ជាតិ
ករណីយោធិនឃុបឃិតលួចនាំចូលរថយន្តចង្កូតស្តាំ តាមច្រករបៀង មេបញ្ជាការនឹងប្រឈមមុខច្បាប់
× មេបញ្ជាការកងទ័ពជើងគោកយោធភូមិភាគ៥ លោក ឯក សំអូន តាមចំណាររបស់សម្តេច ហ៊ុន សែន បានចេញបទបញ្ជាស្តីពីការទប់ស្កាត់ការនាំចូលរថយន្តចង្កូតស្តាំមកក្នុងប្រទេស។
ក្នុងបទបញ្ជាដែលចុះហត្ថលេខានៅថ្ងៃទី១ ខែកញ្ញា លោក ឯក សំអូន បានណែនាំឲ្យគ្រប់បណ្តាកងឯកភាពតាមព្រំដែន រួមគ្នាសហការទប់ស្កាត់ឲ្យបាននូវការនាំចូលរថយន្តចង្កូតស្តាំ។ ក្នុងករណីមានយោធិន ឃុបឃិតលួចនាំចូល មេបញ្ជាការកងឯកភាពនឹងត្រូវប្រឈមចំពោះមុខច្បាប់។
លោកបានតម្រូវឲ្យមេបញ្ជាការប្រចាំទិសទី១ ទី២ ទី៣ (ប៉ៃលិន-សំឡូត) និងទិសទី៤ បន្តផ្សព្វផ្សាយបទបញ្ជានេះទៅគ្រប់អង្គភាពដែលទទួលខុសត្រូវ។
លោក ម៉ៅ ផល្លា អ្នកនាំពាក្យអគ្គបញ្ជាការកងទ័ពជើងគោក បានថ្លែងប្រាប់ថ្មីៗថា បទបញ្ជានេះ ជាការក្រើនរំលឹកបន្ថែមដល់មន្ត្រីក្រោមឱវាទនៃអង្គភាពនីមួយៗ ចៀសវាងការទិញ ឬឃុបឃិតនាំចូលរថយន្តចង្កូតស្តាំតាមច្រករបៀង។ លោក ក៏អំពាវនាវដល់ យោធិនទាំងអស់ កុំទិញ ឬប្រើប្រាស់រថយន្តចង្កូតស្តាំ ដែលល្មើសនឹងបទបញ្ជារបស់រដ្ឋាភិបាល ធ្វើឱ្យខូចឈ្មោះដល់អង្គភាព៕
© រក្សាសិទ្ធិដោយ thmeythmey.com