ក្រុមតាលីបង់បានប្រកាសជ័យជម្នះគ្រប់គ្រងទឹកដីអាហ្វហ្កានីស្ថានទាំងមូលហើយ ក្រោយចូលគ្រប់គ្រងតំបន់តស៊ូចុងក្រោយនៅក្បែររដ្ឋធានីកាប៊ុល។ ក្រុមនេះ ក៏ស្នើឱ្យកម្លាំងប្រដាប់អាវុធរបស់រដ្ឋាភិបាលចាស់ចូលរួមជាមួយខ្លួនដើម្បីកសាងប្រទេសផងដែរ។

 

ជនជាតិប៉ាឡេស្ទីនចំនួន ៦នាក់ ដែលជាប់ពន្ធនាគារនៅអ៊ីស្រាអែល បានរត់គេច តាមរយៈការជីករូងក្រោមដី។ ដំណឹងបាត់ខ្លួនរបស់អ្នកជាប់ឃុំចំនួន ៦នាក់នោះ បានធ្វើឱ្យអាជ្ញាធរអ៊ីស្រាអែល ចាត់វិធានការទ្រង់ទ្រាយធំ ដើម្បីតាមប្រមាញ់។

 

 

រដ្ឋាភិបាលស្រមោលមីយ៉ាន់ម៉ា បានប្រកាសសង្រ្គាមប្រជាជនដើម្បីផ្ដួលរំលំរបបយោធាដែលកំពុងដឹកនាំប្រទេស។ រដ្ឋាភិបាលស្រមោលដែលបង្កើតដោយសមាជិកសភាជាប់ឆ្នោតពីការបោះឆ្នោតខែវិច្ឆិកា ឆ្នាំ២០២០ ស្នើឱ្យប្រជាជនទូទាំងប្រទេស និងកម្លាំងប្រដាប់អាវុធទាំងអស់ ងើបឡើងដើម្បីធ្វើបដិវត្តន៍ប្រឆាំងរដ្ឋាភិបាលសឹកដែលធ្វើទុក្ខបុកម្នេញប្រជាជន ហើយក៏ប្រាប់សហគមន៍អន្តរជាតិឱ្យយោគយល់ការសម្រេចចិត្តនេះដែរ។

 

មួយថ្ងៃបន្ទាប់ពីគ្រប់គ្រងអាហ្វហ្កានីស្ថានពេញទី ក្រុមតាលីបង់ បានប្រកាសពីសមាជិករបស់រដ្ឋាភិបាលបណ្តោះអាសន្នអាហ្វហ្កានីស្ថាន។ សមាជិករដ្ឋាភិបាលនេះ ក៏មានរដ្ឋមន្រ្តីដែលជាមុខសញ្ញា មន្រ្តីអាម៉េរិកចង់ចាប់ផងដែរ ខណៈរដ្ឋមន្រ្តីខ្លះត្រូវសហគមន៍អន្តរជាតិចាត់ទុកជាភេរវករ។

 

 

មនុស្សយ៉ាងហោចណាស់៤១នាក់ បានបាត់បង់ជីវិតក្នុងហេតុការណ៍ភ្លើងឆេះគុកនៅឥណ្ឌូណេស៊ី។ ការស៊ើបអង្កេតកំពុងធ្វើឡើងដើម្បីរកមូលហេតុ។

 

បណ្តាប្រទេសអាស៊ាន និងប្រទេសផ្សេងទៀត បានអំពាវនាវឱ្យភាគីទាំងអស់នៅមីយ៉ាន់ម៉ា ចៀសវាងរាល់អំពើហិង្សា និងជំរុញឱ្យមានជំនួយមនុស្សធម៌ចូលទៅក្នុងប្រទេស។ ការអំពាវនាវបែបនេះ ធ្វើឡើងក្រោយពេលរដ្ឋាភិបាលបង្រួបង្រួមជាតិមីយ៉ាន់ម៉ា (NUG) ប្រកាសឱ្យប្រជាជនងើបបះបោរនៅទូទាំងប្រទេស ដើម្បីប្រឆាំងនឹងរបបសឹកមីយ៉ាន់ម៉ា។

 

 

កូរ៉េខាងជើងបានធ្វើព្យុហយាត្រាយោធាមួយ ដើម្បីរម្លឹកខួបលើកទី ៧៣ នៃការបង្កើតប្រទេស។ មេដឹកនាំកំពូលលោក គីម ជុងអ៊ុន ក៏មានវត្តមានក្នុងពិធីនេះដែរ តែមិនថ្លែងសុន្ទរកថាអ្វីឡើយ។ លើសពីនោះ កូរ៉េខាងជើង ក៏មិនបានបង្ហាញអាវុធយុទ្ធសាស្ត្រថ្មីៗដូចសព្វដងដែរ។

 

ក្រសួងសុខាភិបាលស្រីលង្កា នៅថ្ងៃទី៩ ខែកញ្ញា បានជំរុញឱ្យស្ត្រីពន្យារពេលមានផ្ទៃពោះ ឬយកកូន ដើម្បីទប់ស្កាត់ហានិភ័យស្លាប់ ដោយសារជំងឺកូវីដ-១៩។ ការអំពាវនាវនេះ ធ្វើឡើងបន្ទាប់ពីស្ត្រីមានផ្ទៃពោះ នៅស្រីលង្កា បានទទួលមរណភាពច្រើនជាង ៤០នាក់ ដោយសារតែជំងឺកូវីដ-១៩។

 

 

រដ្ឋមន្រ្តីការបរទេសចិន វ៉ាង យី និយាយថា ចិន និងវៀតណាម មិនគួរធ្វើសកម្មភាពអ្វីដែលពង្រីកជម្លោះសមុទ្រចិនខាងត្បូងឡើយ។ លោក វ៉ាង និយាយបែបនេះទៅកាន់មន្រ្តីជាន់ខ្ពស់វៀតណាមក្នុងដំណើរទស្សនកិច្ចនៅទីក្រុងហាណូយ។ ចិន និងវៀតណាម សុទ្ធសឹងជាភាគីជម្លោះនៅសមុទ្រចិនខាងត្បូង ទីដែលចិនទាមទារស្ទើរទាំងស្រុងដែនទឹកដ៏មមាញឹកមួយរបស់ពិភពលោក។

 

អតីតរដ្ឋមន្រ្តីសុខាភិបាលបារាំង Agnes Buzyn រងការចោទប្រកាន់ជាផ្លូវការនៅថ្ងៃទី១០ ខែកញ្ញាពាក់ព័ន្ធការគ្រប់គ្រងជំងឺកូវីដ-១៩ ។ ក្រុមស៊ើបអង្កេតនៅតុលាការពិសេស រកឃើញមូលដ្ឋានគ្រប់គ្រាន់ដើម្បីដំណើរក្ដីប្រឆាំងលោកស្រី Buzyn ។

 

 

ស្រ្តីអាហ្វហ្កានីស្ថានដែលស្លៀកពាក់ជិតខ្លួន បានជួបជុំគ្នានៅសាកលវិទ្យាល័យមួយក្នុងរដ្ឋធានីកាប៊ុល ដើម្បីបង្ហាញការគាំទ្រចំពោះគោលនយោបាយរបស់ក្រុមតាលីបង់ដែលទើបឡើងកាន់អំណាចថ្មីៗ។ វាហាក់បញ្ច្រាសទៅនឹងអ្វីដែលកើតឡើងនៅតាមដងផ្លូវដែលស្រ្តីជាច្រើននាំគ្នាតវ៉ាប្រឆាំងគោលនយោបាយរបស់ក្រុមនេះលើការគោរពសិទ្ធិស្រ្តីនៅអាហ្វហ្កានីស្ថាន៕