បច្ចុប្បន្នអ្នកចិញ្ចឹមត្រីខា្នតតូចមួយចំនួនធំបានបោះបង់មុខរបរនេះ ព្រោះកសិករទាំងនោះមិនមានលទ្ធភាព ឬទុនសម្រាប់បន្តទៅមុខទៀតខណៈអ្នកចិញ្ចឹមត្រីខ្នាតធំ និងមធ្យមក៏បានកាត់បន្ថយបរិមាណនៃការចិញ្ចឹមត្រីរបស់ខ្លួន ផងដែរ។ បើតាមលោកស្រី កែវ យ៉ាដាដែលជាប្រធានស្តីទីសមាគមវារីវប្បករកម្ពុជាមូលចម្បងដែលធ្វើឱ្យកសិករសម្រេចបោះបង់មុខរបរចិញ្ចឹមត្រីនេះគឺដោយសារតែមិនអាចប្រកួតប្រជែងតម្លៃជាមួយត្រីដែលនាំចូលពីបរទេស ពិសេសពីប្រទេសវៀតណាម។ 

 

លោកស្រី កែវ យ៉ាដាបានបញ្ជាក់ប្រាប់សារព័ត៌មានthmeythmey នាព្រឹកថ្ងៃទី៣១សីហា ដូច្នេះ៖«មួយរយៈចុងក្រោយនេះដែលកសិករទទួលបានបទពិសោធន៍និងខ្លាចរអា[ក្នុងការប្រកបមុខរបរចិញ្ចឹមត្រីនេះ]គឺដោយសារត្រីដែលពួកគាត់ចិញ្ចឹមបានហ្នឹងមិនត្រឹមតែមានតម្លៃថោកទេគឺថែមទាំងកកស្ទះមិនអាចលក់ចេញបានដែលធ្វើឱ្យគាត់[កសិករ]ពន្យារពេលនៃការចិញ្ចឹមត្រីរបស់គាត់ហ្នឹងដោយចំណាយថ្លៃដើមបបន្ថែមកាន់តែខ្ពស់ថែមទៀត»។

 

 

ជុំវិញបញ្ហានៃការចិញ្ចឹមត្រីរបស់ប្រជាកសិករនេះសមាគមវារីវប្បករចង់ឃើញភាគីពាក់ព័ន្ធរបស់រដ្ឋបង្កើនការត្រួតពិនិត្យការនាំចូលត្រីឲ្យគោរពទៅតាមកូតាដែលបានកំណត់ហើយជួយសម្រួលថ្លៃដើមក្នុងការចិញ្ចឹមត្រីដល់កសិករដើម្បីឱ្យពួកគេមានទឹកចិត្តបន្តអាជីពនេះទៅមុខទៀត។ នេះជាការលើកឡើរបស់អ្នកស្រី កែវយ៉ាដា។ 

 

សូមជម្រាបថាបញ្ហាកក់ស្ទះត្រីនៅក្នុងស្រះ ដោយសារឈ្មួញមិនព្រមបញ្ជាទិញ រួមផ្សំនឹងការប្រកួតប្រជែងតម្លៃខ្លាំងជាមួយត្រីនាំដែលចូលពីប្រទេសវៀតណាម ក្រុមអ្នកចិញ្ចឹមត្រី ឬវារីវប្បករគឺបានកើតឡើងតាំងពីចុងឆ្នាំ២០២០មកម្ល៉េះ៕