ចំនួនមនុស្សដែលឆ្លងកូវីដ-១៩បំប្លែងថ្មីប្រភេទ «Delta» នៅកម្ពុជានោះ នៅរាជធានីភ្នំពេញគឺមានអ្នកឆ្លងមេរោគបំប្លែងថ្មីនេះច្រើនជាងគេ ក្នុងចំនួន៤៥០នាក់។ នេះបើតាមសេចក្តីជូនដំណឹងរបស់ក្រសួងសុខាភិបាល។ 

បច្ចុប្បន្នមេរោគកូវីដ-១៩ បំប្លែងថ្មីប្រភេទDelta  បានគ្រប់ដណ្តប់កម្ពុជានៅក្នុងរាជធានី-ខេត្តចំនួន២៣។ គិតត្រឹមនៅថ្ងៃទី២៦សីហា ឆ្នាំ២០២១ ក្រសួងសុខាភិបាលប្រកាសរកឃើញអ្នកឆ្លងមេរោគកូវីដ-១៩ បំប្លែងថ្មីចំនួន១ ៥៣៤នាក់។ សេចក្តីជូនដំណឹងរបស់ក្រសួងសុខាភិបាលបានបញ្ជាក់ថា ក្នុងចំណោមអ្នកដែលឆ្លងសរុបនេះ គឺមាន៤៥០នាក់ នៅរាជធានីភ្នំពេញ, មាន២៨៦នាក់ នៅបន្ទាយមានជ័យ និងមាន២០៧នាក់ នៅខេត្តឧត្តរមានេះជ័យ ខណៈខេត្តផ្សេងៗទៀត មានអ្នកឆ្លងមេរោគនេះក្នុងកម្រិតតិចតួច។

បើតាមក្រសួងសុខាភិបាល មេរោគបំប្លែងថ្មីនេះ កំពុងបន្តរាតត្បាត និងវាយលុកចូលក្នុងសហគមន៍  ជាពិសេស នៅភ្នំពេញ ខេត្តឧត្តរមានជ័យ សៀមរាប ព្រះវិហារ កំពង់ចាម កំពង់ធំ កណ្ដាល បន្ទាយមានជ័យ និងបណ្តាខេត្តមួយចំនួនទៀត៕