ក្រសួងសុខាភិបាលព្រុយណេ បានប្រកាសថា ជនជាតិព្រុយណេ ចំនួន ២រូប បានបាត់បង់ជីវិតដោយសារជំងឺកូវីដ-១៩ បន្ទាប់ពីត្រូវបញ្ជូនទៅដាក់មជ្ឈមណ្ឌលចត្តាឡីស័កនៅក្នុងខែសីហា។ នេះជាករណីស្លាប់លើកដំបូង ក្នុងរយៈពេលជាងមួយឆ្នាំកន្លងមកនេះ។ ព្រុយណេ បានរាយការណ៍ករណីស្លាប់ចុងក្រោយនៅក្នុងខែមិថុនា ឆ្នាំ២០២០ កន្លងទៅ។ អ្នកស្លាប់ដោយសារជំងឺកូវីដ-១៩ សរុបនៅព្រុយណេ កើនដល់ ៥នាក់។ 

 

ទន្ទឹមនេះ ករណីឆ្លងជំងឺកូវីដ-១៩ ប្រចាំថ្ងៃក៏មានចំនួនច្រើនផងដែរ។ នៅថ្ងៃទី២៤ ខែសីហា ព្រុយណេ មានករណីឆ្លងប្រចាំថ្ងៃចំនួន ១១០ករណី ដោយករណីឆ្លងសរុបកើនដល់ ១៩៨៣ករណី។ 

 

ចាប់តាំងពីខែកក្កដា កន្លងមក អាជ្ញាធរព្រុយណេ បានចេញវិធានការមួយចំនួន ដើម្បីទប់ស្កាត់ការរីកសាយនៃជំងឺឆ្លងសកលមួយនេះ ក៏ដូចជាវីរុសបង្កជាជំងឺកូវីដ-១៩ ទម្រង់ដែលតា។ រោងភាពយន្ត កន្លែងសាសនា ត្រូវបានបិទទាំងអស់ ខណៈប្រជាជនជាច្រើនត្រូវស្នាក់នៅផ្ទះ ប្រសិនបើគ្មានកិច្ចការចាំបាច់៕