ពិរុទ្ធជនដែលមិនត្រូវបានបង្ហាញឈ្មោះ ឈឺចុកចាប់ពោះអស់រយៈពេលជាច្រើនថ្ងៃ ហើយក្រោយមកត្រូវបានបញ្ជូនទៅពិនិត្យនៅផ្នែកក្រពះពោះវៀន នាមជ្ឈមណ្ឌលគ្លីនិកសាកលវិទ្យាល័យក្រុង Pristina។ លទ្ធផលវិភាគបង្ហាញថា មានទូរសព្ទដៃ Nokia 3310 មួយគ្រឿងនៅក្នុងពោះបុរសនោះ។

 

«ពិរុទ្ធជនអាយុ៣៣ឆ្នាំ បានលេបទូរសព្ទចូលទៅក្នុងពោះ ហើយយើងបានវះយកចេញដោយជោគជ័យហើយ»។ លោក Skender Telaku ប្រធានផ្នែកវះកាត់ បានអះអាងយ៉ាងដូច្នេះប្រាប់ទីភ្នាក់ងារព័ត៌មាន AFP ដោយបញ្ជាក់ថា ក្រុមការងាររបស់លោកបានចំណាយពេលជាង២ម៉ោងក្នុងប្រតិបត្តិការវះកាត់នេះ។

 

លោក Talaku បានបញ្ជាក់ថា៖ «ដូចជាដើរក្នុងចម្ការមីនយ៉ាងដូច្នោះដែរ ហើយធ្វើការវះកាត់យ៉ាងប្រុងប្រយ័ត្នជាទីបំផុត ជាពិសេសការប្រើប្រាស់ឧបករណ៍ប្រើថ្ម ប៉ុន្តែប្រតិបត្តិការបានជោគជ័យហើយ»។

 

ក្រោយវះកាត់ ពិរុទ្ធជន ត្រូវបានប៉ូលិសនាំខ្លួនទៅកាន់ពន្ធនាគារវិញ រួមទាំង Nokia 3310 ដែលផលិតកាលពីអំឡុងឆ្នាំ២០០០ផងដែរ។ ជាមួយគ្នានេះ អ្នកជំងឺបានអះអាងថា  ខ្លួនមិនបានដឹងពីមូលហេតុដែលទូរសព្ទ Nokia 3310 ចូលទៅក្នុងពោះរបស់ខ្លួននោះឡើយ។

 

ក្រុមមន្ត្រីប៉ូលិសបានបដិសេធក្នុងការផ្តល់សម្ភាសដល់អ្នកសារព័ត៌មានជុំវិញករណីនេះ៕