អ្នកនាំពាក្យរូបនេះ បន្តថា ការជួសជុលនេះមានផលលំបាកខ្លះក្នុងការជួសជុល ដោយសារទីតាំងតូចចង្អៀត បង្ហាប់កន្លែងជ្រាប ហើយបង្វែរទឹក ឲ្យហូរចេញតាមចង្ហូរទឹកដែលមានស្រាប់។  លោក ឡុង កុសល បានបញ្ជាក់ដូច្ន៖៖«ក្នុងការជួសជុល យើងពិបាកដោយសារកន្លែងតូចចង្អៀត ដែលធ្វើឲ្យពិបាកប្រើប្រាស់ឧបករណ៍។ វាធម្មតាទេ យើងធ្វើការជាមួយថ្ម យើងត្រូវប្រើប្រាស់ឧបករណ៍ដើម្បីលើកដាក់ថ្ម។ ដូច្នេះកន្លែងតូចវាជាបញ្ហាពិបាកបន្តិច»។ 
 

កញ្ញា ម៉េង សុវណ្ណលីលីន ស្ថាបត្យករនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ បានឱ្យដឹងថា ក្នុងដំណើការជួសជុល ក្រុមការងារបានផ្តោតសំខាន់ទៅលើការពង្រឹងជញ្ជាំងខឿន និងរៀបចំផ្គុំកន្លែងថ្មបាយក្រៀម ដែលក្រៀកចេញពីគ្នាឡើងវិញតាមលក្ខណៈដើម រួមទាំងពង្រឹងលើគុណភាពដីរបស់គ្រឹះបុរាណ។ ក្នុងកិច្ចការនេះ ក្រុមការងារក៏បានប្រើប្រាស់ថ្មថ្មីខ្លះៗ ដើម្បីជំនួសថ្មចាស់ ដែលបានខូចខាតផងដែរ។ 
 

ប្រាសាទបាយ័ន គឺជាគោលដៅទេសចរដ៏សំខាន់មួយសម្រាប់ភ្ញៀវទេសចរទាំងជាតិ និងអន្តរជាតិ បន្ទាប់ពីប្រាសាទអង្គរវត្ត។ ក្បូរក្បាច់រចនាដ៏ល្អឥតខ្ចោះ រូបចម្លាក់ដ៏រស់រវើក និងផ្ទាំងថ្មធំៗ ដែលតម្រៀបគ្នាសង់ឡើងជាតួប្រាសាទ បានរំលេចទិដ្ឋភាពយ៉ាងអស្ចារ្យ ដែលមនុស្សម្នានៅលើពិភពលោក នាំគ្នាសរសើរមិនដាច់ពីមាត់៕