះអាងបន្តថា អាជ្ញាធរកំពុងតែតាមដានស្ថានភាពគ្រោះមហន្តរាយធម្មជាតិនេះ យ៉ាងយកចិត្តទុកដាក់ ភ្លៀងនៅមិនទាន់រាំងនៅឡើយ ហើយក៏នៅតែបន្តធ្លាក់ក្នុងកម្រិតច្រើនទៀតនោះ។
តាមរយៈសារព័ត៌មានថ្មីៗ លោក ឃាង ភារម្យ បានអំពាវនាវឱ្យពលរដ្ឋបង្កើនការប្រុងប្រយ័ត្នឱ្យបានខ្ពស់បំផុត ហើយបើមិនចាំបាច់ សូមចៀសវាងធ្វើដំណើរចេញក្រៅផ្ទះ ដើម្បីបង្កាគ្រោះថ្នាក់ជាយថាហេតុណាមួយក្នុអំឡុងពេលធ្វើដំណើរ។ ទន្ទឹមនឹងនេះ អ្នកនាំពាក្យរដ្ឋបាលខេត្តក៏ ស្នើឱ្យពលរដ្ឋដែលមានលំនៅដ្ឋាន នៅតំបន់ទំនាប ជម្លៀសខ្លួនទៅកាន់ទីទួលមានសុវត្ថិភាព។
ក្រៅពីការអំពាវនេះ លោក ភារម្យ ក៏បញ្ជាក់ដែរថា អាជ្ញាធរ បានកាត់ផ្តាច់ចរន្តអគ្គិសនីនៅតំបន់មួយចំនួនផងដែរ ដើម្បីបញ្ចៀសគ្រោះថ្នាក់ផ្សេងៗ ខណៈតំបន់ខ្លះភ្លើងត្រូវកាត់ផ្តាច់ដោយសារបង្គោលភ្លើងបានបាក់រលំជាដើម។
សូមជម្រាបថា ចាប់ពីថ្ងៃទី២៥-៣១ ខែសីហានេះ កម្ពុជា នឹងទទួលឥទ្ធិពលពីជ្រលងសម្ពាធទាបឥណ្ឌាក្នុងកម្រិតខ្លាំង។ នេះបើតាមការព្យាករអាកាសធាតុរបស់ក្រសួងធនធានទឹក៕
© រក្សាសិទ្ធិដោយ thmeythmey.com
