ស្របពេលមានអ្នកប្រឆាំងការកំហិតសិទ្ធិសេរីភាពស្រ្តីពីសំណាក់ក្រុមតាលីបង់នោះ គេក៏ឃើញមានការគាំទ្រវិញដែរ។ នៅថ្ងៃទី១១ ខែកញ្ញា ស្រ្តីអាហ្វហ្កានីស្ថានប្រមាណ៣០០នាក់ដែលស្លៀកពាក់ជិតខ្លួនតាមការកំណត់របស់ក្រុមតាលីបង់ក្នុងវិស័យអប់រំ បានប្រមូលផ្ដុំគ្នានៅសាកលវិទ្យាល័យអប់រំ Shaheed Rabbani ក្នុងទីក្រុងកាប៊ុល បង្ហាញការគាំទ្ររបស់ពួកគេចំពោះការកំណត់របស់ក្រុមតាលីបង់ ខណៈវាគ្មិនក្នុងកម្មវិធីរិះគន់លោកខាងលិចមិនដាច់ពីមាត់។

 

ទង់របស់ក្រុមតាលីបង់ ត្រូវបានអ្នកចូលរួមគ្រវីទៅមក ស្របពេលវាគ្មិនចាប់ផ្ដើមរិះគន់ស្រ្តីដែលតវ៉ាតាមផ្លូវដែរ។ បើតាមទីភ្នាក់ងារព័ត៌មាន AFP វាគ្មិនទាំងនោះ ក៏និយាយការពាររដ្ឋាភិបាលអាហ្វហ្កានីស្ថានថ្មីដែលប្រកាសដោយក្រុមតាលីបង់ បើទោះមិនមានសមាជិកជាស្រ្តីណាម្នាក់ក្ដី។ 

 

«យើងប្រឆាំងស្រ្តីដែលតវ៉ាតាមផ្លូវ ដោយអះអាងថា ពួកគេតំណាងឱ្យស្រ្តីទាំងអស់» វាគ្មិនស្រ្តីម្នាក់ដែលគ្របខ្លួនជិតតាំងពីក្បាលដល់ចុងជើងនិយាយបែបនេះ មុនចោទជាសំណួរថា តើរដ្ឋាភិបាលមុនមានសេរីភាពបែបនេះដែរទេ? 

 

តាមពិតទៅ ក្នុងការឡើងកាន់អំណាចលើកនេះ ក្រុមតាលីបង់ហាក់បន្ធូរការរឹតត្បិតខ្លះទៅលើស្រ្តី ពិសេសក្នុងវិស័យអប់រំ។ ស្រ្តីអាចចូលរៀននៅសាកលវិទ្យាល័យបាន តែក្នុងថ្នាក់រៀននីមួយៗត្រូវបែងចែកតាមភេទ ឬត្រូវដាក់វាំងននខណ្ឌចែកសិស្សប្រុសស្រី។ សិស្សជានារីក៏ត្រូវប្រើសម្លៀកបំពាក់ abaya ឬ hiqab ដែលបិទខ្លួនជុំជិតផងដែរ។ រឿងនេះ ក៏កំពុងត្រូវអនុវត្តទៅហើយដែរនៅអាហ្វហ្កានីស្ថានហើយដែរ៕