គណៈកម្មាធិការអូឡាពិកអន្តរជាតិ (IOC) បានសម្រេចបង្ហូតទង់ជាតិអូឡាំពិក ពាក់កណ្ដាលដងទង់ជាតិ នៅការិយាល័យ និងសារមន្ទីរអូឡាំពិក រួមទាំងទីតាំងកីឡាផ្សេងទៀត រយៈពេល៥ថ្ងៃ ដើម្បីបង្ហាញពីការគោរពចំពោះ លោក Jacques Rogge។ មិនតែប៉ុណ្ណោះ IOC នឹងរៀបចំពិធីរំឭកគុណជាលក្ខណៈទ្រង់ទ្រាយធំមួយ ដល់អតីតប្រធានអូឡាំពិក នៅចុងឆ្នាំនេះផងដែរ។

 

លោក Thomas Bach ប្រធានគណៈកម្មាធិការអូឡាំពិកអន្តរជាតិបច្ចុប្បន្ន បាននិយាយដូច្នេះថា៖« គាត់(Jacques Rogge ) គឺជាប្រធានមួយរូប ដែលទទួលបានជោគជ័យក្នុងការជួយធ្វើទំនើបកម្មនិងផ្លាស់ប្តូរ IOC ។ គាត់នឹងត្រូវបានគេចងចាំជាពិសេសចំពោះការប្រកួតកីឡាយុវជននិងសម្រាប់ការបើកការប្រកួតកីឡាអូឡាំពិកយុវជន»។

 

លោក Jacques Rogge ក៏ជាអ្នកដែលប្រឆាំងយ៉ាងខ្លាំងក្លាចំពោះការប្រើប្រាស់សារធាតុជំនួយកម្លាំង Doping នៅក្នុងសកម្មភាពកីឡាអូឡាំពិកផងដែរ។ នេះបើតាមលោក Thomas Bach ដែលបានរំឭកពីការខំប្រឹងប្រែងរបស់អតីតប្រធានអូឡាំពិក។

 

«គាត់(Jacques Rogge ) ក៏ជាអ្នកគាំទ្រកីឡាដ៏ស្អាតស្អំនិងតស៊ូដោយមិនខ្លាចនឿយហត់ ប្រឆាំងអំពើអាក្រក់នៃសារធាតុហាមឃាត់។ ចលនាអូឡាំពិកទាំងមូលនឹងកាន់ទុក្ខយ៉ាងខ្លាំងចំពោះការបាត់បង់មិត្តភក្តិដ៏អស្ចារ្យម្នាក់ និងអ្នកគាំទ្រកីឡាដ៏ងប់ងល់ម្នាក់នេះ» ។ ប្រធាន IOC បានថ្លែងបែបនេះ។

 

មុនចូលរួមសកម្មភាពកីឡា លោក Jacques Rogge គឺជាអតីតគ្រូពេទ្យវះកាត់ឆ្អឹងម្នាក់ ដែលបានតំណាងឱ្យក្រុមជម្រើសជាតិបែលហ្ស៊ិក ក្នុងការប្រកួតកីឡាបាល់ឱប និងជាជើងឯកថ្នាក់ជាតិ ១៦ដង ហើយក៏ជាជើងឯកពិភពលោកក្នុងការជិះទូកផងដែរ។ លោក Jacques Rogge បានប្រកួតប្រជែងក្នុងការជិះទូកនៃព្រឹត្តិការណ៍អូឡាំពិកចំនួនបីលើ គឺនៅឆ្នាំ ១៩៦៨ ១៩៧២ និង ១៩៧៦ នៅក្នុងកម្រិត Finn។

 

លោក Jacques Rogge ក៏ធ្លាប់ជាអតីតប្រធានគណៈកម្មាធិការអូឡាំពិកប៊ែលហ្ស៊ិក និងអឺរ៉ុប មុននឹងត្រូវជ្រើសរើសជាប្រធាន IOC នៅឆ្នាំ២០០១។ Jacques Rogge ក៏ធ្លាប់ជាបេសកជនពិសេសសម្រាប់យុវជន ជនភៀសខ្លួន និងកីឡា នៃអង្គការសហប្រជាជាតិទៀតផង៕