បើយោងតាមការចុះផ្សាយរបស់កាសែត El Mundo ខ្សែប្រយុទ្ធវ័យ ២៩ ឆ្នាំរូបនេះ ទទួលបានប្រាក់ឈ្នួលប្រមាណ៨៣ម៉ឺនដុល្លារក្នុងមួយសប្តាហ៍ ក្រោយចុះកិច្ចសន្យាថ្មីនៅ Le Parc des Princes។ ថ្លៃពលកម្មដ៏ច្រើនសន្ធឹកនេះ មិនទាន់គិតបញ្ចូលថ្លៃប្រាក់រង្វាន់លើកទឹកចិត្តនោះទេ។
 

មិនមែនជារឿងភ្ញាក់ផ្អើលនោះទេដែល Neymar ជាកីឡាករម្នាក់ដែលទទួលបានប្រាក់ឈ្នួលច្រើនបំផុតលំដាប់ពិភពលោក។ យ៉ាងណា Neymar នៅតាមពីក្រោយមិត្តរួមក្រុម Messi ដែលទទួលបានថ្លៃនឿយហត់៤១លានដុល្លារក្នុងមួយឆ្នាំ ក្រោយ PSG នាំយកទៅរួមក្រុមនៅរដូវថ្មី ២០២១-២២នេះ។ 
 

ជារឿងគួរឱ្យចាប់អារម្មណ៍បំផុតដែល Neymar អតីតខ្សែបម្រើឆ្នើម Barcelona អាចរកបានប្រាក់បន្ថែមពីលើថ្លៃពលកម្មរបស់ខ្លួនដ៏ច្រើនថែមទៀត។ ក្នុងលក្ខខណ្ឌកិច្ចសន្យាថ្មីដល់ឆ្នាំ២០២៥ Neymar ដែលក្លិបយក្សបារាំងទិញពីក្លិបយក្សអេស្ប៉ាញក្នុងតម្លៃកំណត់ត្រា ២៦០លានដុល្លារកាលពីឆ្នាំ២០១៧ នឹងទទួលបាន៤៣ម៉ឺនដុល្លារក្នុង១ខែថែមទៀត ដោយគ្រាន់តែរូបគេចេះគួរសមជាមួយគាំទ្រ ទៅហ្វឹកហាត់ទាន់ពេលវេលា និងមិនរិះគន់ក្លិបជាសាធារណៈ។
 

នេះមានន័យថាក្លិបដែលមានម្ចាស់ជាមហាសេដ្ឋីកាតា ត្រូវបន្ថែមប្រាក់លើកទឹកចិត្តប្រហែល ៧,៦៨ លានដុល្លារជារៀងរាល់ឆ្នាំសម្រាប់ Neymar ដើម្បីឱ្យរូបគេចេះអរគុណអ្នកគាំទ្រមុន និងក្រោយការប្រកួតនីមួយៗ។
 

នៅក្រោយចប់ការប្រកួត Neymar តម្រូវឱ្យត្រឡប់ទៅផ្ទះ និងមិនអាចយកបណ្តាញសង្គមដូចជាហ្វេសប៊ុក ឬ Twitter ជាដើមដើម្បីបង្ហាញការមិនពេញចិត្តចំពោះអ្នកចាត់ការខ្លួនលោក Mauricio Pochettino អំពីយុទ្ធសាស្ត្រណាមួយឡើយ រួមទាំងមតិអវិជ្ជមានជាសាធារណៈអំពីក្លិបរបស់ខ្លួន៕