ជាតិ
រថយន្ត
ឡានចង្កូតស្តាំដែលបង្ក្រាបបាន នឹងបំបែកទៅជាគ្រឿងបន្លាស់ ឬកម្ទេចចោល លោក ហ៊ីង ថូរ៉ាក់ស៊ី រដ្ឋលេខាធិការប្រចាំការនៃទីស្តីការគណៈរដ្ឋមន្ត្រី
× ចាប់ពីដើមខែកក្កដា ឆ្នាំ២០២២ តទៅ ឡានចង្កូតស្តាំដែលអាជ្ញាធរបង្ក្រាបបាន នឹងត្រូវបំបែកទៅជាគ្រឿងបន្លាស់ ឬកម្ទេចចោលតែម្តង។ នេះបើយោងតាមលិខិតចុះថ្ងៃទី២ កញ្ញា របស់ទីស្តីការគណៈរដ្ឋមន្ត្រី ជម្រាបទៅរដ្ឋមន្ត្រីក្រសួងចំនួន៣ គឺមហាផ្ទៃ ការពារជាតិ និងក្រសួងសេដ្ឋកិច្ច និងហិរញ្ញវត្ថុ។
នៅក្នុងលិខិតដដែល លោក ហ៊ីង ថូរ៉ាក់ស៊ី រដ្ឋលេខាធិការប្រចាំការនៃទីស្តីការគណៈរដ្ឋមន្ត្រី បញ្ជាក់ថា រដ្ឋាភិបាលទុកពេលត្រឹមដំណាច់ខែមិថុនា ឆ្នាំ២០២២ ឱ្យម្ចាស់រថយន្តចង្កូតស្តាំដែលមានវត្តមាននៅកម្ពុជា កែចង្កូតពីស្តាំ មកឆ្វេង ដើម្បីឱ្យស្របច្បាប់ចរាចរណ៍ផ្លូវគោករបស់កម្ពុជា។ ម្ចាស់រថយន្តទាំងនោះ ក៏ត្រូវតែបង់ពន្ធ និងអាករនាំចូលរថយន្តតាមកាតព្វកិច្ចផងដែរ។
គួរកត់សម្គាល់ថា កាលពីដើមខែកញ្ញាកន្លងទៅ មេបញ្ជាការកងទ័ពជើងគោកយោធភូមិភាគ៥ លោក ឯក សំអូន បានចេញបទបញ្ជាស្តីពីការទប់ស្កាត់ការនាំចូលរថយន្តចង្កូតស្តាំមកក្នុងប្រទេស។ ក្នុងបទបញ្ជានោះ លោក ឯក សំអូន បានណែនាំឲ្យគ្រប់បណ្តាកងឯកភាពតាមព្រំដែន រួមគ្នាសហការទប់ស្កាត់ឲ្យបាននូវការនាំចូលរថយន្តចង្កូតស្តាំ ហើយក្នុងករណីមានយោធិន ឃុបឃិតលួចនាំចូល មេបញ្ជាការកងឯកភាពនឹងត្រូវប្រឈមចំពោះមុខច្បាប់។
ក្រៅពីដាក់ចេញវិធានការលើរថយន្តចង្កូតស្តាំ រដ្ឋាភិបាល ក៏នឹងចាត់ការលើម្ចាស់រថយន្តឯកជន ជ្រកក្រោមស្លាកលេខរដ្ឋ ផ្អាកលេខ ខ.ម និងន.ប ដែលមានចង្កូតឆ្វេង ដែលគ្មានក្នុងបញ្ជីទ្រព្យសម្បត្តិរដ្ឋដែរ។ យោងតាមលិខិតដដែល ម្ចាស់រថយន្តឯកជនជ្រកក្រោមស្លាកលេខរដ្ឋ ផ្អាកលេខ ខ.ម និងន.ប នឹងទទួលបានការអនុគ្រោះតែមួយលើកក្រោយនេះប៉ុណ្ណោះ ក្នុងការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទឆ្នាំ២០២១ ដោយប្រើប្រាស់ថវិកាផ្ទាល់ខ្លួន។ ក្រៅពីបង់ពន្ធដារ ម្ចាស់យានយន្តទាំងនោះ ក៏ត្រូវតែបង់ពន្ធ និងអាករនាំចូលយានយន្ត តាមច្បាប់ និងបទប្បញ្ញត្តិជាធរមានរបស់កម្ពុជាដែរ។
រដ្ឋលេខាធិការប្រចាំការនៃទីស្តីការគណៈរដ្ឋមន្ត្រី ក៏បានប្រាប់ឱ្យអគ្គនាយដ្ឋានពន្ធដារ រៀបចំបញ្ជីលម្អិត អំពីភិនភាគសម្គាល់យានយន្ត និងម្ចាស់យានយន្តឯកជន ដែលជ្រកក្រោមផ្លាកលេខរដ្ឋ ផ្លាកលេខ ខ.ម និងន.ប ជូនទៅអគ្គនាយកដ្ឋានគយ និងរដ្ឋាករកម្ពុជា ដើម្បីចាត់វិធានការបន្តខាងផ្នែកពន្ធ និងអាករនាំចូល។
លោក ហ៊ីង ថូរ៉ាក់ស៊ី គូសបញ្ជាក់ក្នុងលិខិតដដែលថា អាជ្ញាធរដែនដី និងកងកម្លាំងប្រដាប់អាវុធ ត្រូវគាំទ្រកម្លាំងរបស់គយ ក្នុងការទប់ស្កាត់ និងបង្ក្រាបការរត់ពន្ធរថយន្តចង្កូតស្តាំចូលមកកម្ពុជា។ ហើយក្រសួង និងស្ថាប័នទាំងអស់ ត្រូវអនុវត្តឱ្យបានម៉ឹងមាត់ នូវច្បាប់និងគោលនយោបាយហាមឃាត់ការនាំចូល និងប្រើប្រាស់រថយន្តចង្កូតស្តាំ លើកលែងមានការអនុញ្ញាតពីរាជរដ្ឋាភិបាល ជាលក្ខណៈពិសេស ដូចជារថយន្តពន្លត់អគ្គិភ័យ រថយន្តដឹកសំរាមជាដើម។ ករណីរកឃើញបុគ្គលដែលមានការពាក់ព័ន្ធនឹងការលួចលាក់នាំចូលរថយន្តចង្កូតស្តាំដែលជាប្រភេទរថយន្តខុសច្បាប់ បុគ្គលនោះ ត្រូវទទួលទោសទណ្ឌតាមច្បាប់ជាធរមាន។ នេះបើតាមលិខិតដដែល៕
Tag:
ឡានចង្កូតស្តាំ
គ្រឿងបន្លាស់
ខ.ម
ន.ប
ស្លាកលេខរដ្ឋ
© រក្សាសិទ្ធិដោយ thmeythmey.com